मारहाणीचे रिल्स तयार करत आहेत, लोकांना माज आलाय; व्हायरल व्हिडिओवरुन पंकजा मुंडे विधिमंडळात कडाडल्या
जालना जिल्ह्यातील भोकरदन तालुक्यातल्या अनवा गावात तीन दिवसापूर्वी जुन्या वादातून एका व्यक्तीस अमानुष मारहाण करून त्याला लोखंडी सळईने चटके दिल्याचा प्रकार समोर आला होता.
मुंबई : बीडमधील सरपंच संतोष देशमुख यांच्या हत्याप्रकरणावरुन महाराष्ट्र हळहळला आहे. संतोष देशमुख यांना मारहाण करतानाचा फोटो व्हायरल झाल्यानंतर राज्यभरात संतापाची लाट उसळली. एकीकडे बीड आणि वाल्मिक कराड व मुंडे समर्थकांच्या घटनांची चर्चा होत असताना, मारहाण व बंदुका घेऊन रिल्स बनवले जात असल्यावरुन तीव्र संताप व्यक्त होत आहे. मात्र, अद्यापही अशाप्रकारची अमानुष मारहाण सुरू असून त्याचे व्हिडिओ व्हायरल (Viral) होत आहेत. जालना, बीड आणि नगर जिल्ह्यातील असेच काही व्हिडिओ व्हायरल झाले आहेत. यासंदर्भात आता जालनाच्या पालकमंत्री पंकजा मुंडे (Pankaja Munde) यांनी विधानपरिषद सभागृहात माहिती दिलीय. संबंधित मुलाच्या पालकांना आज मी भेटले असून संबंधित प्रकरणाता मोक्काअंतर्गत कारवाई होईल. सध्या मारहाण करुन रिल्स बनवले जात आहेत, लोकांना माज आलाय, असे म्हणत पंकजा यांनी तीव्र शब्दात भावना व्यक्त केल्या.
जालना जिल्ह्यातील भोकरदन तालुक्यातल्या अनवा गावात तीन दिवसापूर्वी जुन्या वादातून एका व्यक्तीस अमानुष मारहाण करून त्याला लोखंडी सळईने चटके दिल्याचा प्रकार समोर आला होता. या प्रकरणात आता शिवसेना उद्धव ठाकरे गटाच्या तालुकाध्यक्षाच्या भावाला पोलिसांनी अटक केलीय. भागवत दौड असे या प्रकरणातील आरोपीचे नाव असून उबाठा गटाचे तालुका अध्यक्ष नवनाथ दौड यांच्या सांगण्यावरून आरोपी असलेला त्याचा या भावाने पीडित व्यक्तीला जबर मारहाण करुन चटके दिल्याचे बोललं जात आहे. याप्रकरणी, स्वत: उपमुख्यमंत्री एकनाथ शिंदे यांनी लक्ष्य घातले असून जखमी व्यक्तीच्या सर्व वैद्यकीय खर्चाची जबाबदारी उचलली आहे. दुसरीकडे विधानपरिषदेतही हा प्रश्न उपस्थित झाल्यावर जालना जिल्ह्याच्या पालकमंत्री पंकजा मुंडेंनी उत्तर दिलं.
बीडच्या शिरुर कासारमधील अमानुष मारहाणा व्हायरल व्हिडिओसंदर्भात मी पालकमंत्री अजित दादांसोबत बोलेन. तसेच, पोलिस अधीक्षक यांना देखील सूचना देईल, असे पंकजा यांनी म्हटले. जालना जिल्ह्यातील भोकरदन प्रकरणी देखील अमानुष मारहाण झाली आहे. उपमुख्यमंत्री एकनाथ शिंदे यांनी देखील याप्रकरणी मोक्का लागेल, असं सांगितलं आहे. तर, त्या पोराचे कुटुंब देखील आज मला भेटले आहे. मारहाणीचे रिल्स तयार केले जात आहेत, लोकांना माज आलाय, अशा शब्दात पंकजा मुंडेंनी सभागृहातूनच या व्हिडिओंवर संताप व्यक्त केला.दरम्यान, धनंजय मुंडेंवरील प्रश्नावर बोलताना, तुमच्या समोर मी त्यांना सल्ला कशाला देऊ, तुम्हाला सांगून कशाला देऊ, असे पंकजा यांनी म्हटले.
शिरुरमधील मारहाणीचा व्हिडिओ व्हायरल
बीडच्या शिरूर कासार तालुक्यातील बावी गावात अमानुष मारहाणीचा एक थरारक व्हिडीओ समोर आला आहे. एका व्यक्तीला निर्घृण मारहाण करताना दिसत आहे. या प्रकरणात अद्याप शिरूर पोलीस ठाण्यात गुन्हा दाखल करण्यात आलेला नाही. मारहाण करणारा व्यक्ती हा तसेच मारहाण झालेल्या व्यक्तीचे नावही समोर आलेले नाही. मात्र, मारहाण करत असताना अत्यंत अमानुष पद्धतीने तळपायावर बॅटच्या साह्याने मारले जात आहे. हे अत्यंत धक्कादायक असून अमानुष पद्धतीने मारहाण केली जात आहे.
हेही वाचा
महत्त्वाच्या बातम्या
