![metaverse](https://cdn.abplive.com/imagebank/metaverse-top.png)
Nashik Loksabha : लोकसभेचं तिकीट न मिळालेले विजय करंजकर अजूनही वेटिंगवरच, उद्धव ठाकरेंशी भेट नाहीच!
Nashik Lok Sabha Constituency : नाशिक लोकसभा मतदारसंघासाठी शिवसेना ठाकरे गटाने सिन्नरचे माजी आमदार राजाभाऊ वाजे यांना उमेदवारी जाहीर झाल्याने विजय करंजकर नाराज असल्याची चर्चा आहे.
![Nashik Loksabha : लोकसभेचं तिकीट न मिळालेले विजय करंजकर अजूनही वेटिंगवरच, उद्धव ठाकरेंशी भेट नाहीच! Vijay Karanjkar is still waiting no meeting with Uddhav Thackeray Nashik Lok Sabha Constituency Lok Sabha Election 2024 Nashik Maharashtra Politics Marathi News Nashik Loksabha : लोकसभेचं तिकीट न मिळालेले विजय करंजकर अजूनही वेटिंगवरच, उद्धव ठाकरेंशी भेट नाहीच!](https://feeds.abplive.com/onecms/images/uploaded-images/2024/04/04/754ebc0d74ffa19cc67551aeb1b6f82d1712225683511923_original.jpg?impolicy=abp_cdn&imwidth=1200&height=675)
Vijay Karanjkar : नाशिक लोकसभा मतदारसंघासाठी (Nashik Lok Sabha Constituency) शिवसेना ठाकरे गटाने (Shiv Sena UBT) सिन्नरचे माजी आमदार राजाभाऊ वाजे (Rajabhau Waje) यांना उमेदवारी जाहीर केली. नाशिक लोकसभेसाठी उमेदवारी न मिळाल्याने नाराज झालेले शिवसेना ठाकरे गटाचे लोकसभा संघटक विजय करंजकर (Vijay Karanjkar) यांनी नाराजी व्यक्त केली होती. राजाभाऊ वाजेंच्या प्रचारार्थ सिन्नरमध्ये (Sinnar) झालेल्या जाहीर सभेतही करंजकर गैरहजर होते.
नाशिक लोकसभा मतदारसंघात (Nashik Lok Sabha Election 2024) उमेदवारी मिळणार असल्यामुळे विजय करंजकर यांनी वर्षभराआधीच आपल्या प्रचाराला सुरुवात केली होती. खासदार संजय राऊत (Sanjay Raut) यांनी देखील नाशिकमध्ये पत्रकार परिषदेत विजय करंजकरच उमेदवार असल्याचे सूतोवाच केले होते. त्यामुळे उमेदवारी गृहित धरून करंजकर यांनी जोरदार प्रचार केला होता.
ऐनवेळी राजाभाऊ वाजेंना उमेदवारी
महाविकास आघाडीतील राष्ट्रवादी शरदचंद्र पवार पक्ष आणि काँग्रेसकडून करंजकर यांच्या नावाला विरोध झाला होता. त्यामुळे शिवसेना ठाकरे गटाने ऐनवेळी करंजकर यांचा पत्ता कट करत, सिन्नरचे माजी आमदार राजाभाऊ वाजे (Rajabhau Waje) यांना उमेदवारी जाहीर केल्याची चर्चा आहे.
विजय करंजकर वेटिंगवरच
यानंतर विजय करंजकर यांनी लढणार आणि पाडणार, असा नारा देत शड्डू ठोकला होता. पक्षप्रमुख उद्धव ठाकरेंची (Uddhav Thackeray) भेट घेणार असल्याचे त्यांनी जाहीर केले होते. त्यांच्या नाराजीला आठ दिवस झाले आहेत. मात्र पक्षाकडून त्यांची नाराजी अद्याप दूर झालेली नाही. त्यांना 'मातोश्री'वरूनच वेटिंगवर ठेवल्याची माहिती मिळत आहे.
राजाभाऊ वाजेंच्या सभेला करंजकरांची पाठ
राजाभाऊ वाजे (Rajabhau Waje) यांची उमेदवारी जाहीर झाल्यानंतर महाविकास आघाडीच्या (Mahavikas Aghadi) वतीने सिन्नरमध्ये मंगळवारी जाहीर सभेचे आयोजन करण्यात आले होते. या सभेसाठी शिवसेनेच्या वरिष्ठ पदाधिकाऱ्यांनी करंजकर यांना आमंत्रणासाठी फोन केले होते. परंतु, करंजकर यांनी या नेत्यांचेही फोन घेतले नसल्याचे पदाधिकाऱ्यांचे म्हणणे असून मेळाव्याकडे पाठ फिरवल्यामुळे त्यांची नाराजी कायम दिसून येत आहे.
नाशिकच्या जागेवरून महायुतीत रस्सीखेच
दरम्यान, नाशिकच्या जागेवरून महायुतीत अजूनही रस्सीखेच कायम आहे. शिवसेना शिंदे गटाचे खासदार हेमंत गोडसे यांनी उमेदवारीसाठी तीन वेळा मुंबईवारी केली असली तरी नाशिकची जागा राष्ट्रवादी अजित पवार गटाचे मंत्री छगन भुजबळ यांना मिळणार असल्याचे बोलले जात आहे. आता महायुतीत नक्की नाशिकची जागा कुणाला सुटणार? हे पाहणे महत्वाचे ठरणार आहे.
आणखी वाचा
महत्त्वाच्या बातम्या
ट्रेंडिंग न्यूज
![metaverse](https://cdn.abplive.com/imagebank/metaverse-mid.png)
![सिद्धेश ताकवले](https://cdn.abplive.com/imagebank/editor.png)