Septic tank | सेप्टिक टॅंक साफ करताना गॅसमुळे गुदमरुन तीन कामगारांचा मृत्यू | ठाणे | ABP Majha

ठाण्यामध्ये सेप्टिक टॅंक साफ करताना श्वास गुदमरल्याने तीन कामगारांचा मृत्यू झाल्याची दुर्दैवी घटना रात्री साडेबाराच्या सुमारास घडली. या दुर्घटनेत पाच आणखी कामगारांची प्रकृती बिघडली आहे. अमित पुहाल (20), अमन बादल (21) , अजय बुमबक (24) अशी मृतकांची नावं आहेत. तर विजेंद्र हटवाल, मंजित वैद्य, जसबिर पुहाल, रुमर पुहाल, अजय पुहाल या पाच कामगारांची प्रकृती बिघडल्याने त्यांना उपचारासाठी दवाखान्यात दाखल करण्यात आले आहे. रात्री साडेबारा वाजेच्या सुमारास प्राईड प्रेसिंडेन्सी लक्झेरिया, ढोकाळी नाका, ढोकाळी, ठाणे (प.) येथे वरील आठ कामगार STP Plant (Sewage Treatment Plant) च्या सफाईचे काम करत होते. दुपारपासून सेप्टिक टॅंकमधील पाणी काढण्याचं काम एका ठेकेदाराला दिलं होतं. रात्री ते काम पूर्ण झालं आणि गाळ काढण्यासाठी हे कामगार आत उतरले. मात्र, आतील गॅसमुळे त्यांचा श्वास गुदमराला आणि त्यात तिघांचा मृत्यू झाला.