बेलगाम वेब पोर्टल आणि यूट्यूब चॅनेलविरोधात सर्वोच्च न्यायालय कठोर पाऊल उचलणार

Supreme Court : बेलगाम वेब पोर्टल आणि यूट्यूब चॅनेलविरोधात सर्वोच्च न्यायालय कठोर पाऊल उचलणार आहे.

संग्रहित छायाचित्र

देशातील वेब पोर्टल, यूट्यूब चॅनेल आणि सोशल मीडियावर बनावट बातम्यांद्वारे ज्या वेगाने जातीयवाद पसरवला जात आहे, त्यावर सर्वोच्च न्यायालयाने चिंता व्यक्त केली आहे. अशा माध्यमांवर अंकुश ठेवण्याची नितांत गरज आहे. या सोशल मीडिया प्लॅटफॉर्मची बेलगाम स्थिती अशी आहे की ते सर्वसामान्यांपासून न्यायाधीश आणि संस्थांची प्रतिमा मलिन करणाऱ्या बातम्या बिरघोरपणे दाखवतात. कारण, त्यांच्यावर अद्याप कायदेशीर पकड नाही.

तबलीगी जमात प्रकरणात प्रसारमाध्यमांना सांप्रदायिक आणि खोटे सांगणाऱ्या याचिकांवर सुनावणी करताना, सर्वोच्च न्यायालय म्हणाले की अशा माध्यमांना कोणत्याही नियमन आणि नियंत्रणाशिवाय असेच सोडले जाऊ शकत नाही. यासह, नवीन आयटी नियमांना आव्हान देणाऱ्या सर्व याचिका विविध उच्च न्यायालयांमध्ये प्रलंबित आहेत, त्यांना सर्वोच्च न्यायालयात हस्तांतरित करण्याचे आदेश देण्यात आले आहेत. आता ते एकत्र ऐकल्या जातील.

सरन्यायाधीशांच्या अध्यक्षतेखालील खंडपीठाने सुनावणीदरम्यान सांगितले की, प्रत्येक गोष्ट आणि विषयाला जातीय रंग का दिला जातो हे त्यांना समजत नाही. सोशल मीडियावर न्यायाधीशांची प्रतिमा डागाळण्याचे प्रयत्न होत असल्याबद्दल त्यांनी चिंता व्यक्त केली. सरन्यायाधीश एन व्ही रमना म्हणाले, "तुम्ही यूट्यूबवर गेलात तर तुम्हाला दिसेल की किती सहजपणे खोट्या गोष्टी प्रसिद्ध केल्या जात आहेत. सर्वसामान्य लोक लांबच, इथे संस्थांबद्दल आणि न्यायाधीशांबद्दलही बदनामीकारक खोट्या गोष्टी दिसत आहेत. एवढेच नव्हे तर सामान्य माहितीला अनेकदा सांप्रदायिक रंग दिला जातो. यामुळे देशाचीही बदनामी होते."

अमेरिकेचे तीन सोशल मीडिया प्लॅटफॉर्म भारतात किती शक्तिशाली बनले आहेत हे न्यायव्यवस्थेलाही समजत आहे. कदाचित म्हणूनच आज सरन्यायाधीशांना असे म्हणावे लागले, "हे प्लॅटफॉर्म फक्त शक्तिशाली लोकांचे ऐकतात. जेव्हा ट्विटर, फेसबुक आणि यूट्यूबला एखाद्या प्रकरणात उत्तर विचारले जाते, तेव्हा ते जबाबदारीपासून दूर जातात."

अशा माध्यमांवर कारवाई करण्यासाठी काही यंत्रणा आहे का? असे न्यायालयाने केंद्र सरकारला विचारले. तुमच्याकडे इलेक्ट्रॉनिक मीडिया आणि वर्तमानपत्रांसाठी व्यवस्था आहे पण वेब पोर्टलसाठीही काहीतरी केले पाहिजे. सरन्यायाधीश एन व्ही रमनाने केंद्र सरकारला विचारले की सामाजिक आणि डिजीटल माध्यमांवर लक्ष ठेवण्यासाठी आयोग स्थापन करण्याच्या आश्वासनाचे काय झाले? यापूर्वी न्यायालयाने या प्रकरणात इलेक्ट्रॉनिक माध्यमांद्वारे बनावट बातम्यांचा प्रसार नियंत्रित करण्यासाठी एक यंत्रणा बनवावी असे सरकारला सांगितले आहे.

यावर, सॉलिसिटर जनरल तुषार मेहता यांनी सांगितले की 'माहिती तंत्रज्ञान नियम, 2021' केवळ वेब आणि सोशल मीडियावरील नियंत्रण ठेवण्यासाठी करण्यात आला आहे. परंतु, त्याच्या तरतुदींना विविध माध्यमांच्या संस्थांनी विविध उच्च न्यायालयांमध्ये आव्हान दिले आहे. काही प्रकरणांमध्ये उच्च न्यायालयाने प्रसारमाध्यमांविरोधातील कारवाईलाही स्थगिती दिली आहे. मेहता म्हणाले की, केंद्र सरकारने सर्वोच्च न्यायालयात सर्व प्रकरणांची एकाचवेळी सुनावणीसाठी अर्ज केला आहे. न्यायालयाने त्याची लवकर सुनावणी करावी.