Shirdi : शिर्डी संस्थानच्या जेवणासाठी आता कूपन आवश्यक, वाढत्या गुन्हेगारीच्या पार्श्वभूमीवर निर्णय
Shirdi Free Meal : शिर्डीतील वाढती गुन्हेगारी लक्षात घेता साई संस्थानच्या वतीने हा निर्णय घेण्यात आला आहे. जेवण मोफतच असेल मात्र त्यासाठी आता कूपन घेणं बंधनकारक असेल.
अहिल्यानगर : शिर्डी संस्थानच्या वतीने सुरू असलेल्या अन्नछत्राच्या मोफत जेवणाविषयी एक मोठा निर्णय घेण्यात आला आहे. यापुढे आता जेवणासाठी कूपन बंधनकारक करण्यात आलं आहे. कुपन असेल तरच भाविकांना प्रसादाचा लाभ घेता येणार आहे. शिर्डीतील दुहेरी हत्याकांडानंतर साई संस्थानने हा मोठा निर्णय घेतला आहे.
या आधी शिर्डीतील प्रसादालयातील मोफत जेवणासाठी थेट प्रवेश देण्यात येत होता. यापुढे त्यात बदल होणार असून जेवणासाठी कुपन आवश्यक असणार आहे. हे कुपन मोफत देण्यात येणार आहे. त्यासाठी कोणतेही शुक्ल आकारले जाणार नाही. गुरुवार, 6 फेब्रुवारीपासून या निर्णयाची अंमलबजावणी होणार आहे. साई संस्थानचे मुख्य कार्यकारी अधिकारी गोरक्ष गाडीलकर यांनी ही माहिती दिली.
Shirdi Free Meal Coupons : जेवणासाठी कुपन कुठे मिळणार?
शिर्डी संस्थानच्या प्रसादालयातील जेवणासाठी त्याच ठिकाणी कुपन उपलब्ध केले जाणार आहेत. त्याचसोबत साई संस्थानच्या भक्त निवासात देखील हे कुपन देण्यात येणार आहेत.
वाढच्या गुन्हेगारीच्या पार्श्वभूमीवर निर्णय
शिर्डीमध्ये नुकतेच दुहेरी हत्याकांड घडलं आहे. त्यामध्ये संस्थानात काम करणाऱ्या दोन कर्मचाऱ्यांना आपला जीव गमवावा लागला आहे. त्यामुळे सर्वांच्या सुरक्षिततेसाठी हा निर्णय घेण्यात आल्याचं संस्थानकडून स्पष्ट करण्यात आलं आहे.
सुजय विखेंची मोफत जेवणावर टीका
या आधी माजी खासदार सुजय विखे यांनी शिर्डीतील मोफत जेवणावर टीका केली होती. शिर्डी संस्थानातील मोफत जेवणामुळे सगळ्या देशातील भिकारी शिर्डीमध्ये जमा होतात असं वक्तव्य त्यांनी केलं होतं. त्यामुळे गुन्हेगारीमध्ये वाढ होऊन शिर्डीकरांची सुरक्षा धोक्यात येते असंही ते म्हणाले होते. त्यामुळे शिर्डी संस्थानाने मोफत जेवण न देता 25 रुपयांमध्ये जेवण द्यावं अशी मागणी सुजय विखे यांनी केली होती.
सुजय विखेंच्या या मागणीवरून सर्व स्तरातून जोरदार टीका सुरू झाली. त्यानंतरही सुजय विखे हे त्यांच्या वक्तव्यावर ठाम होते. आता शिर्डी संस्थानने घेतलेल्या कूपनासंबंधित निर्णयामागे सुजय विखेंची मागणी असल्याची चर्चा आहे.
ही बातमी वाचा:
महत्त्वाच्या बातम्या
ट्रेंडिंग न्यूज
