Beed Lok Sabha: लोकांनी माझ्यासाठी प्राण दिल्याने अपराधी वाटतं, या सगळ्या गोष्टींमुळे मी प्रचंड डगमगलेय: पंकजा मुंडे
Maharashtra Politics: पंकजा मुंडे यांचा बीड लोकसभा मतदारसंघात पराभव. बीडमधील समर्थकांनी आयुष्य संपवलं, पंकजांनी घेतली कुटुंबीयांची भेट
बीड: लोकसभा निवडणुकीतील माझ्या पराभवानंतर निराश झालेले लोक स्वत:चे प्राण देत आहेत. लोकांनी माझ्यासाठी प्राण दिल्याने मला सध्या अपराधी वाटत आहे. एरवी मी हिंमतीने लढणारी आहे. मात्र, या सगळ्या गोष्टींमुळे मी सध्या प्रचंड डगमगली आहे, असे वक्तव्य भाजप नेत्या पंकजा मुंडे (Pankaja Munde) यांनी केले. पंकजा मुंडे यांनी सोमवारी अंबाजोगाई तालुक्यातील डीघोळ आंबा येथील पांडुरंग सोनवणे यांच्या घरी जाऊन त्यांच्या कुटुंबीयांची भेट घेतली. बीड लोकसभा निवडणुकीतील (Beed Lok Sabha Result) पंकजा मुंडे यांच्या पराभवामुळे त्यांचे कट्टर समर्थक असलेल्या पांडुरंग सोनवणे यांना मोठा धक्का बसला होता. याच नैराश्याच्या भरात त्यांनी गळफास घेऊन आत्महत्या केली होती. त्यांच्या कुटुंबीयांची पंकजा मुंडे यांनी आज भेट घेतली. यावेळी पंकजा मुंडे भावूक होताना दिसल्या.
पांडुरंग सोनवणे यांच्या घरातून बाहेर पडल्यानंतर पंकजा मुंडे यांनी प्रसारमाध्यमांशी संवाद साधला. यावेळी त्यांनी म्हटले की, मी हिंमतीने लढणारी आहे, पण सध्या या गोष्टींनी प्रचंड डगमगली आहे. या कुटुंबाच्या मागे मी उभी राहणार आहे. पण आत्महत्येसारख्या गोष्टीचं मी समर्थन करणार नाही. मी लोकांना आवाहन करते की, त्यांनी असं काही करु नये. आपल्या लहान लेकरांना, परिवाराला वाऱ्यावर सोडून असे आत्महत्या करणे हे मला पसंत पडणार नाही. माझी तुम्हाला विनंती आहे की, तुमचं प्रेम व्यक्त करायचं असेल तर मी नक्की तुम्हाला त्याची संधी देईल. पण आपला जीव गमावू नका. तुमचा जीव म्हणजे माझा जीव आहे असं समजून जपा तो, शपथ आहे या निराशेतून बाहेर या, जसा नेता असतो तसा कार्यकर्ता असला पाहिजे. तुमचा आक्रोश आणि प्रेम तुमच्या वर्तवणुकीतून, कामातून आणि कष्टातून व्यक्त करा, असे पंकजा मुंडे यांनी सांगितले.
लोकांमध्ये न्यूनगंड तयार होतोय: पंकजा मुंडे
माझी तुम्हाला शपथ आहे की, या निराशेतून बाहेर या. जसा नेता असतो तसा कार्यकर्ता असला पाहिजे. राजकारणात जय-पराजय हे सुरु असते. पण सध्या राजकारण ज्या पद्धतीने आकार घेत आहे, त्यामुळे लोक निराशेच्या गर्तेत कोसळत आहेत. आम्ही कमी आहोत, आम्ही राजकारणाच्या प्रवाहात काहीच बदलू शकत नाही, असा न्यूनगंड लोकांमध्ये तयार होत आहे. ज्या पद्धतीने राजकारण बदलत आहे, या भावना लोकांना आक्रोशाकडे नेत आहेत, असे पंकजा मुंडे यांनी म्हटले.
आणखी वाचा
महत्त्वाच्या बातम्या
ट्रेंडिंग न्यूज
