DA Hike News : केंद्रीय कर्मचाऱ्यांसाठी मोठी बातमी, महागाई भत्ता 2 टक्क्यांनी वाढला, 7 वर्षातील सर्वात कमी वाढ, पगार किती रुपयांनी वाढणार?
DA Hike News: पंतप्रधान नरेंद्र मोदी यांच्या अध्यक्षतेखाली झालेल्या बैठकीत केंद्रीय मंत्रिमंडळानं महागाई भत्ता वाढवण्याचा निर्णय घेतला. महागाई भत्ता 2 टक्क्यांनी वाढला आहे.
नवी दिल्ली : पंतप्रधान नरेंद्र मोदी यांच्या अध्यक्षतेखाली झालेल्या कॅबिनेट बैठकीत महागाई भत्ता वाढवण्यासंदर्भातील निर्णय घेण्यात आला आहे. केंद्र सरकारनं महागाई भत्ता 2 टक्क्यांनी वाढवला आहे. केंद्रीय मंत्री अश्विनी वैष्णव यांनी यासंदर्भातील घोषणा पत्रकार परिषद घेत केली आहे. त्यामुळं केंद्रीय कर्मचाऱ्यांना मिळणारा महागाई भत्ता 53 टक्क्यांवरुन 55 टक्क्यांवर पोहोचला आहे.
केंद्र सरकार महागाई भत्ता वाढीसंदर्भात घोषणा केली आहे. याचा फायदा केंद्राचे कर्मचारी अन् पेन्शनर्स मिळून 1 कोटी लोकांना फायदा होणार आहे. महागाई भत्ता 2 टक्क्यांनी वाढवणं ही गेल्या 7 वर्षातील सर्वात कमी वाढ ठरली आहे.
सरकारकडून दरवर्षी 1 जानेवारी आणि 1 जुलै रोजी महागाई भत्ता रिवाईज केला जातो. त्यानंतर याची घोषणा केली जाते. अपेक्षेप्रमाणं महागाई भत्ता 2 टक्के वाढला आहे. सध्या महागाई भत्ता 53 टक्के असून वाढून 55 टक्के झाला आहे.
कर्मचारी संघटनांकडून डीए 3 टक्क्यांनी वाढवण्याची मागणी करण्यात आली होती. मात्र, केंद्र सरकारनं डीए केवळ 2 टक्क्यांनी वाढवला आहे. ऑक्टोबर 2024 मध्ये महागाई भत्ता 3 टक्क्यांनी वाढवला होता. त्यामुळं तो 50 टक्क्यांवरुन 53 टक्क्यांपर्यंत पोहोचला.
महागाई भत्ता 2 टक्क्यांनी वाढला आहे. आता ज्याचं मूळ वेतन 18000 जार असेल त्यांच्या पगारात 360 रुपयांची वाढ होईल. 55 टक्क्यांच्या हिशोबानं महागाई भत्ता 9900 रुपये मिळेल. जर तीन टक्के वाढ झाली तर 56 टक्क्यांच्या हिशोबानं महागाई भत्ता 10080 रुपये मिळाला असता.
महागाई भत्ता ग्राहक मूल्य निर्देशांकांच्या (AICPI) च्या आधारावर निश्चित केला जातो. 2006 मध्ये सरकारनं महागाई भत्ता मोजण्यासाठी नवं पद्धत सुरु केली होती.
याशिवाय केंद्र सरकारचे कर्मचारी आठव्या वेतन आयोगाची प्रतीक्षा देखील करत आहेत. केंद्रानं याबाबत जानेवारी 2025 मध्ये घोषणा केलेली. तो जानेवारी 2026 पासून लागू होणं अपेक्षित आहे.
केंद्रीय मंत्री अश्विनी वैष्णव म्हणाले की सरकारनं पंतप्रधान नरेंद्र मोदी यांच्या अध्यक्षतेखाली एक महत्त्वाचा निर्णय घेतला आहे. सरकारनं केंद्रीय कर्मचारी आणि पेन्शनर्सच्या महागाई भत्त्यात आणि डीआरमध्ये 2 टक्के वाढ केली आहे. ही वाढ 1 जानेवारी 2025 पासून लागू होईल.
या निर्णयाचा फायदा केंद्र सरकारच्या सेवेतील 48.66 लाख केंद्रीय कर्मचाऱ्यांना आणि 66.55 लाख पेन्शनधारकांना होणार आहे. यामुळं केंद्र सरकारवर वार्षिक 6614.04 कोटी रुपयांचा अतिरिक्त बोजा पडेल. डीए वाढवण्याचा निर्णय सातव्या वेतन आयोगाच्या शिफारशींनुसार करण्यात आला आहे. दरम्यान, केंद्र सरकारनं महागाई भत्ता वाढवण्याची घोषणा केल्यानंतर देशातील राज्य सरकारं त्यांच्या कर्मचाऱ्यांसाठी कोणता निर्णय घेतात ते पाहावं लागेल.
महत्त्वाच्या बातम्या
