South Africa last 4 T20 World Cups : 'चोकर्स' दक्षिण आफ्रिका! पुन्हा चॅम्पियन होण्याचे स्वप्न भंगले; 24 महिन्यांत हरले 4 वर्ल्ड कप फायनल

गेल्या 2 वर्षात दक्षिण आफ्रिकेने जितके अंतिम सामने गमावले आहेत तितके क्वचितच कोणत्याही संघाने गमावले आहेत. म्हणूनच या संघाला चोकर्स म्हणून ओळखले जाते

Womens U-19 T20 World Cup Final India beat SA

Source : ABP

South Africa last 4 T20 World Cups : दक्षिण आफ्रिका हा क्रिकेटमधील सर्वात दुर्दैवी संघ आहे. गेल्या 2 वर्षात दक्षिण आफ्रिकेने जितके अंतिम सामने गमावले आहेत तितके क्वचितच कोणत्याही संघाने गमावले नाहीत. म्हणूनच या संघाला चोकर्स म्हणून ओळखले जाते. गेल्या काही वर्षांत, असे अनेक वेळा घडले आहेत जेव्हा दक्षिण आफ्रिकेला चोकर्सचा डाग पुसून टाकण्याची उत्तम संधी होती. परंतु, नशिबाने साथ दिली नाही आणि अंतिम सामन्यात पराभवांची मालिका आजही सुरू आहे. 

दक्षिण आफ्रिकेला पुन्हा एकदा अंतिम सामन्यात पराभवाचा सामना करावा लागला आहे. मलेशियात खेळल्या गेलेल्या आयसीसी अंडर 19 महिला टी-20 वर्ल्ड कपच्या अंतिम सामन्यात दक्षिण आफ्रिकेचा संघ पराभूत झाला आहे. अंतिम सामन्यात टीम इंडियाने दक्षिण आफ्रिकेचा 9 विकेट्सने पराभव केला. अशाप्रकारे, टीम इंडियाने सलग दुसऱ्यांदा अंडर 19 महिला टी-20 वर्ल्ड कप जिंकला.

'चोकर्स चा डाग कधी पुसणार दक्षिण आफ्रिका?

अंतिम सामन्यात दक्षिण आफ्रिकेने नाणेफेक जिंकून प्रथम फलंदाजी करण्याचा निर्णय घेतला. प्रथम फलंदाजी करणाऱ्या दक्षिण आफ्रिकेला त्यांच्या जुन्या इतिहासाची पुनरावृत्ती करताना अंतिम सामन्यातील दबाव सहन करता आला नाही आणि त्यांचा डाव केवळ 82 धावांवर ऑलआऊट झाला. प्रत्युत्तरात, टीम इंडियाने 83 धावांचे लक्ष्य केवळ 11.2 षटकांत 1 विकेट गमावून पूर्ण केले.

अशाप्रकारे दक्षिण आफ्रिकेच्या संघाने पुन्हा एकदा सिद्ध केले की, त्यांना चोकर्स का म्हणतात. टी-20 वर्ल्ड कपच्या अंतिम फेरीत आफ्रिकन संघाचा पराभव होण्याची ही पहिलीच वेळ नाही. तुम्हाला हे जाणून आश्चर्य वाटेल की, दक्षिण आफ्रिकेने गेल्या 1 वर्षात खेळल्या गेलेल्या 4 टी-20 वर्ल्ड कपच्या अंतिम फेरीत प्रवेश केला आहे पण एकदाही विजेतेपद जिंकू शकले नाही.

2023 च्या महिला टी-20 वर्ल्ड कपच्या अंतिम सामन्यात दक्षिण आफ्रिकेला ऑस्ट्रेलियाकडून दारुण पराभव पत्करावा लागला. यानंतर, 2024 मध्ये खेळल्या गेलेल्या पुरुषांच्या टी-20 वर्ल्ड कपच्या अंतिम फेरीतही दक्षिण आफ्रिकेला जेतेपद जिंकता आले नाही. अंतिम सामन्यात टीम इंडियाकडून त्याच्या संघाचा पराभव झाला. यानंतर, 2024 च्या महिला टी-20 वर्ल्ड कपच्या अंतिम फेरीत दक्षिण आफ्रिकेला पुन्हा एकदा पराभवाचा सामना करावा लागला. यावेळी आफ्रिकन संघाचा न्यूझीलंडकडून पराभव झाला. आणि आता दक्षिण आफ्रिकेला आयसीसी अंडर 19 महिला वर्ल्ड कप 2024 च्या अंतिम फेरीत पराभव पत्करावा लागला आहे. म्हणजेच, गेल्या 2 वर्षात, दक्षिण आफ्रिकेने वेगवेगळ्या टी-20 वर्ल्ड कपच्या एकूण 4 अंतिम सामन्यात पराभव पत्करला आहे, जे खूपच आश्चर्यकारक आहे.

गेल्या 4 टी-20 वर्ल्ड कपमध्ये दक्षिण आफ्रिकेची कामगिरी

• 2023 महिला टी-20 वर्ल्ड कप - अंतिम फेरीत पराभव.
• 2024 पुरुषांचा टी-20 वर्ल्ड कप - अंतिम फेरीत पराभव.
• 2024 महिला टी-20 वर्ल्ड कप - अंतिम फेरीत पराभव.
• 2025 महिला 19 वर्षांखालील टी-20 वर्ल्ड कप - अंतिम फेरीत पराभव.