पाहा: मुंबईत आदिवासी मंत्र्यांच्या बंगल्याबाहेर आदिवासींचे ठिय्या आंदोलन

मुंबई: आदिवासी मंत्र्यांच्या बंगल्याबाहेर आदिवासींचे ठिय्या आंदोलन

वनजमिनीच्या मुद्यावर आज राज्यभरातील आदिवासींनी मुंबईत आदिवासी विकास मंत्री के.सी. पाडवी यांच्या शासकीय निवासस्थानाबाहेर ठिय्या आंदोलन केले.

अचानकपणे आंदोलक जमा झाल्याने पोलिस यंत्रणेची तारांबळ उडाली.

वनजमीन हक्क कायद्याची प्रभावी अंमलबजावणी करावी आणि आदिवासी कसत असलेली जमिनी त्यांच्या नावावर करण्याची मागणी यावेळी आंदोलकांनी केली.

अद्यापही वन जमिनीवरील आदिवासींचे दावे मान्य करण्यात आले नाहीत. आदिवासी कसत असलेल्या जमिनीवरील पिके वनविभागाकडून नष्ट करण्यात येत असल्याचा आरोप आंदोलकांनी केला.

आदिवासींच्या वनजमिनीच्या प्रश्नांबाबत याआधी 16 फेब्रुवारी रोजी शिष्टमंडळासोबत भेट घेत चर्चा केली होती, असे आदिवासी विकास मंत्री के.सी. पाडवी यांनी सांगितले.

मागील महिन्यात झालेल्या बैठकीनंतर काही प्रश्न सुटले असल्याचे त्यांनी सांगितले.

वनजमिनीच्या दाव्यांबाबत विभागीय आयुक्तांकडे दावे प्रलंबित आहेत, त्यांच्यासोबत बैठक झाल्यानंतर निर्णय घेता येईल असेही पाडवी यांनी म्हटले.