एक्स्प्लोर

Asian Para Games 2023 : आशियाई पॅरा खेळ स्पर्धेत भारतीय खेळाडूंची 'शंभर नंबरी' कामगिरी, एकूण 111 पदकांची कमाई

Asian Para Games 2023 : आशियाई पॅरा खेळ स्पर्धेत भारताने 'शंभर नंबरी' कामगिरी केली आहे. आशियाई पॅरा गेम्स 2023 मध्ये भारतीय खेळाडूंनी एकूण 111 पदकांची कमाई केली आहे.

By : एबीपी माझा स्पोर्ट्स डेस्क | Edited By: स्नेहल पावनाक | Updated at : 28 Oct 2023 12:49 PM (IST)

Asian Para Games 2023

Source : SAI/twitter

Asian Para Games 2023 : चीनमध्ये पार पडलेल्या आशियाई पॅरा खेळ 2023 (Asian Para Games 2023) स्पर्धेत भारतीय खेळाडूंनी शानदार कामगिरी केली आहे. एशियन पॅरा गेम्स स्पर्धेचा चौथा आणि शेवटचा दिवस भारतासाठी अविस्मरणीय ठरला आहे. भारतीय खेळाडूंनी या स्पर्धेत शंभर नंबरी कामगिरी केली आहे. आशियाई पॅरा गेम्स 2023 मध्ये भारतीय खेळाडूंनी एकूण 111 पदकांची कमाई केली आहे. यामध्ये 29 सुवर्णपदकं, 31 रौप्यपदकं आणि 51 कांस्यपदकांचा समावेश आहे.

आशियाई पॅरा खेळ स्पर्धेत भारताची ऐतिहासिक कामगिरी

भारताने स्पर्धेच्या चौथ्या आणि शेवटच्या दिवशी चार सुवर्णपदके, दोन रौप्यपदके आणि सहा कांस्य पदकांसह 12 पदके जिंकली. आशियाई पॅरा गेम्समध्ये भारताने पहिल्यांदाच 100 पदकांचा टप्पा गाठला आहे. ही भारताची आशियाई पॅरा गेम्समधील आतापर्यंतची सर्वोत्कृष्ट कामगिरी आहे. यापूर्वीची 2018 मध्ये भारताने 72 पदके जिंकली होती, ज्यामध्ये जेव्हा 15 सुवर्ण, 24 रौप्य आणि 33 कांस्य पदकांचा समावेश होता.

पॅराअ‍ॅथलिट्सची शंभर नंबरी कामगिरी

या उल्लेखनीय कामगिरीसह, भारतीय पॅरा-अ‍ॅथलीट्सने आशियाई क्रीडा स्पर्धेत सुदृढ शरीराच्या खेळाडूंच्या यशाला तोडीस तोड 100 पदकांचा टप्पा गाठला. आशियाई खेळ 2023 सर्प्धेत भारताने विक्रमी 107 पदके जिंकली आहे.

100 MEDALS at the Asian Para Games! A moment of unparalleled joy. This success is a result of the sheer talent, hard work, and determination of our athletes.

This remarkable milestone fills our hearts with immense pride. I extend my deepest appreciation and gratitude to our… pic.twitter.com/UYQD0F9veM
— Narendra Modi (@narendramodi) October 28, 2023

पंतप्रधान मोदींकडून खेळाडूंचं अभिनंदन

पंतप्रधान नरेंद्र मोदी यांनी आशियाई पॅरा गेम्स 2023 मधील भारतीय खेळाडूंच्या दमदार कामगिरीचं कौतुक करत त्यांना शुभेच्छा दिल्या आहे. पंतप्रधान मोदी यांनी एक्स मीडियावर पोस्ट करत म्हटलं आहे की, 'एशियन पॅरा गेम्समध्ये भारतीय खेळाडूंनी 100 हून अधिक पदकं जिंकण्याचा विक्र केला आहे, ही खूप मोठी आनंदाची बाब आहे. हे यश आपल्या खेळाडूंची प्रतिभा, कठोर परिश्रम आणि दृढनिश्चय याचाच परिणाम आहे. हा उल्लेखनीय मैलाचा दगड भारतीयांच्या अंतःकरणात अपार अभिमानाने भरलेला आहे. मी याबद्दल खेळाडूंचे मनापासून कौतुक आणि कृतज्ञता व्यक्त करतो.'