Mamata Banerjee आणि Prashant Kishor यांच्यात मतभेद, तृणमूलची आज महत्त्वाची बैठक ABP Majha

पश्चिम बंगालमध्ये नगरपालिका निवडणुकीच्या तोंडावर सत्ताधारी तृणमूल काँग्रेसमध्ये असंतोष निर्माण झालाय. या वादात ममता बॅनर्जी आणि निवडणूक रणनीतीकार प्रशांत किशोर यांच्यातील संबंधही बिघडल्याची चर्चा सुरू झालीय. या पार्श्वभूमीवर मुख्यमंत्री आणि पक्षाच्या प्रमुख ममता बॅनर्जी यांनी आज महत्त्वाची बैठक बोलावली आहे. पश्चिम बंगाल विधानसभा निवडणुकीतील विजयात निवडणूक रणनीतीकार प्रशांत किशोर यांची महत्त्वाची भूमिका राहिली होती. पण आता त्यांच्यात मतभेद झाल्याची चर्चा आहे. दरम्यान, १०८ महापालिकांच्या निवडणुकीसाठी पक्षाच्या उमेदवारांची यादी अधिकृत सोशल मीडिया हँडलवर अपलोड करण्यात आली. पण याच हँडलवर आणखी एक यादी जाहीर करण्यात आल्यानं वाद निर्माण झाला आणि असंतुष्ट कार्यकर्त्यांनी राज्यभरात निदर्शनं केली.