(Source: Dainik Bhaskar)
Pakistan New PM : इम्रान खाननंतर 'हे' होणार पाकिस्तानचे पुढचे पंतप्रधान, सोमवारी होणार अधिकृत घोषणा
Pakistan New PM : इम्रान खान यांनी अविश्वास प्रस्तावावरील मतदानापूर्वी पंतप्रधान निवासस्थान सोडले. इम्रान खान यांच्या विरोधात 174 मते मिळाली.
Pakistan New PM : पाकिस्तानमध्ये मध्यरात्री राजकीय नाट्य पाहायला मिळालं. सर्वोच्च न्यायालयाच्या आदेशानुसार इम्रान खान (Imran Khan) यांच्याविरोधात संसदेत आणलेल्या अविश्वास प्रस्तावावर मतदान झालं. यादरम्यान इम्रान खान यांना पराभवाचा सामना करावा लागला. अविश्वास ठरावाच्या बाजूने 174 मते पडली. इम्रान खान यांचा पक्ष पीटीआय मतदान प्रक्रियेत सहभागी झाला नाही. इम्रान खान यांनी अविश्वास प्रस्तावावरील मतदानापूर्वी पंतप्रधान निवासस्थान सोडले. पीटीआयचे खासदार फैसल जावेद यांनी याबाबत प्रतिक्रिया देताना म्हटले की, 'त्यांनी सभ्यतेने पदभार सोडला आणि नतमस्तक झाले नाही.'
दरम्यान, आता पुढील पंतप्रधानाची निवडणूक सोमवारी होणार आहे. इम्रान खान यांच्या विरोधात एकजूट राहिलेल्या विरोधकांनी शाहबाज शरीफ यांना पंतप्रधानपदाचा आधीच नवा चेहरा बनवलं आहे. अशा स्थितीत शाहबाजच पंतप्रधान होणार हे स्पष्ट झालं आहे.
शाहबाज शरीफ हे माजी पंतप्रधान नवाझ शरीफ यांचे भाऊ आहेत आणि ते पाकिस्तान मुस्लिम लीग-नवाझ (PML-N) चे अध्यक्ष आहेत. अविश्वास ठराव जिंकल्यानंतर शाहबाज शरीफ यांनी संसदेत सांगितले की, 'आज पुन्हा पाकिस्तानमध्ये संविधान आणि कायदा आला आहे. आम्ही कोणावरही सूड घेणार नाही, अन्याय करणार नाही. आम्ही निरपराधांना तुरुंगात पाठवणार नाही. कायदा मार्गी लागेल. आम्ही बिलावल भुट्टो आणि मौलाना फजलूर (युती पक्षांचे नेते) यांच्यासोबत सरकार चालवू.'
इम्रान खान यांना पंतप्रधानपदावरून हटवण्यासाठी विरोधी पक्षांना 342 सदस्य असलेल्या सभागृहात 172 सदस्यांच्या पाठिंबा आवश्यक होता. अविश्वास ठरावाच्या बाजूने 174 मते पडली आहेत. मतदानानंतर सभागृहातील विरोधी पक्षांनी गळाभेट घेऊन आनंद व्यक्त केला.
क्रिकेटपटू ते राजकारणी बनलेल्या इम्रान खान यांच्या पाकिस्तान तहरीक-ए-इन्साफ (पीटीआय) पक्ष आणि सत्ताधारी आघाडीच्या काही मित्रपक्षांच्या असंतुष्टीमुळे विरोधी पक्षांनी अधिक पाठिंबा मिळवला. विशेष म्हणजे, आतापर्यंत पाकिस्तानमधील एकाही पंतप्रधानाने पाच वर्षांचा कार्यकाळ पूर्ण केलेला नाही.
महत्त्वाच्या इतर बातम्या :
- Pakistan Political Crisis: अविश्वास प्रस्ताव मंजूर, पाकिस्तानातील ‘इम्रान’ सत्तेचा अंत!
- Pakistan : पाकिस्तानमध्ये एकीकडे राजकीय संकट तर दुसरीकडे 'शाहीन 3' मिसाईल चाचणी
- Russia Ukraine War : बुचा नरसंहाराचं धक्कादायक वास्तव, चर्चजवळील सामूहिक कबरीत सापडले 67 मृतदेह
LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha
महत्त्वाच्या बातम्या
ट्रेंडिंग न्यूज
