सहा जिल्ह्यात झेडपीच्या 85 तर पंचायत समितीच्या 144 जागांसाठी मतदान प्रक्रिया पूर्ण, काय आहेत सत्तेची गणितं?
राज्यात सहा जिल्ह्यात झेडपीच्या 85 तर पंचायत समितीच्या 144 जागांसाठी पोटनिवडणुकीसाठी मतदान प्रक्रिया पूर्ण झाली आहे.
Maharashtra ZP Panchayat Samiti By-elections : राज्यात जिल्हा परिषद आणि पंचायत समितीच्या पोट निवडणुकीची रणधुमाळी सुरु आहे. आज झेडपीच्या 85 जागांसाठी आणि पंचायत समितीच्या 144 जागांसाठी पोटनिवडणुका होणार आहेत. आजच्या निवडणुकीसाठी काही ठिकाणी उत्साह तर काही ठिकाणी मतदान केंद्रांवर शुकशुकाट पहायला मिळाला. दरम्यान, किरकोळ घटना वगळता सर्व जिल्ह्यात शांततेत मतदान प्रक्रिया पार पडली.
कोरोनासंकट आणि ओबीसींचं राजकीय आरक्षण रद्द झाल्यामुळे लांबणीवर पडलेल्या महाराष्ट्रातील 6 जिल्हा परिषदांच्या पोटनिवडणुकीसाठी आज मतदान झाले. धुळे, नंदुरबार, अकोला, वाशिम, पालघर आणि नागपूर जिल्हा परिषदा आणि त्या अंतर्गतच्या पंचायत समित्यांच्या पोटनिवडणुका होणार पार पडल्या. आज सकाळी 7.30 वाजता मतदानाला सुरूवात झाली. संध्याकाळी 5.30 वाजेपर्यंत सर्व ठिकाणी मतदानाची प्रक्रिया पार पाडली गेली आहे.
नागपूर जिल्हा परिषदेच्या 16 मतदारसंघासाठी तर पंचायत समितीच्या 31 मतदारसंघासाठी आज पोटनिवडणूक
नागपूर जिल्हा परिषदेच्या 16 मतदारसंघासाठी तर पंचायत समितीच्या 31 मतदारसंघासाठी आज पोटनिवडणूक झाली. जिल्ह्यातील ग्रामीण भागात विखुरलेल्या 1 हजार 115 मतदान केंद्रांवर मतदारांनी मतदानाचा हक्क बजावून आपला कौल दिला आहे. नागपूर जिल्हा परिषदेच्या 16 जागी होत असलेल्या पोटनिवडणुकीमध्ये काँग्रेस आणि राष्ट्रवादी काँग्रेस आघाडी केली असली, तरी शिवसेनेने वेगळी चूल मांडत अकरा ठिकाणी उमेदवार उभे केल्याने बहुतांशी मतदारसंघात काँग्रेस-राष्ट्रवादी, भाजप आणि शिवसेना अशी तिरंगी लढत होत आहे. काही ठिकाणी दमदार बंडखोरांनी निवडणूक बहुरंगीही बनवली आहे.
नागपूर जिल्हा परिषदेमध्ये काँग्रेसची एक हाती सत्ता होती. मात्र, ओबीसी आरक्षणाच्या मुद्द्यावरून काँग्रेसच्या अनेक सदस्यांचे सदस्यत्व रद्द झाल्यानंतर या पोटनिवडणुकीमध्ये जास्तीत जास्त जागा जिंकून आपले बहुमत पुन्हा साध्य करण्याचे आव्हान काँग्रेससमोर आहे. तर सार्वत्रिक निवडणुकीमध्ये दुसऱ्या क्रमांकावर असलेल्या भाजपसमोर या निवडणुकीत जास्तीत जास्त जागा जिंकून आपली सदस्य संख्या वाढवण्याचे आव्हान आहे.
धुळे..
धुळे जिल्हा परिषदेच्या 14 गट आणि 28 जागांसाठी पोटनिवडणूक पार पडली. कोरोनाच्या पार्श्वभूमीवर सर्वतोपरी काळजी घेऊन नियोजन करण्यात आले होते. धुळे जिल्हा परिषदेच्या 14 गटांसाठी 42 तर 28 गणांसाठी 72 उमेदवार निवडणुकीच्या रिंगणात आहेत.
पालघर जिल्हा परिषद आणि पंचायत समिती पोट निवडणूक
पालघर जिल्हा परिषदेच्या 15 तर पंचायत समित्यांच्या 14 जागांसाठी मतदारांनी आपला कौल आज दिला. ओबीसी आरक्षण रद्द झाल्याने या जागा रद्द झाल्या असून याचा सर्वाधिक फटका राष्ट्रवादीला बसलेला पाहायला मिळाला. राष्ट्रवादीच्या 15 पैकी 7 जागा रद्द झाल्या असून शिवसेना 3, भाजप 4 तर माकपची एक जागा रद्द झाली होती. जिल्हा परिषदेत सध्या महाविकास आघाडी सत्तेत असून शिवसेनेकडे अध्यक्ष तर राष्ट्रवादीकडे उपाध्यक्ष पद आहे. जिल्हा परिषदेत एकूण 57 जागा असून बहुमतासाठी 29 जागांची गरज आहे. या पोटनिवडणुकीत कोणत्याही राजकीय पक्षाच्या जागा कमी जास्त झाल्या तरी जिल्हा परिषदेतील सत्तेत फरक पडणार नसला तरी महाविकास आघाडीत फूट पडल्यास येथे सत्ता बदलण्याची शक्यता निर्माण झाली आहे.
मागे झालेल्या सार्वत्रिक निवडणुकीत शिवसेनेकडे 18, राष्ट्रवादी काँग्रेस 15, भाजप 10, मार्क्सवादी कम्युनिस्ट पक्ष 6, बहुजन विकास आघाडी 4 अपक्ष 3 तर काँग्रेसला एका जागेवर विजय मिळवण्यात यश आलं होतं. मात्र, सध्याच्या पोटनिवडणुकीत बहुतांशी जागांवर सेना, भाजप आणि राष्ट्रवादी अशी तिरंगी लढत पाहायला मिळणार आहे. या पोटनिवडणुकीत प्रतिष्ठा पणाला लागली आहे ती शिवसेनेचे खासदार राजेंद्र गावित यांची! खासदारांच्या हट्टापायी जिल्हा परिषदेच्या डहाणू तालुक्यातील वणई गटाचा शिवसेनेचा सिटिंग उमेदवार डावलून खासदार राजेंद्र गावित यांचे चिरंजीव रोहित गावित यांना उमेदवारी दिली आहे. त्यामुळे या गटातील शिवसैनिकांमध्ये नाराजीचा सुर आहे. तर भापज, सेना, राष्ट्रवादी, काँग्रेस अशी अटीतटीची लढत पाहायला मिळणार आहे जर का खासदार गावित यांच्या चिरंजीवाला येथे चुकून पराभव स्वीकारावा लागला तर त्याचे परिणाम थेट खासदार गावित यांच्या पुढील कारकीर्दीवर होण्याची शक्यता नाकारता येत नाही.
वाशिम
वाशिम जिल्हा परिषदेच्या 14 व पंचायत समितीच्या 27 गणांसाठी पोटनिवडणूक पार पडली. वाशिम जिल्हा परिषदेचे 52 गट आणि जिल्ह्यातील सहा पंचायत समित्यांच्या 104 गणांसाठी 7 जानेवारी 2020 रोजी निवडणूक झाली होती. ओबीसी प्रवर्गातील सदस्यांची पदे रद्द झाल्याने सर्वोच्च न्यायालयाच्या निर्णयानुसार जिल्हा परिषदेचे 14 गट आणि पंचायत समित्यांच्या 27 जागेसाठी 5 ऑक्टोंबर रोजी पोटनिवडणूक होत आहे. जि.प.च्या 14 गटांसाठी 82 तर पंचायत समितीच्या 27 गणांत एकूण 135 उमेदवारांमध्ये चुरशीच्या लढती होत आहेत.
अकोला जिल्हा परिषद आणि पंचायत समिती पोटनिवडणूक
अकोला जिल्हा परिषद आणि पंचायत समिती पोटनिवडणुकीसाठी आज मतदान पार पडलं. अकोला जिल्हा परिषदेच्या 14 आणि पंचायत समितीच्या 28 जागांसाठी ही पोटनिवडणूक झाली. उद्या 6 ऑक्टोबरला मतमोजणी होणार आहे. अकोला जिल्ह्यातील सात तालुक्यांत जिल्हा परिषदेच्या 14 जागांसाठी मतदान झालं तर पंचायत समितीच्या 28 जागांसाठी मतदारांनी कौल दिला. अकोला जिल्हा परिषदेवर सध्या वंचित बहुजन आघाडीची सत्ता आहे. अपात्र 14 पैकी 8 सदस्य वंचितचे आहेत. अकोला जिल्हा परिषद पोटनिवडणुकीसाठी वंचित, भाजप, प्रहार आणि काँग्रेस स्वबळावर लढत दिली. तर शिवसेना-राष्ट्रवादी आघाडी करून लढली. जिल्हा परिषदसाठी 68 तर पंचायत समितीसाठी 119 उमेदवार निवडणूक रिंगणात होते.
पालघर
किती तालुक्यात : 7/8
मतमोजणी किती ठिकाणी आहे : 7
पालघर डहाणू तलासरी विक्रमगड वाडा वसई आणि मोखाडा
धुळे
किती तालुक्यात : 4/6
मतमोजणी किती ठिकाणी आहे : 4
धुळे, साक्री, शिरपूर, सिंदखेडा
नंदुरबार
किती तालुक्यात : 3/6
मतमोजणी किती ठिकाणी आहे : 3
नंदुरबार, शहादा , अक्कलकुवा
अकोला
किती तालुक्यात : 7/7
मतमोजणी किती ठिकाणी आहे : 7
अकोला, बार्शीटाकळी, मुर्तिजापूर , अकोट, तेल्हारा, बाळापूर , पातूर
वाशिम
किती तालुक्यात : 6/6
मतमोजणी किती ठिकाणी आहे : 6
वाशिम, रिसोड, मालेगाव, मंगरूळपिर, कारंजा, मानोरा
नागपूर
किती तालुक्यात : 10/14
मतमोजणी किती ठिकाणी आहे : 10
नागपूर, परशिवनी, रामटेक, सावनेर, हिंगणा, मौदा, कुही, काटोल, नरखेड, कामठी
महत्त्वाच्या बातम्या
ट्रेंडिंग न्यूज
