Pune Crime : धक्कादायक... पुण्यात 24 तासांत तीन महिलांवर अमानुषपणे अत्याचार
Pune Crime : पुण्यात 24 तासांत पुण्यात बलात्काराच्या तीन घटनांची नोंद झाली आहे. यामध्ये 9, 13 आणि 21 वर्षीय मुलींवर नराधमांकडून अमानुषपणे बलात्कार करण्यात आलाय.
Pune Crime : मुंबईतील साकिनाका परिसरात झालेल्या बलात्काराच्या घटनेनं संपूर्ण महाराष्ट्र हादरला. या घटनेमुळं राज्यातील महिला सुरक्षेचा प्रश्न पुन्हा एकदा ऐरणीवर आला. अशातच पुण्यातही एकापाठोपाठ एक महिला अत्याचारांच्या घटना समोर आल्या आहेत. 24 तासांत पुण्यात बलात्काराच्या तीन घटनांची नोंद झाली आहे. यामध्ये 9, 13 आणि 21 वर्षीय मुलींवर नराधमांकडून अमानुषपणे बलात्कार करण्यात आलाय. धक्कादायक बाब म्हणजे, या मुलींच्या जवळच्या आणि ओळखीच्या व्यक्तीनंच त्यांच्यासोबत हे दुष्कर्म केलंय. पुण्यातील सिंहगड, हडपसर आणि कोंढवा पोलीस स्टेशनच्या हद्दीतून बलात्काराच्या घटना उघडकीस आल्या आहेत.
सिंहगड रस्ता पोलीस स्टेशनच्या हद्दीत 21 वर्षीय तरुणीवर तिची इच्छा नसताना जबरदस्ती करत बलात्कार करण्यात आला. या तरुणीने प्रतिकार केला असता तिला झाडूनं मारहाण करण्यात आली. झालेल्या घटनेविषयी कुठे वाच्यता केल्यास तिच्या भावाला ठार मारण्याचीही धमकी तिला देण्यात आली. दरम्यान यासर्व प्रकारानंतर पीडित मुलीनं तक्रार दिली असून आरोपी राहुल जनार्दन खंडारे (वय 39) याला अटक करण्यात आली आहे.
पुण्यातील हडपसर पोलीस स्टेशनच्या हद्दीत घडलेल्या घटनेत नऊ वर्षीय अल्पवयीन मुलीवर बलात्कार करण्यात आला. आरोपी कुणाल पटेल (वय 20) यानं पीडित मुलीसोबत ओळख करून तिच्या सोबत मैत्री केली आणि मैत्रीचा गैरफायदा घेत तिच्यासोबत जबरदस्तीनं शरीरिक सबंध ठेवले. हा सर्व प्रकार उघडकीस आल्यानंतर पीडित मुलीच्या आईनं तक्रार दिली असून त्यानुसार गुन्हा दाखल करण्यात आला आहे.
कोंढवा पोलीस स्टेशनच्या हद्दीत घडलेली घटना आहे. नात्याला कलंक लावणारी घटना आहे. सख्या बापानं नात्याला काळीमा फासत आपल्या पोटच्या मुलीवर बलात्कार केला आहे. बापानं 13 वर्षीय अल्पवयीन मुलीवर वारंवार बलात्कार केला. मागील सात वर्षांपासून तो पोटच्या मुलीसोबत जबरदस्तीनं शरीर संबंध ठेवत होता. नराधम पित्याला पोलिसांनी अटक केली आहे. कोंढवा पोलीस अधिक तपास करीत आहेत.
मुंबईत निर्भयाची पुनरावृत्ती.. 32 वर्षीय महिलेवर टेम्पोमध्ये बलात्कार
मुंबईत निर्भयाची पुनरावृत्ती पहायला मिळाली आहे. मुंबईतील उपनगर साकीनाका येथे एका टेम्पोत 32 वर्षीय महिलेवर बलात्कार केल्याची घटना घडली. या अत्याचारानंतर महिलेला अमानुषपणे मारहाण केल्याची घटना समोर आली. एका महिलेवर आधी टेम्पोसमध्ये बलात्कार करण्यात आला आणि नंतर तिला बेदम मारहाण करण्यात आली. यात महिलेची प्रकृती गंभीर असल्याचे सांगितले जात आहे. पोलिसांनी शुक्रवारी ही माहिती दिली होती. परंतु, उपचारादरम्यान महिलेचा मृत्यू झाला.
आरोपीला घटनेच्या काही तासांच्या आत अटक करण्यात आल्याचे एका अधिकाऱ्याने सांगितलं होतं. ते म्हणाले की, शुक्रवारी पहाटे पोलीस नियंत्रण कक्षाला फोन आला की, खैराणी रोडवर एक पुरुष एका महिलेला अमानुषपणे मारहाण करत आहे. महिलेचा शोध घेण्यासाठी पोलिसांचे पथक घटनास्थळी पोहोचले. त्यावेळी घटनास्थळी रक्ताने माखलेल्या महिलेला महानगरपालिका प्रशासित राजावाडी रुग्णालयात नेण्यात आले.
महत्त्वाच्या इतर बातम्या :
महत्त्वाच्या बातम्या
