शेअर मार्केटमध्ये खळबळ! गुंतवणूकदारांना मोठा झटका, 5 दिवसात 16 लाख कोटींचं नुकसान
Stock Market : गेल्या पाच दिवसात शेअर बाजारात झालेल्या घसरणीचा गुंतवणूकदारांना (Investor) मोठा फटका बसला आहे. जवळपास 16 लाख कोटी रुपयांचं गुंतवणूकदारांचं नुकसान झालं आहे.
Stock Market : सध्या शेअर बाजारात (Stock Market) अस्थिरतेचं वातावरण पाहायला मिळत आहे. मोठ्या प्रमाणात घसरण होत असल्याचं चित्र दिसत आहे. गेल्या पाच दिवसात शेअर बाजारात झालेल्या घसरणीचा गुंतवणूकदारांना (Investor) मोठा फटका बसला आहे. जवळपास 16 लाख कोटी रुपयांचं गुंतवणूकदारांचं नुकसान झालं आहे. बाजारात झालेली घसरण मध्यपूर्वेतील वाढत्या तणावामुळे झाली असल्याचं बोललं जात आहे.
भारतीय निर्देशांक 4 ऑक्टोबर रोजी जवळपास एक टक्क्यांच्या घसरणीसह बंद झाला आहे. सलग पाचव्या सत्रात त्यांची घसरण सुरुच राहिली. मागील सत्रात 2 टक्क्यांहून अधिक घसरण झाल्यानंतर हा प्रकार घडला आहे. सेन्सेक्स 808.65 अंकांनी किंवा 0.98 टक्क्यांनी घसरून 81,688.45 वर बंद झाला, तर निफ्टी 200.25 अंकांनी किंवा 0.8 टक्क्यांनी घसरून 25,049.85 वर बंद झाला. गेल्या पाच ट्रेडिंग सत्रांमध्ये गुंतवणूकदारांचे 16 लाख कोटी रुपयांहून अधिक नुकसान झाले आहे. या कालावधीत सेन्सेक्स 5 दिवसांत 4,147.67 अंकांनी घसरला आहे. त्याचवेळी निफ्टी 1,201.45 अंकांनी घसरला आहे.
ती आठवड्याच्या वाढीनंतर या आठवड्यात बाजार 4 टक्क्यांनी खाली
सलग तीन आठवड्यांच्या सकारात्मक परताव्यानंतर निर्देशांक 30 सप्टेंबर ते 4 ऑक्टोबरच्या आठवड्यात 4 टक्क्यांहून अधिक घसरणीसह बंद झाले. इराण आणि इस्रायल यांच्यातील युद्ध तीव्र झालेल्या मध्यपूर्वेतील तणावामुळे अलीकडेच बाजारातील घसरण झाली आहे. याशिवाय, 27 सप्टेंबर रोजी बेंचमार्क त्यांच्या विक्रमी उच्च पातळीपासून 5 टक्क्यांहून अधिक घसरले आहेत.
शेअर बाजारात घसरण होण्याची नेमकी कारणं काय?
कच्च्या तेलाच्या वाढत्या किमती, SEBI द्वारे F&O विभागातील नियामक बदल आणि विदेशी संस्थात्मक गुंतवणूकदारांकडून पैसे काढणे यासारख्या अनेक घटकांनी बाजारातील घसरणीला भू-राजकीय चिंतेशिवाय हातभार लावला आहे. बेंचमार्क इक्विटी निर्देशांक, सेन्सेक्स आणि निफ्टी यांनी सकाळच्या व्यवहारांमध्ये प्रत्येकी अर्ध्या टक्क्यांच्या तोट्यासह नकारात्मक सुरुवात केली. निर्देशांक लवकरच त्यांच्या दिवसाच्या नीचांकीवरून सुमारे 1.5 टक्के वसूल झाले कारण खालच्या पातळीवर खरेदी दिसून आली. आता ही घसरण पुढील आठवड्यातही कायम राहणार का, हा सर्वात महत्त्वाचा प्रश्न आहे.
गेल्या काही दिवसापासून सातत्यानं शेअर बाजारात अस्थिरता पाहायला मिळत आहे. सेन्सेक्स आमि निफ्टीत घसरण होत असल्याचं दिसत आहे. याचा मोठा फटका अनेक गुंतवणूकदारांना बसत आहे. तसेच अनेक कंपन्यांना मोठा तोटा देखील सहन करावा लागत आहे. देशातील सर्वात श्रीमंत असलेले उद्योगपती मुकेश अंबानी यांच्या रिलायन्स कंपनीला देखील मोठा फटका बसला आहे. यामध्ये कोट्यावधी रुपयांचं नुकसान कंपन्यांचं होतं आहे.
महत्त्वाच्या बातम्या
ट्रेंडिंग न्यूज
