बीड जिल्ह्यात वर्षभरात 40 खुनाचे गुन्हे, सर्वच उघड करण्यास पोलिसांना यश; गतवर्षीच्या तुलनेत सरस कामगिरी

बीड जिल्हा पोलीस दलातील 2023/24 या वर्षातील कामगिरी समोर आली. 2023 च्या तुलनेत 2024 मध्ये हत्येच्या गंभीर गुन्ह्यात घट झाल्याचे समोर आले आहे.

Beed Police crime rate last year 2024

Source : abp

बीड : राज्यातील सरपंच हत्याप्रकरणावरुन सध्या बीड (Beed) जिल्हा राज्याच्या केंद्रस्थानी असून खंडणी प्रकरणात अटक केलेल्या वाल्मिक कराड यांच्यावर कडक कारवाई करण्याची मागणी करत जिल्ह्यातील लोकप्रतिनिधी रस्त्यावर उतरल्याचं पाहायला मिळत आहे. बीडचा बिहार झाल्याची टीका बीडमधील लोकप्रतिनिधी व विरोधी पक्षातील नेत्यांकडून केली जात आहे. त्याच पार्श्वभूमीवर बीडमध्ये गेल्या वर्षभराती किती गुन्हे घडले, किती हत्या व हत्येच्या प्रयत्नाची प्रकरणे झाली हे सांगतिलं जात आहे. मात्र, बीड पोलिसांनी (Police) आता गत 2024 या वर्षातील जिल्ह्यातील गुन्हेगारीची आकडेवारीच शेअर केली आहे. त्यानुसार, 2023 च्या तुलनेत 2024 मध्ये बीड पोलीस दल कारवाईच्या बाबतीत सरस ठरल्याचा दावा करण्यात आला आहे. मात्र, बीड जिल्ह्यात 2024 मध्ये 40 खूनाचे गुन्हे दाखल झाले असून 191 हे खुनाचा प्रयत्न केल्याचे गुन्हे दाखल आहेत. त्यामुळे, गुन्ह्याची उकल करण्यात पोलीस यंत्रणा सरस ठरली असली तरी हत्येच्या प्रयत्नातील गुन्ह्याचे प्रमाण वाढल्याचंही दिसून येत आहे. 

बीड जिल्हा पोलीस दलातील 2023/24 या वर्षातील कामगिरी समोर आली. 2023 च्या तुलनेत 2024 मध्ये हत्येच्या गंभीर गुन्ह्यात घट झाल्याचे समोर आले आहे. 2023 या वर्षात बीड जिल्ह्यात खुनाचे एकूण 64 गुन्हे दाखल होते. त्यापैकी 60 गुन्हे उघड आहेत. तर 2024 या वर्षात 40 खुनाचे गुन्हे दाखल असून सर्व गुन्हे उघड करण्यास पोलिसांना यश आल्याचं दिसून येतं. सध्या, सरपंच संतोष देशमुख हत्या प्रकरणावरून सध्या बीड जिल्ह्यातील कायदा व सुव्यवस्थेचा प्रश्न समोर आलाय. अशातच 2024 वर्ष सरताच बीड पोलिसांनी वर्षभराचा लेखाजोखा समोर मांडलाय. ज्यात 2023 मध्ये खुनाचा प्रयत्न या सदराखाली जिल्ह्यात एकूण 165 गुन्हे दाखल असून त्यापैकी 164 गुन्हे उघड करण्यात आले. तर 2024 या वर्षात खुनाचा प्रयत्न या सदराखाली एकूण 191 गुन्हे दाखल आहेत. त्यापैकी 190 गुन्हे उघड करण्यास पोलिसांना यश आले आहे. त्यावरुन, हत्येचा प्रयत्न झाल्याचे गुन्हे 2023 च्या तुलनेत वाढल्याचं पाहायला मिळत आहे. 

अंजली दमानियांचे गंभीर आरोप

दरम्यान, अंजली दमानिया यांनी एका वर्तमान पत्रातील बातमीचा संदर्भ देत परळीत मोठ्या प्रमाणावर दहशत असल्याचे म्हटले. तसेच, एकट्या परळीत 109 मृतदेह मिळत असतील तर या जिल्ह्याची स्थिती काय असेल? अशी विचारणा त्यांनी केली. फक्त यामध्ये तिघांची चौकशी व्यवस्थित होताना दिसते बाकीच्या प्रकरणात म्हणजे 106 प्रकरणात चौकशी सुद्धा नीट होत नसल्याचा आरोप दमानिया यांनी केला. तसेच, इकडे पोलीस यंत्रणेवर मोठ्या प्रमाणावर तेथील आमदारांचा आणि वाल्मीक कराड यांचा कंट्रोल आहे. हा कंट्रोल यंत्रणेवरचा निघाला पाहिजे, म्हणूनच मी परत परत म्हणते की धनंजय मुंडे यांचा राजीनामा होणं गरजेचं आहे, असेही दमानिया यांनी म्हटलं आहे. 

हेही वाचा