Krishna Andhale: संतोष देशमुख हत्याकांडातील फरार आरोपी कृष्णा आंधळे तृतीयपंथीयांच्या वेशात? नवीन माहिती आली समोर
Krishna Andhale: सरपंच संतोष देशमुख यांच्या हत्या प्रकरणातील फरार आरोपी कृष्णा आंधळे अद्यापही पोलिसांना सापडला नाही. त्याच्या फरार असण्यामागे अनेकदा वेगवेगळे तर्क वितर्क लावले जातात.
बीड: बीड जिल्ह्यातील मस्साजोग गावचे सरपंच संतोष देशमुख यांच्या हत्या प्रकरणातील फरार आरोपी कृष्णा आंधळे अद्यापही पोलिसांना सापडला नाही. त्याच्या फरार असण्यामागे अनेकदा वेगवेगळे तर्क वितर्क लावले जातात. तर काहींनी कृष्णा आंधळे जिंवत आहे की नाही याबाबत देखील शंका व्यक्त केली होती. त्यानंतर आता आणखी एका दाव्याने कृष्णा आंधळेबाबतच्या चर्चांना उधाण आलं आहे. काल (सोमवारी, ता. 17) सामाजिक कार्यकर्त्या तृप्ती देसाई यांनी मस्साजोग येथे जाऊन संतोष देशमुख यांच्या कुटुंबीयांची भेट घेतली, त्यानंतर त्यांनी प्रसारमाध्यमांशी संवाद साधला. यावेळी बोलताना त्यांनी देशमुख हत्या प्रकरणातील फरार आरोपी कृष्णा आंधळेबाबत मोठं वक्तव्य केलं आहे.
कृष्णा आंधळे महाराष्ट्र, कर्नाटक बॉण्ड्रीवर तृतीयपंथीयांच्या...
माध्यमांशी बोलताना सामाजिक कार्यकर्त्या तृप्ती देसाई म्हणाल्या, "मध्यंतरी मला एक फोन आला होता, त्यावेळी देशमुख हत्या प्रकरणातील फरार आरोपी कृष्णा आंधळे हा महाराष्ट्र आणि कर्नाटक बॉण्ड्रीवरती तृतीय पंथीयांच्या वेशात असू शकतो असं समोरच्या व्यक्तीनं मला सांगितलं", असल्याचं देसाईंनी म्हटलं आहे. पुढे त्या म्हणाल्या, "त्यांनी मला हेही सांगितलं की, बीड जिल्ह्यातल्या अनेक तृतीय पंथीयांसोबत त्याचे (कृष्णा आंधळेचे) चांगले संबंध होते. त्यामुळे निश्चितच तृतीय पंथीयांसोबत त्यांचा वेश धारण करून एखाद्या वस्तीमध्ये तो (कृष्णा आंधळे) तिथे असू शकतो आणि ते आपण पोलिसांना सांगावं असा मला फोन आला होता. मात्र, त्यामध्ये तथ्य आहे की नाही यामुळे मी तातडीने त्या संदर्भात कोणाशी बोलले नव्हते", असंही पुढे तृप्ती देसाई यांनी म्हटलं आहे.
"मी देशमुख कुटुंबातील सगळ्यांना भेटले त्यांचं सर्वांचं एकच सांगणं आहे, त्यांना तातडीनं न्याय मिळाला पाहिजे. आईने तर मला सांगितलं की, जसं माझ्या मुलाला त्यांनी तडफडून मारलं तसं कायद्यानुसार माझ्यासमोर आरोपींना देखील तडफडून मारलं पाहिजे. राज्यामध्ये अशा घटना होतात, त्या मिटवल्या जातात, लपवलल्या जातात. सत्तेच्या माजावर, पैशाच्या माजावर. मात्र, हे प्रकरण सगळ्यांनी उचलून धरलं, म्हणून हे प्रकरण इथपर्यंत पोहोचलं आहे. फास्टट्रॅक कोर्टात सुद्धा अनेक केसेस जातात. मात्र, वर्षानुवर्षे त्यांना देखील न्याय मिळत नाही, मात्र या प्रकरणात लवकरात लवकर न्याय मिळाला पाहिजे आणि आरोपींना फाशी झाली पाहिजे", असंही पुढे तृप्ती देसाईंनी म्हटलं आहे.
कृष्णा आंधळे नेमका कोण?
कृष्णा आंधळे संभाजीनगरला पूर्वी पोलीस भरतीची तयारी करत होता. ती तयारी करता करता तो गुन्हेगारीमध्ये आला. यापूर्वी त्याने संभाजीनगरलाही काही गुन्हे केले आहेत. त्याच्या घरची परिस्थिती हालाकीची आहे. पत्र्याचं घर आहे. संतोष देशमुख यांच्या हत्या प्रकरणामध्ये तो आरोपी आहे, तेव्हापासून तो फरार असून त्याचा शोध पोलिसांकडून घेतला जात आहे.
महत्त्वाच्या बातम्या
ट्रेंडिंग न्यूज
