आमदाराकडून त्रास होत असल्याची चिठ्ठी, ग्रामसेवकाच्या पत्नीने प्यायलं औषध; पोलिसात तक्रार दाखल

नाशिक जिल्ह्यातील कळवण मतदारसंघाचे आमदार नितीन पवार व त्यांच्या पत्नी जयश्री पवार ह्या कोणत्या ना कोणत्या कारणाने खोट्या तक्रारी करून ग्रामसेवक असलेल्या पतीस त्रास देतात.

women drink poison with name of MLA

Source : abp

नाशिक : राजकीय नेत्यांकडून सांभाळण्यात आलेल्या कार्यकर्त्यांकडून धमकी देऊन गुन्हेगारी करण्यात येत असल्याचा मुद्दा सध्या बीडमुळे चांगलाच चर्चेत आहे. त्यामध्ये, धनंजय मुंडे यांच्यानंतर आमदार सुरेश धस यांचा कार्यकर्ता असलेल्या सतिश भोसले उर्फ खोक्याच्याही मुसक्या आता पोलिसांनी आवळल्या आहेत. मात्र, नाशिक (Nashik) जिल्ह्याच्या कळवण तालुक्यात चक्क आमदाराकडून धमकावण्यात येत असल्याने काँग्रेस पदाधिकारी महिलेनं विषारी औषध प्यायल्याचा धक्कादायक प्रकार उघडकीस आला आहे. याबाबत, औषध प्राशन केलेल्या महिलेच्या भावाने आमदार (MLA) नितीन पवार यांच्याविरुद्ध पोलिसात तक्रार देखील दाखल केली आहे. विशेष म्हणजे नुकतेच विधिमंडळ अधिवेशनात आमदार महोदयांनी ग्रामसेवकाविरुद्ध लक्षवेधी उपस्थित केली होती. त्या लक्षवेधीचा उल्लेखही संबंधित तक्रारदाराकडून करण्यात आला आहे. 

नाशिक जिल्ह्यातील कळवण सुरगाणा मतदारसंघाचे आमदार नितीन पवार व त्यांच्या पत्नी जयश्री पवार ह्या कोणत्या ना कोणत्या कारणाने खोट्या तक्रारी करून ग्रामसेवक असलेल्या पतीस त्रास देतात. म्हणून काँग्रेसच्या पदाधिकारी असलेल्या शीतल महाजन या महिलेने विषारी औषध सेवन करून आत्महत्या करण्याचा प्रयत्न केल्याची धक्कादायक घटना कळवण येथे घडली आहे.  आत्महत्येचा प्रयत्न करण्यापूर्वी या महिलेने तशी चिठ्ठी देखील लिहून ठेवल्याने जिल्ह्याच्या राजकीय वर्तुळात खळबळ उडाली आहे. आमदार नितीन पवार व जयश्री पवार यांच्या विरोधात काम केल्यामुळे शीतल महाजन यांच्या ग्रामसेवक पतीला खोट्या तक्रारी करून अटकविण्याचा प्रयत्न केला जात आहे. मात्र, अनेकवेळा चौकशी होऊनही तक्रारीत तथ्य आढळलेले नाही. तरीही, जाणीवपूर्वक त्रास सुरूच होता, असे महाजन यांनी चिठ्ठीत म्हटले आहे.  

दरम्यान, नुकतेच विधिमडळाच्या अधिवेशनात आमदार नितीन पवार यांनी विधानसभेत लक्षवेधी उपस्थित करत ग्रामसेवक रामराव महाजन यांच्यावर कारवाईची मागणी केली होती. आमदार महोदयांकडून जाणीवपूर्वक होत असलेल्या याच त्रासाला कंटाळून शीतल महाजन यांनी विषारी औषध घेऊन स्वतःला संपविण्याचा प्रयत्न केल्याचा आरोप शीतल महाजन यांचे बंधू योगेश गायकवाड यांनी केला आहे. योगेश गायकवाड यांनी यासंदर्भात तक्राीर अर्ज देखील अभोणा पोलिस स्थानकात दाखल केला आहे. मात्र, या घटनेनं जिल्ह्याच्या राजकारणात आणि कळवण तालुक्यात खळबळ उडाली आहे. आता, याबाबत आमदार नितीन पवार काय भूमिका मांडतात हे पाहणे महत्त्वाचे ठरणार आहे. 

हेही वाचा