5 लाखात बांगलादेशी नागरिकास बनवायचा भारतीय, बनावट पासपोर्टद्वारे पाठवायचा परदेशात; कसं फुटलं बिंग?
Crime News : बांगलादेशी नागरिकांना भारतीय नागरीक करुन बनावट पासपोर्टद्वारे परदेशात पाठवणाऱ्या मनोज गुप्ताला पश्चिम बंगालच्या पोलिसांनी अटक केली आहे.
Crime News : बांगलादेशी नागरिकांना भारतीय नागरीक करुन बनावट पासपोर्टद्वारे परदेशात पाठवणाऱ्या मनोज गुप्ताला पश्चिम बंगालच्या पोलिसांनी अटक केली आहे. 5 लाख रुपये घेऊन तो बनावट पासपोर्ट बनवत होता. त्याने बांगलादेशी नागरिकांना आधार कार्ड, पॅन कार्ड आणि मतदार कार्ड यांसारखी भारतीय कागदपत्रे मिळण्याची व्यवस्था केली होती. पोलिसांनी आरोपीला बेड्या ठोकल्या आहेत.
आत्तापर्यंत 100 बांगलादेशी नागरिकांना बनावट पासपोर्ट बनवून परदेशात पाठवले
बनावट पासपोर्ट बनवणाऱ्या टोळीचा मुख्य सूत्रधार मनोज गुप्ता याला पश्चिम बंगाल पोलिसांनी अटक केली आहे. शनिवारी रात्री पोलिसांनी त्याला उत्तर 24 परगणा जिल्ह्यातील गायघाटा पोलीस स्टेशन हद्दीतील चांदपाडा येथून अटक केली. तो दहा वर्षांहून अधिक काळ टूर-ट्रॅव्हल व्यवसायाच्या नावाखाली पासपोर्ट फसवणुकीचा धंदा चालवत होता. त्याने आत्तापर्यंत सुमारे 100 बांगलादेशी नागरिकांना भारताचे बनावट पासपोर्ट बनवून परदेशात पाठवले होते. पासपोर्ट फसवणूक प्रकरणातील ही सातवी अटक आहे.
आरोपीला 10 जानेवारीपर्यंत पोलीस कोठडी
मनोज गुप्ता हा बनावट कागदपत्रे तयार करून पासपोर्ट बनवायचा. त्याबदल्यात त्याने लाखो रुपये घेतले. या टोळीतील समरेश व इतर जण मनोजकडे काम करायचे. शनिवारी अटक केल्यानंतर मनोज गुप्ता याला अलीपूर न्यायालयात हजर करण्यात आले. त्याला 10 जानेवारीपर्यंत पोलीस कोठडीत ठेवण्याचे निर्देश न्यायालयाने दिले आहेत. पोलिसांकडून मिळालेल्या माहितीनुसार, मोतीलाल गुप्ता रोडवर असलेल्या कार्यालयात बसून नियोजन करण्यात आले. मनोज गुप्ता बांगलादेशींसाठी बनवलेले पासपोर्ट त्याच्या टूर आणि ट्रॅव्हल एजन्सीद्वारे परदेशात पाठवत असे. त्याने त्याच्या एजन्सीमार्फत 100 हून अधिक बांगलादेशी नागरिकांना परदेशात पाठवले असल्याचे पोलिसांचे म्हणणे आहे. यामध्ये बांगलादेशी महिलांचाही समावेश आहे. सीमा ओलांडून बांगलादेशातून बंगालमध्ये आणलेल्यांना बनावट कागदपत्रे आणि पासपोर्टद्वारे परदेशात पाठवण्यात आल्याचे सांगण्यात येत आहे. बनावट पासपोर्ट प्रकरणात कोलकाता पोलिसांनी यापूर्वी दक्षिण 24 परगणा जिल्ह्यातून दिपंकर दास नावाच्या व्यक्तीला अटक केली होती.
आरोपीचा टूर आणि ट्रॅव्हलचा व्यवसाय
या प्रकरणाची चौकशी केल्यानंतर अटक करण्यात आलेला व्यक्ती मनोज गुप्ता नावाच्या व्यक्तीच्या हाताखाली काम करत असल्याची माहिती पोलिसांना मिळाली होती. मनोज गुप्ताचा बेहाळा इथे टूर आणि ट्रॅव्हल्सचा व्यवसाय आहे. त्या दुकानाच्या मागे तो मोठ्या पैशाच्या मोबदल्यात बांगलादेशींचे बनावट पासपोर्ट बनवत असे. यानंतर पोलिसांनी मनोज गुप्ताचा शोध सुरू केला. त्याला देशातून पळून जाण्यापासून रोखण्यासाठी त्यांनी पावले उचलली. पोलिसांनी शनिवारी रात्री चंदपारा, उत्तर 24 परगणा येथे विशेष कारवाईत मनोज गुप्ताला अटक केली.
पाच लाख घेऊन देत होता बनावट पासपोर्ट
आरोपी मनोज बांगलादेशी लोकांकडून 5 ते 10 हजार रुपये घेत असे आणि आधी त्यांचे आधार आणि पॅन कार्ड बनवत होता. त्यानंतर त्यांचे नाव मतदार यादीत समाविष्ट करण्यात येत होते. यानंतर आरोपी बनावट पत्त्यांचा वापर करून बांगलादेशींच्या पासपोर्टसाठी अर्ज करायचे. बनावट कागदपत्रेही अपलोड करण्यात आली होती. पासपोर्ट पोस्ट ऑफिसमध्ये पोहोचल्यावर त्यांनी पोस्ट ऑफिसच्या कर्मचाऱ्यांशी संगनमत करून तेथून पासपोर्ट काढून घेतला. त्यानंतर ते पासपोर्ट बांगलादेशींना लाखो रुपयांना विकले गेले. बनावट पासपोर्टसाठी 5 लाख रुपयांपर्यंतची मागणी केली जात होती.
पोलिसांनी अनेक बनावट पासपोर्ट केले जप्त
या महिन्याच्या सुरुवातीला बनावट पासपोर्टचे प्रकरण समोर आले होते. कोलकाता पोलिसांनी टपाल विभागाच्या एका कंत्राटी कर्मचाऱ्याला दक्षिण 24 परगणामधील बेहाला येथील पर्णश्री परिसरातून अटक केली होती. त्याआधी पोलिसांनी उत्तर आणि दक्षिण 24 परगणा जिल्ह्यातून दोघांना अटक केली होती. त्यांच्याकडून हार्ड डिस्क ड्राइव्ह, एक संगणक, अनेक बनावट कागदपत्रे आणि एक लॅपटॉप जप्त करण्यात आला आहे. याचा वापर बनावट पासपोर्ट बनवण्यासाठी केला जात होता. त्यानंतर पोलिसांनी कोलकाता दक्षिण भागात असलेल्या हरिदेवपूर भागातील एका घरावर छापा टाकला. या काळात अनेक बनावट कागदपत्रे जप्त करण्यात आली. यानंतर पोलिसांनी या प्रकरणाचा धक्काबुक्की करत तपास सुरू केला.
महत्त्वाच्या बातम्या
ट्रेंडिंग न्यूज
