Mumbai Air Pollution : मुंबईकरांनो काळजी घ्या! दक्षिण मुंबईची हवा दिल्लीपेक्षा 'विषारी'
आज देखील मुंबईच्या अनेक भागातील हवेचा गुणवत्ता निर्देशांक 200च्या पार आहे. मुंबईतील एकूण एक्यूआय हा आज 280पर्यंत पोहोचला आहे.
मुंबई : सध्या राजधानी दिल्लीसह उत्तरेकडील राज्यांमधल्या प्रदूषणाचा मुद्दा देशभर गाजतोय. प्रकरण सर्वोच्च न्यायालयापर्यंत गेलंय. नवी दिल्लीतील लोकांचा वायू प्रदूषणाने श्वास रोखून धरल्यानंतर मुंबईतील नागरिक देखील प्रदूषणाच्या विळख्यात अडकल्याचे चित्र आता समोर आलं आहे. मात्र सोमवारी दक्षिण मुंबईतली हवा दिल्लीपेक्षा जास्त प्रदूषित होती. समुद्रावरुन वाहणारे वारे, वाऱ्याचा मंदावलेला वेग आणि वाहनांमुळं वाढलेलं प्रदूषण या सगळ्यांचा विपरित परिणाम दक्षिण मुंबईतल्या हवेवर झाला. सोमवारी दक्षिण मुंबईतील हवेचा गुणवत्ता निर्देशांक दिल्लीपेक्षाही अधिक पाहायला मिळाला.
सोमवारी कुलाबा परिसरातील हवा दिल्लीच्या संपूर्ण हवेच्या तुलनेत अतिशय वाईट असल्याचं नोंदवण्यात आलं आहे. दिल्लीतील संपूर्ण शहरातील हवेचा गुणवत्ता निर्देशांक 331 नोंदवण्यात आला होता. तर मुंबईतील कुलाबा परिसरातील एक्यूआय ३४५ नोंदवण्यात आला आहे. जो दिल्लीच्या पटीत काही जास्तआहे. तेव्हा मुंबईची दिल्ली होऊ नये याची जबाबदारी मुंबईकरांना घ्यायची आहे.
आज सकाळी देखील कालसारखीच परिस्थिती बघायला मिळाली. ज्यात कुलाबा, मलबार परिसरावर धुक्यांची चादर पसरलेली बघायला मिळाली. काल मुंबईतील कुलाबा, माझगाव, बीकेसी, मालाड आणि अंधेरी परिसरातील हवेची स्थिती खालावली होती. सोबतच पुढील 2-3 दिवस ही स्थिती जैसे थे राहण्याची शक्यता आहे. हिवाळयात प्रामुख्याने वाऱ्यांची दिशा जमीनीकडून समुद्राकडे असल्याने प्रदूषणात वाढ झाली आहे. सोबतच वाहनांमुळे होणारं प्रदूषण, बांधकामात झालेली वाढ ह्यामुळे धुलिकण वाहून न जाता जमिनीलगत हवेत तरंगतात. त्यामुळे वातावरणातील हवा प्रदूषित होते. मुंबईतील सध्याच्या वातावरणामुळे श्वसनाचे आजारअसलेल्यांच्या श्वासाच्या अडचणीत वाढ झाली असल्याचं मत तज्ञांकडून व्यक्त केलं जातंय.
आज देखील मुंबईतील अनेक भागातील हवेचा गुणवत्ता निर्देशांक 200च्या पार आहे. मुंबईतील एकूण एक्यूआय हा आज 280पर्यंत पोहोचला आहे. तर कुलाब्यातील एक्यूआय 370 पर्यंत गेला आहे. त्यामुळे मुंबईकरांनी हेवी व्यायाम करणं टाळावं, सोबतच सकाळी आणि संध्याकाळनंतर घराबाहेर पडणं देखील टाळायला हवं. काम करताना श्वासाचा त्रास जाणवल्यास काम थांबवा जेणेकरुन श्वास घेताना अधिक त्रास होणार नाही. एन-95 मास्कचा वापर करा, जॉगिंग टाळा आणि व्यायाम करताना अधिक ब्रेक घ्या.
मुंबईतील रस्त्यांवर वाहनांची गर्दी बघायला मिळते आहे. मागील 5 वर्षात वाहनांमुळे होणाऱ्या प्रदूषणात दुप्पट वाढ झाली आहे. दुसरीकडे लॉकडाऊननंतर कंपन्या सुरु झाल्याने देखील प्रदूषण वाढले. अशातच हिवाळयात कमी तापमानामुळे, आर्द्रतेत वाढझाल्याने आणि वाऱ्यांचा वेग कमी असल्याने प्रदूषण वाढीस पोषक असं वातावरण तयार होतं आणि यामुळेच मुंबईची देखील दिल्लीतहोत आहे का असं सध्याचं चित्र आहे.
सोमवारी मुंबईतील एअर क्वॉलिटी इन्डेक्स कसा होता?
मुंबईची दिल्ली होत आहे!
शहर एक्यूआय एक्यूआय दर्जा
मुंबई (एकूण) 245 वाईट
कुलाबा 345 अत्यंत वाईट
माझगाव 325 अत्यंत वाईट
बीकेसी 315 अत्यंत वाईट
मालाड 306 अत्यंत वाईट
अंधेरी 259 वाईट
चेंबूर 149 मध्यम
बोरीवली 149 मध्यम
नवी मुंबई 130 मध्यम
वरळी 115 मध्यम
भांडूप 111 मध्यम
संबंधीत बातम्या
महत्त्वाच्या बातम्या
ट्रेंडिंग न्यूज
