IND vs ENG 4th T20I : भारत-इंग्लंड चौथ्या टी-20 मॅचवर जीबीएसचे सावट; पुण्यातील एमसीएचे मैदानावर कोणती खबरदारी घेतली जात आहे?
IND vs ENG 4th T20I : जीबीएस ही एक दुर्मीळ परंतु उपचार करण्यायोग्य न्यूरोलॉजिकल स्थिती आहे, ज्यामध्ये रोगप्रतिकारक शक्ती कमी होते आणि मज्जातंतूंवर हल्ला होतो.
IND vs ENG 4th T20I : पुण्यात होणाऱ्या भारत विरुद्ध इंग्लंड टी-20 इंटरनॅशनल मॅचवर जीबीएसचे सावट आहे. या मॅचला परदेशातूनही हजारो प्रेक्षक येणार आहेत. त्यामुळे जीबीएसचा प्रादुर्भाव वाढणार नाही, या अनुषंगाने राज्य सरकारने योग्य ती खबरदारी घेण्याच्या सूचना दिल्या आहेत. त्या पार्श्वभूमीवर महाराष्ट्र क्रिकेट असोसिएशन मैदानावर उपाययोजना राबवत आहे.
एमसीएचे जॉईंट सेक्रेटरी संतोष बोबडे काय म्हणाले?
एमसीएचे जॉईंट सेक्रेटरी संतोष बोबडे यांनी सांगितले की, पिण्याचं पाणी तीनवेळा फिल्टर करुन घेतलं जाणार आहे. लॉनसाठी आणि वापरासाठी सुद्धा शुद्ध पाणी वापरलं जाणार आहे. जेणेकरून प्रेक्षकांना जीबीएसचा धोका उद्भवणार नाही, याची काळजी घेतली जाईल, असे त्यांनी सांगितले. दुसरीकडे, पुणे शहरात जीबीएस बाधितांची संख्या वाढतच असल्याने रुग्णसंख्या शंभरीच्या पार गेली आहे. आज केंद्रीय आरोग्य मंत्रालयाचे पथक पुण्यात दाखल झाले. मात्र, नांदेड भागातपाण्याची तपासणी न करताच पथक परत गेल्याने नागरिकांनी घेराव घालत आक्रोश केला. या आजाराचा आणि पाणीप्रदूषणाचा संबंध असल्याचे बोलले जात आहे. नांदेडकरांनी आरोग्य पथकाकडे विहिरीच्या पाण्याची तपासणी करण्याची मागणी केली. मात्र, कोणतीही तपासणी न करता पथक निघून गेल्याने ग्रामस्थांनी आक्रमक पवित्रा घेत घेराव घातला.
जीबीएस म्हणजे काय? त्याची लक्षणे कोणती?
जीबीएस ही एक दुर्मीळ परंतु उपचार करण्यायोग्य न्यूरोलॉजिकल स्थिती आहे, ज्यामध्ये रोगप्रतिकारक शक्ती कमी होते आणि मज्जातंतूंवर हल्ला होतो. ज्यामुळे मान, चेहरा आणि डोळ्यांमध्ये अशक्तपणा येणे, मुंग्या येणे किंवा सुन्न होणे, गंभीर प्रकरणांमध्ये चालायला त्रास होणे, अन्न पदार्थ गिळता न येणे किंवा श्वास घेण्यास त्रास होणे, अशी लक्षणे प्रामुख्याने जीबीएसमध्ये दिसतात.
तिसऱ्या टी-20 मध्ये इंग्लंडचा विजय
दुसरीकडे, भारतीय क्रिकेट संघ मंगळवारी इंग्लंडविरुद्धच्या तिसऱ्या टी-20 सामन्यात 26 धावांनी पराभूत झाला. राजकोटमध्ये खेळल्या गेलेल्या सामन्यात टीम इंडियाला इंग्लंडकडून 172 धावांचे लक्ष्य मिळाले होते, परंतु भारतीय फलंदाज 20 षटकात 9 विकेट गमावत 145 धावाच करू शकले. भारताने 8 षटकांत 68 धावांत 4 विकेट गमावल्या होत्या. येथून धावगती अत्यंत संथ झाली, पुढील 6 षटकांत संघाला केवळ 22 धावा करता आल्या, जे पराभवाचे सर्वात मोठे कारण ठरले. हार्दिक पांड्याने 35 चेंडूत 40 धावा, वॉशिंग्टन सुंदरने 15 चेंडूत 6 धावा आणि अक्षर पटेलने 16 चेंडूत 15 धावा केल्या. इंग्लिश सलामीवीर बेन डकेटने (51 धावा) अर्धशतक केले. तिसरी टी-20 जिंकून इंग्लंडने मालिका वाचवली आहे. भारत अजूनही 2-1 ने पुढे आहे. चौथा सामना 31 जानेवारीला पुण्यात होणार आहे.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
