Who is Brij Bhushan Sharan Singh : राज ठाकरेंना नडले, सलग 6 वेळा खासदार, कुस्तीचा छंद, कोण आहेत बृजभूषण सिंह?

Who is Brij Bhushan Sharan Singh : मनसे अध्यक्ष राज ठाकरे यांच्या अयोध्या दौऱ्याला विरोध करुन देशभरात चर्चेला आलेले बृजभूषण शरण सिंह हे गेल्या अनेक महिन्यांपासून वेगळ्याच वादात आहेत. भारताच्या ऑलिम्पिकपदकविजेत्या पैलवानांनी त्यांच्यावर लैंगिक छळाचे आरोप केले आहेत.

Brijbhushan Singh

Brijbhushan Singh  : मनसे (MNS) अध्यक्ष राज ठाकरे (Raj Thackeray) यांच्या अयोध्या दौऱ्याला विरोध करुन भाजप खासदार बृजभूषण शरण सिंह हे देशभरात चर्चेत आले होते. मात्र गेल्या 6 महिन्यांपासून बृजभूषण शरण सिंह यांच्याकडे देशभरातील महिला पैलवान विलन म्हणून पाहिलं जात आहे. ऑलिम्पिकपदक विजेती पैलवान साक्षी मलिक (Sakshi Malik), विनेश फोगट (Vinesh Phogat) यासारख्या पैलवानांनी बृजभूषण शरण सिंह यांच्यावर लैंगिक छळाचे आरोप केले होते. त्यासाठी दिग्गज पैलवानांनी बृजभूषण शरण सिंह यांच्याविरोधात दिल्लीत आंदोलनही केलं होतं. मात्र आता कुस्ती महासंघाच्या अध्यक्षपदी आपल्याच सहकाऱ्याला बसवून बृजभूषण शरण सिंह यांनी कुस्ती  महासंघातील आपला दबदबा दाखवून दिला आहे. या प्रकारामुळे दुखावलेल्या साक्षी मलिक आणि विनेश फोगट यांनी कुस्तीला रामराम ठोकला आहे.  

भारतीय कुस्तीला ऑलिम्पिक स्पर्धेत (Olympic Games) चमकावणाऱ्या महिला पैलवान साक्षी मलिक ( Sakshi Malik Quit Wrestling) आणि विनेश फोगट (Vinesh Phogat) यांनी अत्यंत मोठा निर्णय घेतला आहे. दोन्ही कुस्तीपटूंनी कुस्तीला रामराम ठोकण्याची घोषणा केली. भारतीय कुस्ती महासंघाच्या अध्यक्षपदी भाजप खासदार बृजभूषण सिंह (Brij Bhushan Sharan Singh) यांच्याच समर्थकाची नियुक्ती झाली आहे. संजय सिंह (Sanjay Singh) हे कुस्ती महासंघाचे नवे अध्यक्ष म्हणून नियुक्त झाले आहेत. मात्र ज्या बृजभूषण सिंह यांच्यावर लैंगिक छळाचे आरोप करत, तब्बल 40 दिवस दिल्लीत आंदोलन करुनही, त्यांच्याच माणसाची नियुक्ती महासंघाच्या अध्यक्षपदी विराजमान होत असेल, तर कुस्तीला रामराम ठोकलेला बरा, असं म्हणत साक्षी मलिक ढसाढसा रडली. 

कोण आहेत बृजभूषण शरण सिंह ? (Who is Brij Bhushan Sharan Singh)

बृजभूषण सिंह हे भाजपचे उत्तर प्रदेशातील विद्यमान खासदार आहेत. गेल्या वर्षी जेव्हा राज ठाकरे अयोध्या दौऱ्यावर जाणार होते, त्यावेळी बृजभूषण यांनी त्यांना विरोध केला होता. उत्तर भारतीयांना मारहाण, शिवीगाळ करणाऱ्या राज ठाकरे यांनी आधी माफी मागावी, मगच अयोध्येत पाय ठेवावा, असा इशारा बृजभूषण सिंह (Brij Bhushan Singh) यांनी दिला होता.  बृजभूषण सिंह यांनी राज ठाकरेंच्या या दौऱ्याला विरोध दर्शवण्यासाठी स्वत:च्या मतदारसंघात साधूसंत आणि समर्थकांचा मेळावा आयोजित केला. जोपर्यंत राज ठाकरे माफी मागत नाहीत, तोपर्यंत त्यांना अयोध्येत पाय ठेवू देणार नाही, असा निर्धार बृजभूषण सिंह समर्थकांनी केला होता. 

•  बृजभूषण शरण सिंह हे भाजपचे विद्यमान खासदार आहेत. उत्तर प्रदेशातील बहराईच जिल्ह्यातील कैसरगंज लोकसभा मतदारसंघाचं नेतृत्त्व करतात. 
• बृजभूषण शरण सिंह हे एक-दोन वेळा नव्हे तर तब्बल 6 वेळा लोकसभेवर निवडून गेले आहेत. त्यामुळे बृजभूषण शरण सिंह यांची ताकद, लोकप्रियता याचा अंदाज येऊ शकतो. 
• बृजभूषण शरण सिंह हे सध्या भारतीय कुस्ती महासंघाचे अध्यक्ष आहेत. त्यामुळे तालीम, पैलवान यांच्यात त्यांची उठबस असते. 

राम मंदिर आंदोलनानंतर पहिल्यांदा खासदार

बृजभूषण शरण सिंह हे सुद्धा आंदोलनांसाठी प्रसिद्ध आहेत. 1993 मध्ये राम मंदिर आंदोलनानंतर वादग्रस्त घुमट पाडल्याप्रकरणी ज्या 40 आरोपींना  अटक झाली होती, त्यामध्ये बृजभूषण शरण सिंह यांचाही समावेश होता. त्यानंतर झालेल्या लोकसभा निवडणुकीत बृजभूषण शरण सिंह मैदानात उतरले आणि पहिल्यांदाच खासदार झाले. 

विद्यार्थी आंदोलन ते संसदेत प्रवेश 

बृजभूषण शरण सिंह यांना विद्यार्थी संघटनेची पार्श्वभूमी आहे. बृजभूषण शरण सिंह यांनी 1979 मध्ये विद्यार्थी संघटनेची निवडणूक लढली होती. त्या निवडणुकीत विजय मिळवून त्यांनी राजकीय प्रवेशाची झलक दाखवली होती. या निवडणुकीनंतर ते युवानेते म्हणून उदयास आले. 

ऊस परिषदेचे अध्यक्ष

विद्यार्थी संघटनांमध्ये काम केल्यानंतर बृजभूषण शरण सिंह यांनी 1987 मध्ये ऊस परिषदेची निवडणूक लढवली. या निवडणुकीतही त्यांनी विजय मिळवून ऊस परिषदेचे चेअरमन झाले. 

भाजपच्या संपर्कात 

विद्यार्थी संघटना, ऊस परिषद, शेतकरी आंदोलन हे सुरु असताना बृजभूषण शरण सिंह हे 1988 मध्ये भाजपच्या संपर्कात आले. भाजपमध्ये स्थिरस्थावर झाल्यानंतर एक हिंदुत्ववादी नेता म्हणून त्यांची नवी ओळख निर्माण झाली. भाजपकडून त्यांनी पहिल्यांदा विधानपरिषद निवडणूक लढवली. मात्र त्यांचा 14 मतांनी पराभव झाला. 

मंदिर आंदोलनात सक्रिय सहभाग 

एकीकडे हिंदुत्ववादी नेता म्हणून ओळख निर्माण होत असताना, बृजभूषण शरण सिंह यांनी रामजन्मभूमी आंदोलनात सक्रीय सहभाग घेतला होता. अयोध्येतील महंत रामचंद्र परमहंस, नृत्य गोपाल दास, हनुमान गढीचे स्वामी धर्मदास यांचा आशिर्वाद घेऊन ते मंदिर आंदोलनात उतरले होते. इथेच त्यांची लालकृष्ण आडवाणींश भेट झाली. आंदोलनातील सक्रीय सहभागानंतर बृजभूषण शरण सिंह यांना जेलमध्येही जावं लागलं. 

भाजप सोडून सपा, पुन्हा भाजपा

बृजभूषण शरण सिंह यांचे भाजपमध्ये काहीकाळ मतभेद झाले. वैयक्तिक नाराजीमुळे त्यांनी थेट भाजपला रामराम ठोकला आणि समाजवादी पक्षात (SP) प्रवेश केला. सपाकडून त्यांनी कैसरगंजमधून लोकसभेची निवडणूक लढली आणि जिंकली. मात्र सपामध्ये वैचारिक मतभेदामुळे त्यांनी पुन्हा घरवापसी करत भाजपचं कमळ हाती घेतलं. 

कुस्ती, धावणे ते घोडेस्वारी 

बृजभूषण शरण सिंह यांना व्यायामाची आवड आहे. कुस्ती, धावणे, घोडेस्वारी हा त्यांचा छंद आहे. या स्पर्धांमध्ये त्यांच्या नावे अनेक पैजा, अनेक स्पर्धा भरवल्या जातात.

महत्त्वाच्या इतर बातम्या :