SSR Case : ट्विटरवर लाखो फेक अकाऊंट्स बनवून राज्य सरकार, मुंबई पोलिसांची बदनामी, चौकशीतून माहिती उघड

महाराष्ट्र सरकार, मुंबई पोलीस आणि मुंबई पोलीस आयुक्त परमबीर सिंग यांना बदनाम करण्यासाठी जून ते ऑक्टोबर या काळात दीड लाखांपेक्षा फेक अकाउंट सोशल मीडियावर सुरू करण्यात आले होते.

मुंबई : अभिनेता सुशांतसिंग राजपूतच्या आत्महत्येनंतर ट्विटरच्या माध्यमातून महाराष्ट्र सरकार, मुंबई पोलीस आणि मुंबई पोलीस आयुक्त परमबीर सिंग यांची बदनामी करण्याची मोहिम सुरु करण्यात आली होती. याबबत सायबर एक्सपर्ट आणि फॉरेन्सिक एक्सपर्ट यांच्यामार्फत चौकशी सुरु करण्यात आली होती, त्याचा अहवाल प्राप्त झाला आहे. या अहवालानुसार, चीन, हॉंगकॉंग, नेपाळ या देशातून BOTs माध्यमातून बदनामीची ही मोहिम चालवण्यात आली होती.

महाराष्ट्र सरकार, मुंबई पोलीस आणि मुंबई पोलीस आयुक्त परमबीर सिंग यांना बदनाम करण्यासाठी जून ते ऑक्टोबर या काळात दीड लाखांपेक्षा फेक अकाउंट सोशल मीडियावर सुरू करण्यात आले होते. एक हजारहून जास्त BOTs च्या माध्यमातून बदनामीची मोहीम राबवली गेली. सायबर एक्सपर्ट आणि फॉरेन्सिक एक्सपर्ट यांचा अहवाल मुंबई पोलिसांना देण्यात आला आहे.

गेले महिनाभर सायबर पोलिसांची चौकशी सुरू होती. जी फेक अकाउंट्स होती, ती जास्तीत जास्त BOTs च्या माध्यमातून भारताबाहेर चालवली जात होती. चीन, नेपाळ, हॉंगकॉंग अशा देशातून BOTs माध्यमातून ही अकाउंट्स चालवण्यात येत असल्याचे अहवालात नमूद करण्यात आले आहे. भारतातून देखील जी अकाऊंट्स चालवण्यात आली ती देखील आपली ओळख लपवण्यासाठी प्रॉक्सी सर्व्हरच्या माध्यमातून चालवण्यात आली. तसेच यातील अनेक अकाउंट्स आता डिलिट करण्यात येत आहेत किंवा केलेले ट्वीट्स, माहिती आता डिलीट करण्यात येत आहे.

या फेक अकाऊंट्समध्ये अभिनेत्री रविना टंडनचं देखील एक फेक अकाउंट तयार करण्यात आलं होतं. त्या फेक अकाऊंटद्वारेही राज्य सरकार आणि मुंबई पोलिसांची बदनामी करण्यात आल्याचे स्पष्ट झाले आहे. गेले महिनाभर सायबर पोलिसांची चौकशी सुरू होती तेव्हा त्यांना सायबर एक्सपर्ट्सचा अहवाल प्राप्त झाला आहे.