एक्स्प्लोर

Gujarat election result 2022: बुडत्याचा पाय खोलात, गुजरातमध्ये काँग्रेसला विरोधी पक्षनेतेपदही मिळणं कठीण!

Gujarat election result 2022: गुजरात विधानसभेत 182 जागा आहेत. विरोधीपक्ष पदासाठी कमीतकमी 10 टक्के जागा निवडून येणं अनिवार्य आहे. विरोधीपक्ष नेतेपदासाठी गुजरातमध्ये कमीतकमी 18 जागा हव्या आहेत.

By : एबीपी माझा ब्युरो | Edited By: नामदेव कुंभार | Updated at : 08 Dec 2022 04:51 PM (IST)

Gujarat election result 2022

Gujarat election result 2022: गुजरात विधानसभा निवडणुकीत भाजपनं (BJP) ऐतिहासिक विजय मिळवला आहे. गुजरातमध्ये (gujrat) भाजपनं सलग सातव्यांदा सत्ता मिळवली आहे. या विधानसभा निवडणुकीत गुजरातमध्ये काँग्रेसची (Congress) मात्र पुरती दाणादाण उडाली आहे. गुजरात विधानसभेसाठी काँग्रेसनं 179 जागांवर उमेदवार दिले होते. पण काँग्रेसला दोन आकडी संख्याही अगदी जेमतेमच गाठता आली आहे. काँग्रेसच्या अनेक दिग्गजांना पराभवाची धूळ चाखावी लागली आहे. मात्र एवढ्या दारूण पराभवामुळे आता काँग्रेसला विरोधी पक्षनेतेपदही (Leader Of Opposition In Gujarat) मिळणं कठीण झालं आहे. केजरीवाल यांच्या आपमुळे काँग्रेसची मतं विभाजित झाल्याचं मत राजकीय विश्लेषकांनी व्यक्त केलयं. पण याचा फटका काँग्रेसला मोठा बसला आहे. गुजरातमध्ये काँग्रेसला सात जागांवर विजय मिळला आहे तर 10 जागांवर काँग्रेसचे उमेदवार आघाडीवर आहेत. सकाळपासून गुजरातमध्ये भाजपच्या विजयाचे संकेत मिळायला लागल्यानंतर काँग्रेस कार्यालयात अक्षरशः शुकशुकाट दिसून आला.

काँग्रेसचं विरोधीपक्ष नेते पदही जाणार-
गुजरात विधानसभेच्या 182 जागा आहेत. विरोधीपक्ष पदासाठी कमीतकमी 10 टक्के जागा निवडून येणं अनिवार्य आहे. विरोधीपक्ष नेतेपदासाठी गुजरातमध्ये कमीतकमी 18 जागा हव्या आहेत. पण सध्याच्या आकडेवारीवरुन काँग्रेसला 17 जागा मिळण्याची शक्यता आहे. 2017 मध्ये झालेल्या गुजरात विधानसभा निवडणुकीत काँग्रेसला 77 जागा मिळाल्या होत्या. पण या निवडणुकीत काँग्रेसची अवस्था अतिशय बिकट झाली आहे. काँग्रेसला तब्बल 50 जागांवर फटका बसल्याचं पाहायला मिळत आहे. गुजरात विधानसभा निवडणुकीत काँग्रेसला 27.3 टक्के मतं मिळाली आहेत. तर आप पक्षाला 12.9 टक्के मतं मिळाली आहेत.

लोकसभा निवडणुकीतही काँग्रेसला विरोधीपक्ष नेते पद मिळालं नाही -
2014 आणि 2019 च्या लोकसभा निवडणुकीत काँग्रेस पक्षाची दाणादाण उडाली होती. 2014 मध्ये काँग्रेसचे देशभरात फक्त 44 खासदार निवडून आले होते तर 2019 मध्ये 52 खासदार निवडून आले होते. लोकसभेत विरोधीपक्ष नेते पदासाठी कमीतकमी 55 जागा निवडून येणं अनिवार्य आहे. पण काँग्रेसला दारुण पराभव सहन करावा लागल्यामुळे विरोधी पक्षनेतेपदही मिळालं नाही. मल्लिकाअर्जुन खर्गे यांना विरोधीपक्ष नेते करण्यासाठी काँग्रेसनं प्रयत्न केले होते, मात्र लोकसभा अध्यक्ष सुमित्रा महाजन यांनी हा प्रस्ताव नाकारला होता.

तेव्हा लोकसभेत काँग्रेसच्या विरोधात कुणीचं नव्हतं -
2014 आणि 2019 लोकसभा निवडणुकीत काँग्रेसची स्थिती झाली तशीच 1980 आणि 1984 मध्ये विरोधीपक्षाची झाली होती. त्यावेळी काँग्रेसनं दणदणीत विजय मिळवला होता. 1980 लोकसभा निवडणुकीत काँग्रेसनं 531 पैकी तब्बल 353 जागांवर विजय मिळवला होता. दुसऱ्या क्रमांकावर जनता दल हा पक्ष होता, त्यांना 41 जागांवर विजय मिळवता आला होता. त्यावेळी एकाही पक्षाला विरोधीपक्ष नेते पद मिळालं नव्हतं. 1984 मध्ये 516 लोकसभा जागांपैकी काँग्रेसनं तब्बल 404 जागांवर विजय मिळवला होता तर दुसऱ्या क्रमांकावर असणाऱ्या तेलगु देसम पार्टीला 30 जागा मिळाल्या होत्या. त्यावेळी भाजपला फक्त दोन जागा मिळाल्या होत्या तर जनता पार्टीला 10 जागा मिळाल्या होत्या.

Published at : 08 Dec 2022 04:51 PM (IST)

Tags :

Loksabha Election Gujrat Leader Of Opposition BJP Gujarat Election Result 2022 CONGRESS