Pandharpur Wari : पंढरपूर येथील भक्तनिवासांमध्ये भाविकांना नाश्ता , जेवण कमी दरात मिळणार

Pandharpur Wari : पंढरपूर येथील भक्तनिवासांमध्ये भाविकांना  नाश्ता , जेवण  कमी दरात  मिळणार विठ्ठल दर्शनासाठी पंढरपूरला येणाऱ्या भाविकांना सर्वात चांगली सुविधा देण्यासाठी मंदिर समितीने उभारलेले विविध भक्तनिवास येथे राहण्यासाठी भाविकांचा ओढा असतो . अतिशय भव्य स्वरूपात उभारलेल्या या विविध भक्तनिवासांच्या मध्ये असलेल्या ३६४ रम मध्ये जवळपास रोज १५०० भाविक निवास करू शकतात . अतिशय आलिशान पद्धतीने उभारलेले नवीन भक्त निवास तर भाविकांच्या आकर्षणाचे केंद्र असते . या भक्त निवासाच्या मध्ये देशभरातून येणाऱ्या भाविकांना चांगल्या प्रतीचे चहा , नाश्ता , भोजन मिळावे यासाठी या हॉटेलचा ठेका देण्यात आला होता . मात्र जास्त दर लावून भाविकांची लूट होत असल्याच्या तक्रारी वाढल्यानंतर समितीने आता हे हॉटेल स्वतःकडे चालवायला घेतले आहे . कालपासून याची सुरुवात झाली असून भाविक येथील अल्पदरात मिळणाऱ्या आणि चांगल्या प्रतीच्या खाद्यपदार्थावर खुश असून मंदिर समितीचे कार्यकारी अधिकारी राजेंद्र शेळके व व्यवस्थापक बालाजी पुदलवाड सर्व सुविधांकडे लक्ष ठेवून आहेत . यासाठी मंदिर समितीचे येथे येणाऱ्या देशभरातील भाविकांना चहा , कॉफी , दूध आणि नाश्त्याच्या दरात निम्म्याने कपात केली असून जेवणाची थाळी  तर केवळ १०० रुपयात ठेवल्याने भाविकांच्या खिशाला कात्री लागणे बंद होणार आहे . या भक्तनिवास मध्ये वर्षभरात देशभरातून तीन लाखापेक्षा जास्त भाविक निवासासाठी येत असतात . आता मंदिर समिती या भाविकांना चांगल्या प्रतीचे खाद्यपदार्थ अतिशय अल्पदरात देणार आहे .