कोकण, पश्चिम महाराष्ट्रात पावसामुळे खराब झालेल्या रस्त्यांच्या दुरुस्तीसाठी 100 कोटी रुपयांचा निधी मंजूर 

परशुराम घाट, कारूळ घाट, आंबा घाट, इथे रस्त्यात आलेले अडथळे देखील दूर करण्यात आले आहेत. तात्पुरत्या दुरुस्तीची कामे आधीच हातात घेण्यात आली आहेत.

nitin_gadkari

नवी दिल्ली : कोकण आणि पश्चिम महाराष्ट्रात काही दिवसांपूर्वी झालेल्या अभूतपूर्व पावसामुळे, वाहून गेलेल्या अथवा खराब झालेल्या रस्त्यांच्या दुरुस्तीचे काम त्वरित सुरु करण्यात आले आहे, अशी माहिती केंद्रीय रस्ते वाहतूक आणि महामार्ग मंत्री नितीन गडकरी यांनी दिली आहे. या कामासाठी 100 कोटी रुपयांचा निधी मंजूर करण्यात आला आहे, अशी माहिती त्यांनी आज ट्वीट करुन दिली. यात 52 कोटी रुपये तात्पुरत्या डागडुजीसाठी आणि 48 कोटी रुपये कायमच्या दुरुस्त्या आणि बांधणीसाठी मंजूर करण्यात आले आहेत.

Immediate steps have been taken up to restore the roads affected by unprecedented rains in Konkan and Western Maharashtra. 100 Cr has been sanctioned in this regard. This includes 52 Cr for temporary restoration and 48 Cr for permanent restoration.

— Nitin Gadkari (@nitin_gadkari) August 5, 2021

मुंबई-गोवा महामार्गावर चिपळूण जवळचा वशिष्ठी नदीवरचा पूल देखील पावसामुळे खराव झाला होता, त्याची दुरुस्ती लगेच करुन 72 तासात तो पूल वाहतुकीसाठी खुला करण्यात आला असेही गडकरी यांनी सांगितले. तसेच, परशुराम घाट, कारूळ घाट, आंबा घाट, इथे रस्त्यात आलेले अडथळे देखील दूर करण्यात आले आहेत. तात्पुरत्या दुरुस्तीची कामे आधीच हातात घेण्यात आली असून, कायमची दुरुस्ती करण्याचेही काम प्राधान्याने केले जाईल, असेही गडकरी यांनी म्हटले आहे. 

कोकणात रत्नागिरी, रायगड आणि पश्चिम महाराष्ट्रातील सातारा, सांगली, कोल्हापूर येथे पावसाने अक्षरश: थैमान घातलं होतं. मुसळधार पावसामुळे यासाठी महापूर आला होता. मुसळधार पावसामुळे अनेक ठिकाणी दरड कोसळण्याच्या घटना समोर आल्या होत्या. तर अनेक रस्ते पावसाच्या पाण्यामुळे वाहून गेले आहेत. रस्ते वाहून गेल्याने अनेक गावांमध्ये पोहोचण्यासाठी मोठी कसरत करावी लागत आहेत. त्यामुळेच केंद्रीय मंत्री रस्ते वाहतूक मंत्री ही रस्त्यांची कामे युद्धपातळीवर पूर्ण करण्याचे निर्देश दिली आहेत. 

संबंधित बातम्या