एक्स्प्लोर

HMPV व्हायरसची हातपाय पसरण्यास सुरुवात; चीनमध्ये उगम झालेल्या महामारीचा सर्वाधिक धोका कोणत्या देशाला?

HMPV Virus: भारतात एचएमपीव्हीची व्हायरसची दोन जणांना लागण झाली आहे.

By : मुकेश चव्हाण | Updated at : 06 Jan 2025 01:24 PM (IST)

HMPV virus

Source : HMPV virus

HMPV Virus: जगभरात 2020 मध्ये थैमान घातलेल्या कोरोना महामारीनंतर चीन आणखी एका धोकादायक व्हायरसच्या विळख्यात सापडला आहे. ह्युमन मेटाप्युमोव्हायरस (HMPV) वेगाने पसरत आहे. ज्यामुळे रुग्णालयांमध्ये खूप गर्दी होत आहे आणि चीनमधील स्मशानभूमीत जागा नसल्याचं चित्र पाहायला मिळत आहे. तर एचएमपीव्ही व्हायरसने आता हातपाय पसरण्यास सुरुवात केली आहे. हा विषाणू किती धोकादायक आहे यावर संशोधन सुरू आहे. मात्र, तो जगासाठी मोठा धोका बनू शकतो. यामुळेच भारतासह अनेक देश अलर्ट मोडवर आले आहेत. भारतात एचएमपीव्हीची व्हायरसची दोन जणांना लागण झाली आहे.

चीननंतर या देशात आढळलेला पहिला कोरोना रुग्ण

चीनच्या वुहानमध्ये कोरोनाची प्रकरणे समोर आल्यानंतर थायलंड हा पहिला देश होता जिथे कोरोनाचा पहिला रुग्ण आढळला होता. त्यानंतर हा कोरोना व्हायरस इतर देशांमध्ये पोहोचला. जर HMPV व्हायरस देखील असाच पद्धतीने पसरल्यास दक्षिण कोरिया, जपान, रशिया आणि अमेरिका या देशांना सर्वाधिक धोका निर्माण होऊ शकतो. कारण या प्रमुख देशांमधील नागरिक मोठ्या प्रमाणात चीनमध्ये जात असतात. भारतासाठीही हा मोठा धोका ठरू शकतो. चीन हा शेजारी देश असल्याने भारतातूनही मोठ्या प्रमाणात लोक चीनमध्ये जात असतात.

कोरोना आजारासारखी दिसतात लक्षणे-

एचएमपीव्हीच्या संसर्गात सर्दी आणि कोरोना आजारासारखी लक्षणे दिसतात. खोकला, ताप येतो, सर्दी होते. ह्यूमन मेटाप्रोन्युमोव्हायरस (एचएमपीव्ही) हा मेटाप्रोन्युमोव्हायरस जीन्सचा आरएनए विषाणू आहे. त्याच्या बाधेमुळे लहान मुले आणि वृद्ध यांना सर्वांत जास्त त्रास होतो. या आजारांमुळे चिनी अधिकाऱ्यांनी लोकांना गर्दीच्या ठिकाणी जाणे टाळण्यास, मास्क घालण्यास व हात सॅनिटाईझ करण्यास सांगितले आहे. एचएमपीव्ही विषाणूमुळे झालेला संसर्ग बरा करण्यासाठी सध्या कोणतीही लस उपलब्ध नाही.