मुंबई वाचवण्यासाठी शिवसेना तयार, उद्धव ठाकरेंकडून पदाधिकाऱ्यांना महत्त्वाच्या सूचना; बीएमसी निवडणुकीसाठी अ‍ॅक्शन प्लॅन!
Uddhav Thackeray : ठाकरे गटाचे मिशन मुंबई महानगरपालिका सुरु झाले असून न उद्धव ठाकरे यांनी शाखा प्रमुख आणि उपविभाग प्रमुखांना महत्त्वाच्या सूचना दिल्या आहेत.
Uddhav Thackeray : देशातील सर्वात मोठी आणि श्रीमंत महानगरपालिका म्हणून ख्याती असणाऱ्या मुंबई महानगर पालिकेचा अर्थसंकल्प मंगळवारी (दि. 4) सादर करण्यात आला. मुंबई महानगरपालिकेचा अर्थसंकल्प सादर झाल्यानंतर शिवसेना ठाकरे गटाचे प्रमुख उद्धव ठाकरे (Uddhav Thaceray) अ‍ॅक्शन मोडवर आल्याचे पाहायला मिळत आहे. ठाकरे गटाचे मिशन मुंबई महानगरपालिका (BMC Election) सुरु झाले असून उद्धव ठाकरे यांनी शाखा प्रमुख आणि उपविभाग प्रमुखांशी ऑनलाईन संवाद साधलाय.
विधानसभा निवडणुकीत ठाकरेंच्या शिवसेनेला मोठा धक्का बसला. यानंतर शिवसेना ठाकरे गटाचे खासदार संजय राऊत यांनी काही दिवसांपूर्वी आगामी महापालिका आणि जिल्हा परिषद निवडणूक ठाकरे गट स्वबळावर लढणार असल्याची घोषणा केली होती. यानंतर आता आता ठाकरे गटाचे मिशन मुंबई महापालिका सुरु झाले आहे.
मुंबई वाचवण्यासाठी शिवसेना तयार
उद्धव ठाकरे यांनी शाखा प्रमुख आणि उपविभाग प्रमुखांशी ऑनलाईन संवाद साधत त्यांना मार्गदर्शन केले आहे. काहीजण मुंबई लुटायला आले आहेत. पण मुंबई वाचवण्यासाठी शिवसेना तयार आहे. आपला वार्ड आणि संघटना मजबूत करा. तुम्हाला अजून देखील अनेक आमिष येतील, त्याला बळी पडू नका, भक्कमतेने लढा, असे मार्गदर्शन उद्धव ठाकरे यांनी शाखा प्रमुख आणि उपविभाग प्रमुखांना केल्याची माहिती मिळत आहे.
बीएमसी निवडणुकीसाठी ठाकरे गटाची जोरदार तयारी
दरम्यान, 7 तारखेपासून ठाकरे गटाचे शाखा सर्वेक्षण होणार आहे. मुंबईतील प्रत्येक शाखेला एक निरीक्षक नेमला जाणार असून हा निरीक्षक शाखेत जाऊन पदाधिकारी आणि गटप्रमुख यांच्याकडून आढावा घेणार आहे. मुंबईतील प्रत्येक शाखेला एक निरीक्षक नेमण्यात येणार आहे. हे निरीक्षक मुंबईत प्रत्येक शाखेत जाऊन आढावा घेतील. त्याच सोबतच निरीक्षक शाखा बांधणीचा आढावा देखील घेणार आहेत. शाखेचे पदाधिकारी आहेत की नाहीत? कोणती आणि किती पदे खाली आहेत? याचा अहवाल हे निरीक्षक शिवसेना भवन येथे सादर करणार आहे. ठाकरे गट आगामी महानगर पालिकेच्या पार्श्वभूमीवर गटप्रमुखांवर मोठ्या प्रमाणात भर देणार असल्याची माहिती सूत्रांकडून मिळत आहे. त्यामुळे आता आगामी महानगर पालिकेच्या पार्श्वभूमीवर उद्धव ठाकरे अ‍ॅक्शन मोडवर आल्याचे पाहायला मिळत आहे.
इतर महत्त्वाच्या बातम्या
महत्त्वाच्या बातम्या
ट्रेंडिंग न्यूज
