Gadchiroli : गडचिरोलीतील टॅक्सी ड्रायव्हर ते लीड्स विद्यापीठ, खेड्यातील मुलीचा प्रेरणादायी प्रवास

Gadchiroli Kiran Kurmawar Success Story : गडचिरोलीमध्ये टॅक्सी चालवणाऱ्या किरण कुर्मावार हिचा ब्रिटनमधील लीड्स विद्यापीठापर्यंतचा प्रवास प्रेरणादायी आहे.

Gadchiroli Kiran Kurmawar Success Story

गडचिरोली जिल्ह्यातील सिरोंचा तालुक्यापासून जवळपास 70 किलोमीटर दूर असलेल्या रेगुंठा गावातील टॅक्सी ड्रायव्हर किरण कुर्मावार अखेर आपल्या पुढील उच्च शिक्षणासाठी इंग्लंडला रवाना झाली आहे.

किरण पुढील दोन वर्षे इंग्लंडमधील लीड्स विद्यापीठात एमएस्सी इन मार्केटिंग मँनेजमेंट या विषयाचा अभ्यास करणार आहे.

परदेशी विद्यापीठात प्रवेश मिळाल्यानंतर किरणची उच्च शिक्षणासाठी केवळ पैशाअभावी होणारी होलपट प्रथम एबीपी माझाने दाखवली आणि त्यानंतर तात्काळ राज्य सरकारच्यावतीने किरणला 40 लाख रुपयांची शिष्यृवत्ती मंजूर करण्यात आली.

एबीपी माझाने सहा महिन्यांपूर्वी गडचिरोली जिल्ह्यातील किरणच्या रेगुंठा गावात जाऊन किरणची परिस्थिती समोर आणणारा ग्राऊंड रिपोर्ट तयार केला.

त्यानंतर या रिपोर्टची दखल घेऊन उद्धव बाळासाहेब ठाकरे गटाचे आमदार सचिन अहिर यांनी हा विषय पावसाळी अधिवेशनात मांडला.

एबीपी माझाच्या बातमीची दखल घेऊन या विषयावर सचिन अहिर यांनी विधानपरिषदेत आदिवासी मुलीची शिक्षणासाठी होणारी हेळसांड याकडे सरकारचं लक्ष वेधलं.

त्यानंतर मुख्यमंत्री एकनाथ शिंदे यांनी किरणला मुंबईला बोलावून तिच्या अडचणी समजून घेतल्या आणि तात्काळ सामाजिक न्याय विभागाला आदेश देत किरणला सर्वतोपरी मदत करण्याचं आश्वासन दिलं.

त्यानंतर किरणचं परदेशी जाऊन उच्च शिक्षण घेण्याच स्वप्न पूर्ण झाल्याचं पाहायला मिळालं.