ड्रेनेज घोटाळ्यात काम न करताच राजरोस टक्केवारी ते फायर स्टेशनचा स्लॅब टाकतानाच मातीमोल; कोल्हापूर मनपात सुस्तावलेल्या अधिकाऱ्यांची उचलबांगडी सुरुच, पालकमंत्र्यांकडून 'कारभाराची' झाडाझडती

कसबा बावड्यातील ड्रेनेज घोटाळ्यात मनपाची लक्तरे वेशीवर टांगली गेल्यानंतर फायर स्टेशनचा स्लॅब टाकतानाच कोसळल्याने पुन्हा एकदा बेफिकीर कारभार समोर आला होता.

Kolhapur Municipal Corporation fire station slab collapse

Source : Facebook

Kolhapur Municipal Corporation: कोल्हापूर महानगरपालिकेच्या (Kolhapur Municipal Corporation) फुलेवाडी येथील अग्निशमन विभागाचा स्लॅब (Fulawadi fire station slab collapse) टाकतानाच कोसळताना एकाचा हकनाक मृत्यू झाला. या घटनेनंतर कोल्हापूरचे पालकमंत्री प्रकाश आबिटकर यांनी कोल्हापूर महापालिकेमधील अधिकाऱ्यांच्या कारभाराची झाडझडती घेताना संबंधित दोषी अधिकाऱ्यांना निलंबित करण्याचे आदेश शुक्रवारी झालेल्या वादळी बैठकीत दिले होते. यानंतर आता कोल्हापूर मनपाच्या प्रशासक के. मंजूलक्ष्मी (K. Manjulakshmi) यांनी ठपका ठेवण्यात आलेल्या कनिष्ठ अभियंता प्रमोद बराले यांना निलंबित केलं आहे. शहर अभियंता रमेश मस्कर आणि उपशहर अभियंता सुरेश पाटील यांना खातेनिहाय चौकशी का करण्यात येऊ नये? अशी नोटीस बजावण्यात आली आहे. स्लॅब टाकतानाच कोसळल्यानंतर ठेकेविरोधात बराले यांनीच फिर्याद दाखल केली होती.  तीन दिवसात खुलासा करण्याचे आदेश देण्यात आले आहेत. सणासुदीत पाण्याचा ठणठणाट झाल्याने जल अभियंता हर्षजित घाटगे यांनाही कारणे दाखवा नोटीस बजावण्यात आली आहे.

कसबा बावड्यातील ड्रेनेज घोटाळ्यात मनपाची लक्तरे वेशीवर टांगली गेल्यानंतर फायर स्टेशनचा स्लॅब टाकतानाच कोसळल्याने पुन्हा एकदा बेफिकीर कारभार समोर आला. प्रशासक के. मंजूलक्ष्मी यांनी यासंदर्भात समिती नेमताना तत्काळ अहवाल देण्याचे निर्देश दिले होते. अहवालानंतर ठेकेदारासह अधिकारी सुद्धा दोषी आढळल्याचे दिसून आले. यानंतर पालकमंत्री प्रकाश आबिटकर यांनी शुक्रवारी महापालिकेमध्ये अधिकाऱ्यांची चांगलीच झाडाझडती घेतली. या बैठकीसाठी कोल्हापूर दक्षिणचे आमदार महाडिक तसेच कोल्हापूर उत्तरचे आमदार राजेश क्षीरसागर सुद्धा उपस्थित होते. या बैठकीत जबाबदार अधिकाऱ्यांना निलंबित करण्याचे आदेश दिले होते. त्यानुसार के. मंजूलक्ष्मी यांनी निलंबनाचा आदेश काढला.  

काय म्हणाले होते प्रकाश आबिटकर? (Prakash Abitkar on Kolhapur Municipal Corporation) 

शुक्रवारी झालेल्या बैठकीनंतर कामात दिरंगाई करणाऱ्या ठेकेदारांवर कडक कारवाई केली जाईल, दंड आकारण्यापर्यंत थांबणार नाही, तर कठोर कारवाई आम्ही करू, असे पालकमंत्री प्रकाश आबिटकर म्हणाले होते. फुलेवाडीमध्ये जी गंभीर घटना घडली, जिथे स्लॅप बांधायच्या आधी कोसळतो, याच्या इतकं दुर्दैव नसल्याचे ते म्हणाले होते. बांधकाम कोसळण्याच्या घटनेत ठेकेदारावर दोष नाही, तर त्यांच्यावर राईट मॉनिटरिंग करण्याची शासनाच्या अधिकारी म्हणून ज्यांच्यावर जबाबदारी आहे, त्यांचेही उत्तरदायित्व निश्चित करून त्यांच्यावर कठोर कारवाई होईल, असे म्हटले होते.  पाणी पुरवठा करण्यासाठी टाक्या बांधण्याचे काम ठेकेदारानं थांबवले आहे. ठेकेदाराची जबाबदारी तितकीच आहे, पण ठेकेदारापेक्षा आमच्या यंत्रणेतल्या लोकांचा दोष तितकाच असल्याचेही ते म्हणाले होते. 

ड्रेनेज घोटाळ्यातही मनपा अधिकारी निलंबित (Drainage scam Kasba Bawda) 

दुसरीकडे, कसबा बावड्यात पूर्व बाजू अंतर्गत जाधव घर ते रेणुसे, रेडेकर, बडबडे मळ्यापर्यंत ड्रेनेज पाईप टाकणे या विकासकामात काम न करता केवळ कागदोपत्री बिलं दाखवून 72 लाखांचा घोटाळा सत्यजित कदम यांनी समोर आणला होता. यानंतर कोल्हापूर मनपा यंत्रणा हादरून गेली. यानंतर कोल्हापूर मनपाचा नोंदणीकृत ठेकेदार श्रीप्रसाद वराळेनं कोणत्या अधिकाऱ्याला किती टक्केवारी याचीच यादी जाहीर करत स्क्रीनशाॅटही सादर केले. ज्यांच्यावर टक्केवारीचा आरोप झाला त्या कनिष्ठ अभियंता प्रज्ञा गायकवाड यांनी श्रीप्रसाद वराळेविरोधात महापालिकेची फसवणूक केल्याची फिर्याद दाखल केली. लक्ष्मीपुरी पोलिस ठाण्यात वराळेविरोधात गुन्हा दाखल करण्यात आला आहे. या प्रकरणाची अजूनही चौकशी सुरुच आहे. 

कंत्राटदाराकडून आरोप झाल्यानंतर प्रशासक के.मंजूलक्ष्मी यांनी कनिष्ठ अभियंता प्रज्ञा गायकवाड, पवडी अकौंटंट तथा सहाय्यक अधीक्षक बळवंत सुर्यवंशी व वरिष्ठ लिपीक जयश्री हंकारे यांची उचलबांगडी केली. महापालिकेच्या मुख्य लेखापरिक्षक कलावती मिसाळ व वरिष्ठ लेखापरिक्षक सुनिल चव्हाण यांची शासनामार्फत विभागीय चौकशी करण्यासाठी शासनास प्रस्ताव सादर करण्यास मान्यता देण्यात आली. सेवानिवृत्त शहर अभियंता नेत्रदीप सरनोबत, सेवानिवृत्त उप-शहर अभियंता रमेश कांबळे व पवडी अकौंट सेवानिवृत्त कनिष्ठ लिपीक प्रभाकर नाईक यांची खातेनिहाय चौकशी करण्याचे आदेश दिले. पवडी विभागातील कुणाल पवारला सुद्धा निलंबित करण्यात आलं होते. 

इतर महत्वाच्या बातम्या