Shirala Vidhan Sabha constituency : शिराळ्यात भाजपच्या सत्यजीत देशमुखांनी गुलाल उधळला, विधानसभेचं चित्र स्पष्ट
Shirala Vidhan Sabha constituency : लोकसभा निवडणुकीवेळी शिराळा मतदारसंघातून महाविकास आघाडीच्या उमेदवाराला मताधिक्य मिळालं होतं. विधानसभेला मात्र काट्याची लढत दिसून येतंय.
Shirala Vidhan Sabha constituency : शिराळा विधानसभा निवडणुकीचा निकाल जाहीर झाला असून त्यामध्येभाजपच्या सत्यजीत देशमुख यांनी राष्ट्रवादी शरद पवार गटाच्या मानसिंग नाईक यांचा 22,689 मतांनी पराभव केला. भाजपचे सत्यजीत देशमुख यांना 1,30,738 मतं मिळाली आहेत. तर राष्ट्रवादी शरद पवार गटाच्या मानसिंग नाईक यांना 1,08,049 मतं मिळाली.
जिल्ह्यातील शिराळा मतदारसंघात यंदा राजकीय गणितं बदलली असून राष्ट्रवादी शरद पवार गटाचे आमदार मानसिंगराव नाईक आणि भाजपचे सत्यजीत देशमुख अशी रंगतदार लढाई झाली. सम्राट महाडिक यांची बंडखोरी रोखण्यात भाजपला यश आल्याने सत्यजीत देशमुखांना विजय सोपा झाला.
2019 सालच्या निवडणुकीत काय झालं होतं?
2019 सालच्या निवडणुकीत राष्ट्रवादीचे मानसिंगराव नाईक विरुद्ध शिवाजीराव नाईक हे पारंपरिक विरोधक मैदानात होते. त्यावेळी सम्राट महाडिकांनी बंडखोरी केली होती. मानसिंगराव नाईक यांनी 1,01,933 मतं मिळवून विजयी गुलाल उधळला होता. तर विरोधी शिवाजीराव नाईक यांना 76,002 मतं मिळाली होती. तर अपक्ष म्हणून लढणाऱ्या सम्राट महाडिकांना 46 हजार मतं मिळाली होती.
शिराळा विधानसभा मतदारसंघातील आजची स्थिती
महाविकास आघाडीतून राष्ट्रवादी शरद पवार गटाचे आमदार मानसिंगराव नाईक यांना पुन्हा उमेदवारी दिली होती. तर महायुतीकडून भाजपने सत्यजीत देशमुखांना उमेदवारी दिली. या ठिकाणी भाजपच्या सम्राट महाडिकांनी बंडखोरी करत अपत्र अर्ज भरला होता. पण त्यांची बंडखोरी रोखण्यात देवेंद्र फडणवीसांना यश आलं. त्यामुळे या मतदारसंघात महायुती आणि महाविकास आघाडीमध्ये सरळ लढत झाली. सत्यजीत देशमुख हे महाराष्ट्राच्या विधान परिषदेचे माजी सभापती शिवाजीराव देशमुखांचे पुत्र आहेत. त्यामुळे त्यांचा या परिसरात मोठा जनसंपर्क आहे.
सांगलीतील शिराळा हा मतदारसंघ लोकसभेसाठी हातकणंगलेमध्ये येतो. या ठिकाणी महाविकास आघाडीला 9 हजारांचे मताधिक्य मिळालं होतं. त्याचा फायदा आता विधानसभेलाही होईल अशी आशा महाविकास आघाडीला आहे. शिराळा मतदारसंघामध्ये एकूण 3,05,208 मतदार आहेत. त्यापैकी 1,55,376 पुरूष मतदार तर 1,49,829 स्त्री मतदार आहेत.
शिराळा मतदारसंघात वाळवा तालुक्यातील 48 गावांचा समावेश होतो. या ठिकाणी राष्ट्रवादीच्या जयंत पाटलांची ताकद मोठी आहे. तसेच या ठिकाणी महाडिक गटाचीही ताकद लक्षणीय आहे.
ही बातमी वाचा:
महत्त्वाच्या बातम्या
ट्रेंडिंग न्यूज
