Salman Khan visits Sabarmati Ashram : 'अंतिम' सिनेमाच्या प्रमोशनसाठी भाईजान थेट बापूंच्या आश्रमात, चरखा चालवत म्हणाला...

'अंतिम' सिनेमाच्या प्रमोशनसाठी सलमान खानने महात्मा गांधीजींच्या साबरमती आश्रमात भेट दिली आहे. दरम्यान सलमानने चरखादेखील चालवला आहे.

सलमान_खान

Salman Khan visits Sabarmati Ashram : बॉलिवूड सुपरस्टार सलमान खानचा (Salman Khan) 'अंतिम' सिनेमा प्रदर्शित झाला आहे. सिनेमा प्रदर्शित झाल्यानंतर प्रेक्षकांमध्ये उत्सुकतेचे वातावरण पाहायला मिळत आहे. सिनेमा बॉक्स ऑफिसवर चांगलाच धुमाकूळ घालत आहे. सिनेमाचे जोरदार प्रमोशनदेखील सुरू आहे. अशातच भाईजानने थेट अहमदाबादला महात्मा गांधी यांच्या साबरमती आश्रमाला भेट दिली आहे. दरम्यान सलमान खानने बापूंचा चरखादेखील चालवला आहे. 

सलमान खान चरखा चालवतानाचे फोटो आणि व्हिडीओ सध्या सोशल मीडियावर व्हायरल होत आहेत. चरखा चालवताना सलमान अत्यंत उत्साहात दिसत आहे. आश्रमाला भेट देऊन निघताना सलमानने व्हिजिटर बुकमध्ये आपला अभिप्राय लिहिला आहे. अभिप्राय देत सलमान खानने लिहिले आहे,"मला या आश्रमात यायला खूप आवडले. हा अनुभव मी कधीच विसरणार नाही. मी पहिल्यांदाच अशा ठिकाणी भेट दिली आहे. मला पुन्हा एकदा आश्रमात भेट द्यायला आवडेल".  

स्वातंत्र्यलढ्याचे मुख्य केंद्र असलेल्या महात्मा गांधीजींच्या निवासस्थानी 'हृदय कुंज'लादेखील सलमान खानने भेट दिली. आश्रमाने त्यांच्या परंपरेनुसार सलमानचे स्वागत करताना त्याला कापसाचा हार घातला. सलमान खानने 'अंतिम' सिनेमाचे प्रमोशन करण्यासाठी वेगळ्या पद्धतीचा अवलंब केला आहे. 

सलमान खानचा 'अंतिम : द फायनल ट्रुथ' (Antim: The Final Truth) सिनेमा 26 नोव्हेंबरला सिनेमागृहात प्रदर्शित झाला होता. अंतिम : द फायनल ट्रुथ' हा सिनेमा 'मुळशी पॅटर्न' या सुपरहिट मराठी चित्रपटाचा हिंदी रिमेक आहे. 'अंतिम' सिनेमात सलमान खान एका शूर पोलिसाच्या भूमिकेत दिसतो आहे. तर सलमान खानचा मेहुणा आयुष शर्मा गुंडाच्या भूमिकेत दिसतो आहे. या सिनेमाच्या माध्यमातून महिमा मकवानाने बॉलिवूडमध्ये पदार्पण केले आहे. या सिनेमाचे दिग्दर्शन महेश मांजरेकरांनी केले आहे. 

संबंधित बातम्या

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha