Delta Plus : डेल्टा प्लस विषाणूबाबत गैरसमज, घाबरण्याची गरज नाही, CSIRचे प्रमुख डॉ शेखर मांडे यांचं मत

संशोधनात कुठेच डेल्टा प्लस प्रकारामुळे कोरोनाचा संसर्ग वाढत असल्याचे कुठलेच पुरावे मिळालेले नाही. त्यामुळे नागरिकांनी या विषाणूच्या नवीन प्रकाराला घेऊन घाबरण्याची अजिबात गरज नाही, असं मत वैज्ञानिक आणि औद्योगिक संशोधन परिषदेचे (सीएसआयआर)  प्रमुख डॉ. शेखर मांडे यांनी एबीपी माझा डिजिटलशी बोलताना व्यक्त केले. 

delta_pus_01

Delta plus Update : डेल्टा प्लस या कोरोनाच्या विषाणूच्या प्रकाराला घेऊन संपूर्ण देशात आणि विशेष म्हणजे महाराष्ट्रात उलट सुलट चर्चा सुरु आहे. यामुळे लोकांमध्ये भीतीचे वातावरण निर्माण झाले आहे. राज्यात सध्याच्या घडीला फक्त 20 रुग्ण या विषाणूच्या प्रकाराने बाधित आहे. सध्या देश पातळीवर या कोरोनाच्या नवीन प्रकारच्या अनुषंगाने जोरदार संशोधन सुरु आहे, मात्र संशोधनात कुठेच डेल्टा प्लस या प्रकारामुळे कोरोनाचा संसर्ग वाढत असल्याचे कुठलेच  पुरावे मिळालेले नाही. त्यामुळे नागरिकांनी या विषाणूच्या नवीन प्रकाराला घेऊन घाबरण्याची अजिबात गरज नाही. शिवाय महामारीच्या काळात संसर्गच्या लाटा येत असतात. पण तिसरी लाट केव्हा येईल ते आताच सांगता येत नाही, त्या लाटेची तीव्रता कमी ठेवायची जबाबदारी ही नागरिकांच्या हातात असल्याचे मत वैज्ञानिक आणि औद्योगिक संशोधन परिषदेचे (सीएसआयआर)  प्रमुख डॉ. शेखर मांडे यांनी एबीपी माझा डिजिटलशी बोलताना व्यक्त केले. 

दुसरी लाट ओसरत असतानाच वैद्यकीय क्षेत्रात कोरोनाची तिसरी लाट येण्याची शक्यता वर्तविली जात आहे. या सर्व प्रकारात डेल्टा प्लस विषाणूने चिंतेत भर टाकली आहे. जगात सध्या सर्वात जास्त चिंता डेल्टा विषाणूबाबत व्यक्त केली जात आहे. त्याच्याच परावर्तित प्रकाराचे म्हणजे डेल्टा प्लसचे 21 रुग्ण राज्यात आहेत. त्यापैकी सर्वात अधिक रुग्ण रत्नागिरी, जळगाव, येथे असून काही रुग्ण मुंबई, ठाणे, रायगड परिसरात आहे.

याबाबत अधिक माहिती देताना डॉ मांडे यांनी सांगितले की, "डेल्टा प्लस या विषाणूच्या प्रकाराला घेऊन जी चिंता व्यक्त केली जात आहे. त्याबद्दल खूप गैरसमज निर्माण केले जात आहे. वैज्ञानिक आणि औद्योगिक संशोधन परिषदेने या विषाणूच्या प्रकाराला घेऊन संशोधन केले आहे. त्यामध्ये कुठेही असे पुरावे आढळले नाही कि हा विषाणू घातक आहे किंवा त्याचा संसर्गाचा वेग प्रचंड आहे. त्यामुळे लोकांनी अजिबात घाबरण्याची गरज नाही. दुसरे म्हणजे डेल्टा हा विषाणू सध्या भारतभर आहे. तिसरी लाट केव्हा माहीत नाही मात्र त्याची तीव्रता कमी करण्याची जबाबदारी नागरिकांची आहे. कोरोनाच्या अनुषंगाने जर सुरक्षित वावर ठेवला आणि लसीकरण करून घेतले तर तिसरी लाट गंभीर असण्याची शक्यता फार कमी आहे. "    

डेल्टा प्लस रुग्णांची लक्षणे ही सर्वसाधारण कोरोनाची लक्षणे असतात त्याप्रमाणेच असतात. या विषाणूचा प्रादुर्भाव किती गंभीर आहे, याबाबत अधिक अभ्यास होणे गरजेचे आहे.  या विषाणूचा फैलाव किती राहील हे आताच सांगणे मुश्किल आहे. ह्या नवीन विषाणूचे वर्तन कसे असेल याबाबत आता कुणीच काही सांगू शकत नाही. विषाणूचे परावर्तित होणे म्हणजे नेमके काय होते हे जाणून घेणे गरजेचे आहे. वैद्यकीय तज्ञांचे मते, हे यापूर्वीच्या साथीच्या आजारात दिसून आले आहे कि, प्रत्येक विषाणूं हा आपले अस्तित्व टिकवून ठेवत असतो. याकरिता तो स्वतःच्या रूपामध्ये बदल करून घेत असतो. कोरोनाच्या या काळातच ब्राझील स्ट्रेन , यु के स्ट्रेन , दक्षिण आफ्रिकेतील स्ट्रेन  बघितले आहे. भविष्यात असे आणखी विषाणूचे प्रकार येण्याची शक्यता नाकारता येत नाही. विषाणूचे बदल होत जाणे ही एक प्रक्रिया आहे आणि याचे ज्ञान वैद्यकीय जगताला अवगत आहे.