Baba Siddique Murder case : बाबा सिद्दीकींच्या डायरीत अदानींसह 7 बड्या बिल्डर्सचा उल्लेख, कोणाकोणाचा समावेश?

माजी आमदार बाबा सिद्दीकींच्या खून प्रकरणाचं गूढ वाढतच चाललं आहे. पोलिसांना दिलेल्या जबाबात त्यांच्या मुलाने मुंबईतील एका नेत्यासह 7 बिल्डर्सचा उल्लेख केला आहे, याशिवाय एका डायरीबद्दलही सांगितलं आहे.

Baba Siddique Murder case builders

महाराष्ट्राचे माजी आमदार बाबा सिद्दीकी हत्या प्रकरणात नवा खुलासा समोर आला आहे. बाबा सिद्दीकी यांचा मुलगा झीशान सिद्दीकी याने मुंबई पोलिसांना दिलेल्या जबाबात एक डायरी उघड केली आहे.

बाबा सिद्दीकींना रोज डायरी लिहिण्याची सवय होती आणि आता ही डायरी त्यांचा मुलगा झिशान यांने पोलिसांसमोर आणली आहे. या डायरीत बड्या नेत्यांची आणि बिल्डर्सची नावं आहेत.

झिशान सिद्दीकी यांनी पोलिसांना दिलेल्या जबाबात सातत्याने बाबा सिद्दीकी यांच्या डायरीचा उल्लेख केला आहे. यानुसार वांद्रेतील पुर्नविकास प्रकल्पात नागरिकांची बाजू घेतल्यामुळे बाबा सिद्गीकी यांचा बड्या बिल्डर लॉबीशी वाद झाला होता.

बाबा सिद्दीकी यांच्या डायरीत बिल्डर पृथ्वी चव्हाण, शाहिद बलवा, शिवालिक व्हेंचर्स, अदानी, नबील पटेल, विनोद गोएंका आणि ओंकार बिल्डर्स यांचा उल्लेख आहे.

त्यामुळे आता या सगळ्या बिल्डर्सचा बाबा सिद्दीकी यांच्या हत्येशी काही संबंध आहे का, अशी शंका निर्माण झाली आहे.

झीशानने आपल्या वक्तव्यात कुठेही बिश्नोई टोळीचा उल्लेख केलेला नाही. आपल्या वडिलांच्या हत्येमागे राजकीय नेते आणि बिल्डर्सचा हात असल्याचं झिशान सिद्दीकींनी स्पष्ट केलं.

शिवाय, झीशानने दावा केला की त्याच्या वडिलांचे अनेक बिल्डर्सशी संपर्क होते, जे पुनर्विकास प्रकल्पांमध्ये अडकले होते.

झीशानने सांगितलं की, एसआरए पुनर्विकास प्रकल्पाबाबत झालेल्या बैठकीत एका बिल्डरने त्याच्या वडिलांना शिवीगाळ केली होती.

झिशान सिद्दीकींनी आरोपपत्रात भाजप नेते मोहित कंबोज यांच्या नावाचाही उल्लेख केला आहे.

या प्रकरणी राष्ट्रवादीचे नेते झीशान यांनी पोलिसांना या सर्व प्रकरणाची सखोल चौकशी करण्याची विनंती केली.