गुड न्यूज, मुख्यमंत्री युवा कार्य प्रशिक्षण योजनेचा कालावधी 11 महिने, नवा जीआर प्रसिद्ध, एक लाख युवकांना फायदा
मुख्यमंत्री युवा कार्य प्रशिक्षण योजनेचा कालावधी 11 महिने करण्यासंदर्भातील नवा जीआर प्रसिद्ध झाला आहे. याचा एक लाख युवकांना फायदा होणार आहे.
मुंबई : राज्यातील मुख्यमंत्री युवा प्रशिक्षणार्थींना पाच महिन्याची सरकारने मुदतवाढ दिली आहे. आता मुख्यमंत्री युवा कार्य प्रशिक्षण योजनेतील युवकांना एकूण 11 महिन्यांच्या कालावधीसाठी प्रशिक्षण घेता येईल. सध्या जे 1 लाख 10 हजार प्रशिक्षणार्थी ज्या पदावर कार्यरत आहेत. त्यांना पाच महिन्यांची मुदत वाढ देण्यात येणार असल्याचे मुख्यमंत्री देवेंद्र फडणवीस यांनी सभागृहात जाहीर केलं होतं. त्यानंतर या योजनेसंदर्भातील नवा जीआर प्रसिद्ध करण्यात आला आहे. त्यामध्ये यापुढील कालावधीसाठी मुदतवाढ दिली जाणार नाही असं स्पष्ट करण्यात आलं आहे. ज्यांचं सहा महिन्यांचं कार्य प्रशिक्षण पूर्ण झालंय त्यांना आणखी 5 महिने प्रशिक्षण घेता येईल. मुख्यमंत्री युवा कार्य प्रशिक्षणार्थींच्या गेल्या काही दिवसापासून सुरू असलेल्या लढ्याला यश मिळाल्याचं पाहायला मिळालं..
कौशल्य, रोजगार, उद्योजकता व नाविन्यता विभागाच्या 10 मार्चच्या जीआरमध्ये काय म्हटलं?
मुख्यमंत्री युवा कार्यप्रशिक्षण योजनेंतर्गत कार्यप्रशिक्षणाचा कालावधी 11 महिने करण्यास याद्वारे मान्यता देण्यात येत आहे. प्रस्तुत योजनेंतर्गत सद्यस्थितीत जे उमेदवार कार्यप्रशिक्षण घेत आहेत, त्यांचा कार्यप्रशिक्षण कालावधी ते रुजू झाल्याच्या दिनांकापासून 11 महिने असा असेल. तसेच, ज्या उमेदवारांचा 6 महिन्यांचा प्रशिक्षण कालावधी यापूर्वीच पूर्ण झाला आहे, अशा उमेदवारांना पुढील 5 महिन्याच्या प्रशिक्षणासाठी संबंधित आस्थापनेत रुजू होता येईल. उमेदवारांना संबंधित आस्थापनेत पुन्हा रुजू झाल्याच्या दिनांकापासून 5 महिन्याच्या कालावधीसाठी कार्यप्रशिक्षण अनुज्ञेय असेल.
आस्थापनेत नवीन प्रशिक्षणार्थी रुजू झाल्याने पूर्वीच्या प्रशिक्षणार्थ्यासाठी संबंधित आस्थापनेत जागा उपलब्ध नसल्यास संबंधित सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र यांनी सदर प्रशिक्षणार्थ्यास इतर आस्थापनेत उर्वरित ५ महिन्याच्या कालावधीसाठी कार्यप्रशिक्षणाची संधी उपलब्ध करुन द्यावी. तसेच, अशा प्रशिक्षणार्थ्यास इतर आस्थापनेत कार्यप्रशिक्षणाची संधी उपलब्ध करुन देण्यास कोणत्याही प्रकारची अडचण उद्भवल्यास सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र यांनी आपल्या स्तरावरुन निर्णय घ्यावा.
आजच्या शासन निर्णयात काय?
सदर प्रशिक्षण कालावधीमध्ये यापुढे वाढ करण्यात येणार नाही.या योजनेंतर्गत आस्थापना/उद्योग/महामंडळामार्फत विना अनुभवी रोजगार इच्छुक पात्र उमेदवारांना संबंधित क्षेत्रातील प्रत्यक्ष कार्यप्रशिक्षण देण्यात येत आहे. तथापि, प्रशिक्षणाअंती प्रशिक्षणार्थ्यास संबंधित आस्थापनेत कायमस्वरुपी नोकरीचा हक्क राहणार नाही.
दरम्यान, मुख्यमंत्री युवा प्रशिक्षण योजनेअंतर्गत घेण्यात आलेल्या प्रशिक्षणार्थींना मुदतवाढ देण्यात यावी, या मागणीसाठी या योजनेतील प्रशिक्षणार्थी यापूर्वी आक्रमक झाले होते.
इतर बातम्या :
महत्त्वाच्या बातम्या
