सिद्धिविनायक मंदिरात शॉर्ट्स, स्कर्टला विरोध म्हणजे महिलांवर अन्याय, सदावर्तेंच्या मुलीची राष्ट्रीय महिला आयोगात तक्रार

Zen Sadavarte on Siddhivinayak temple Dress Code : सिद्धिविनायक मंदिरात महिलांना लागू करण्यात आलेल्या ड्रेसकोड विरोधात सदावर्तेंच्या मुलीची महिला आयोगाकडे तक्रार

Photo Credit - abp majha reporter

Source : ABPLIVE AI

Zen Sadavarte on Siddhivinayak temple Dress Code : वकील गुणरत्न सदावर्ते यांची कन्या झेन सदावर्ते हिने  मुंबईतील सिद्धिविनायक मंदिर प्रशासनाची राष्ट्रीय महिला आयोगात तक्रार केली आहे. "महिलांनी स्कर्ट, शॉर्ट्स घालून सिद्धिविनायक मंदिरात येऊ नये, असे म्हणणे महिलांसोबत अन्याय आहे. संविधानाच्या तरतुदींची पायमल्ली आहे", असं झेन सदावर्ते हिने तक्रारीत नमूद केलं आहे. 

झेन सदावर्ते तक्रारीत काय काय म्हणाली?

मी झेन सदावर्ते 12 वीत शिकत असून नॅशनल ब्रेवरी अवार्डची विजेती आहे. सिद्धिविनायक मंदिरात महिलांसाठी ड्रेस कोड लागू करण्यात आलाय. भक्तांवर लादण्यात आलेला हा ड्रेस कोड सामाजिकदृष्ट्या चुकीचा आणि भेदभाव करणारा आहे, असं माझं मत आहे. सिद्धिविनायक मंदिरात लागू करण्यात आलेला ड्रेस कोड मुलभूत अधिकारांचे उल्लंघन करणारा आहे. शिवाय, भारतासारख्या सांस्कृतिकदृष्ट्या वैविध्यपूर्ण आणि लोकशाही असलेल्या देशात सर्व नागरिकांना त्यांच्या श्रद्धांचे पालन करण्याची परवानगी असणे, आवश्यक आहे. कपडे घालण्यावरुन सार्वजनिक, धार्मिक ठिकाणी भेदभाव करणे चुकीचे आहे.  भक्तांनी त्यांच्या अभिव्यक्तीवर मर्यादा का घालाव्यात?श्रद्धेचा गाभा भक्तीमध्ये आहे, परिधान केलेल्या कपड्यात नाही. मी नम्रपणे विनंती करते की, ड्रेस कोडच्या नियमांचा पुन्हा एकदा विचार करण्यात यावा. मंदिर प्रशासनाने भेदभाव करणाऱ्या या नियमांबाबत सुधारणा केली पाहिजे. 

सिद्धिविनायक मंदिरात कोणते नियम लागू करण्यात आले होते? 

सिद्धिविनायक मंदिरातील प्रशासनाने दर्शनासाठी येणाऱ्या भक्तांसाठी ड्रेस कोड लागू केला होता. मंदिरा प्रशासनाच्या मते, शॉर्ट कपडे, फाटलेले कपडे घालून येणाऱ्या भक्तांसाठी सिद्धिविनायकाचे दर्शन घेण्यास परवानगी मिळणार नाही. भारतीय संस्कृतीत वेशभूषेला विशेष महत्त्व आहे. मंदिरात उचित कपडे घालून येणे, हे आपल्या भारतीयांची सभ्यता दर्शवणारे असते. त्यामुळे कोणत्याही मंदिरात दर्शनासाठी जाताना सांस्कृतिक कपडे परिधान करायला हवेत. 

गणेश जयंतीच्या निमित्ताने सिद्धिविनायक गणेश मंदिरात ड्रेस कोड लागू होणार आहे. तोकडे कपडे घालून येणाऱ्या भक्तांना मंदिरात जाऊन दर्शन घेता येणार नाहीये, याबाबतचा निर्णय मंदिर प्रशासनाने घेतला आहे. त्यामुळे दर्शनासाठी येणाऱ्या भक्तांना नियमांचे पालन करावे लागणार आहे. 

Siddhivinayak Temple Dresscode Rules : सिद्धिविनायक मंदिरात 1 फेब्रुवारीपासून ड्रेसकोड लागू होणार 

 

इतर महत्त्वाच्या बातम्या