Delhi High Court Judge Justice Yashwant Verma : बंगल्यात आग लागताच 'नोटांचे भांडार' अग्नीशमन दलाला सापडलं! दिल्ली हायकोर्टातील न्यायमूर्ती यशवंत वर्मा आहेत तरी कोण?
होळीच्या सुटीत न्यायमूर्ती वर्मा यांच्या दिल्लीतील सरकारी बंगल्याला आग लागली तेव्हा ते घरी नव्हते. कुटुंबीयांनी पोलिस आणि आपत्कालीन सेवांना फोन करून आगीची माहिती दिली आणि रोकडचा खजाना सापडला.
Delhi High Court Judge Justice Yashwant Verma : दिल्ली उच्च न्यायालयाचे न्यायमूर्ती यशवंत वर्मा यांच्या घरातून मोठी रोकड जप्त झाल्यानंतर त्यांच्या बदलीची शिफारस करण्यात आली आहे. सर्वोच्च न्यायालयाच्या कॉलेजियमने त्यांना अलाहाबाद उच्च न्यायालयात परत पाठवण्याचा निर्णय घेतला आहे. होळीच्या सुटीत न्यायमूर्ती वर्मा यांच्या दिल्लीतील सरकारी बंगल्याला आग लागली तेव्हा ते घरी नव्हते. कुटुंबीयांनी पोलिस आणि आपत्कालीन सेवांना फोन करून आगीची माहिती दिली. पोलीस आणि अग्निशमन दलाचे पथक घरातील आग विझवण्यासाठी गेले असता त्यांना मोठ्या प्रमाणात रोकड सापडली. सूत्रांनी दिलेल्या माहितीनुसार, सर्वोच्च न्यायालयाचे सरन्यायाधीश संजीव खन्ना यांना रोख रकमेची माहिती मिळाल्यावर पाच सदस्यीय कॉलेजियमने त्यांची बदली केली आहे.
सर्वोच्च न्यायालयाच्या कॉलेजियमच्या काही सदस्यांनी या संपूर्ण घडामोडीबद्दल चिंता व्यक्त केली आणि म्हटले की जर न्यायमूर्ती वर्मा यांची केवळ बदली झाली तर न्यायव्यवस्थेची प्रतिमा खराब होईल. लोकांचा न्याय व्यवस्थेवरील विश्वास कमी होईल.
कोण आहेत न्यायमूर्ती यशवंत वर्मा?
न्यायमूर्ती यशवंत वर्मा यांचा जन्म 6 जानेवारी 1969 रोजी अलाहाबाद येथे झाला. दिल्ली विद्यापीठाच्या हंसराज कॉलेजमधून त्यांनी बीकॉम ऑनर्सची पदवी मिळवली. यशवंत वर्मा यांनी 1992 मध्ये रेवा विद्यापीठातून कायद्याची पदवी घेतली. यानंतर त्यांची 08 ऑगस्ट 1992 रोजी वकील म्हणून नोंदणी झाली. अधिवक्ता यशवंत वर्मा प्रामुख्याने घटनात्मक, औद्योगिक विवाद, कॉर्पोरेट, कर आकारणी, पर्यावरण आणि कायद्याच्या संबंधित शाखांशी संबंधित विविध प्रकरणे हाताळणारे दिवाणी खटले चालवतात. 2006 पासून त्यांच्या पदोन्नतीपर्यंत न्यायमूर्ती यशवंत वर्मा हे अलाहाबाद उच्च न्यायालयाचे विशेष वकील देखील होते.
2021 मध्ये दिल्ली उच्च न्यायालयात न्यायमूर्ती
यशवंत वर्मा हे 2012 ते ऑगस्ट 2013 पर्यंत उत्तर प्रदेश राज्याचे मुख्य स्थायी वकील होते. यानंतर त्यांना न्यायालयाने ज्येष्ठ वकील म्हणून नामनिर्देशित केले. 13 ऑक्टोबर 2014 रोजी त्यांची अतिरिक्त न्यायाधीश म्हणून बढती झाली. त्यांनी 01 फेब्रुवारी 2016 रोजी स्थायी न्यायाधीश म्हणून शपथ घेतली. 11 ऑक्टोबर 2021 रोजी त्यांची दिल्ली उच्च न्यायालयात बदली झाली.
राज्यसभेत मुद्दा उपस्थित
दरम्यान, आज राज्यसभेत काँग्रेस खासदार जयराम रमेश यांनी हा मुद्दा सभागृहात उपस्थित केला आणि न्यायालयीन जबाबदारीवर चर्चा करण्याची मागणी केली. यावर प्रतिक्रिया देताना राज्यसभेचे अध्यक्ष आणि उपाध्यक्ष जगदीप धनखर म्हणाले की, व्यवस्थेत पारदर्शकता आणि जबाबदारी आवश्यक आहे आणि ते या विषयावर चर्चा करणार आहेत. जयराम रमेश म्हणाले की, आज सकाळी आम्ही एक धक्कादायक बातमी वाचली ज्यामध्ये दिल्ली उच्च न्यायालयाच्या न्यायाधीशांच्या घरातून मोठ्या प्रमाणात रोकड जप्त करण्यात आली. यापूर्वी 50 खासदारांनी अलाहाबाद उच्च न्यायालयाच्या न्यायाधीशांविरुद्ध महाभियोगाची नोटीस दिली होती, परंतु त्यावर अद्याप कोणतीही कारवाई झालेली नाही, याची आठवणही रमेश यांनी करून दिली.
महाभियोग प्रक्रिया सुरू करण्याबाबत चर्चा
दुसरीकडे, कॉलेजियमच्या काही सदस्यांनी न्यायमूर्ती वर्मा यांचा राजीनामा मागितला पाहिजे, अशी सूचना केली. त्यांनी नकार दिल्यास त्यांना हटवण्यासाठी संसदेत महाभियोगाची प्रक्रिया सुरू करावी. सूत्रांनी दिलेल्या माहितीनुसार, बदलीच्या शिफारशीसह त्यांच्याविरोधात चौकशी आणि महाभियोगाची प्रक्रिया राबविण्याची चर्चा आहे.
इतर महत्वाच्या बातम्या
महत्त्वाच्या बातम्या
