Runway 34 Box Office: अजयच्या ‘रनवे 34’चं बॉक्स ऑफिसवर ‘क्रॅश लँडिंग’, कमाईच्या बाबतीत चित्रपट पडला मागे!

Runway 34 Box Office: अजय देवगण आणि अमिताभ बच्चन यांचा ‘रनवे 34’ हा चित्रपट बॉक्स ऑफिसवर विशेष जादू दाखवू शकलेला नाही.

Runway 34

Runway 34 Box Office: अभिनेता अजय देवगण (Ajay Devgn) याचा ‘Runway 34’ हा चित्रपट रिलीज झाला आहे. पण, बॉक्स ऑफिस ट्रॅकवर त्याचा प्रवास तितकासा सोपा दिसत नाहीय. ‘रनवे 34’ हा चित्रपट बॉक्स ऑफिसवर विशेष जादू दाखवू शकलेला नाही. पहिल्या दिवशी अजय देवगण आणि अमिताभ बच्चन (Amitabh Bachchan) यांच्या या चित्रपटाने 3.50 कोटींची ओपनिंग केली होती. ‘रनवे 34’चे हे कलेक्शन टायगर श्रॉफच्या (Tiger Shroff) ‘हिरोपंती 2’पेक्षा (Heropanti 2) खूपच कमी होते. आता दुसऱ्या दिवशीही या चित्रपटाने संथगतीने कमाई सुरु ठेवली आहे.

या चित्रपटाने दुसऱ्या दिवशी बॉक्स ऑफिसवर 5.25 कोटींची कमाई केली आहे. अशा परिस्थितीत ‘रनवे 2’ने दोन्ही दिवसांत मिळून एकूण 8.75 कोटींचा गल्ला जमवला आहे. ‘रनवे 34’च्या कमाईत दुसऱ्या दिवशी किंचित वाढ दिसली, तरी हा आकडा खूप कमी आहे. विकेंड आणि सुट्टीचा दिवस असला, तरी प्रेक्षकवर्ग या चित्रपटाकडे वळताना दिसलेला नाही.

‘हिरोपंती 2’चेही आकडे घसरले

बॉलिवूड अभिनेता टायगर श्रॉफ याचा ‘हिरोपंती 2’ हा चित्रपट देखील प्रदर्शित झाला आहे. या चित्रपटाने बॉक्स ऑफिसवर पहिल्या दिवशी 7 कोटींचा गल्ला जमवला होता. मात्र, दुसऱ्या दिवशी या चित्रपटाच्या आकड्यांमध्येही घसरण झाली. दुसऱ्या दिवशी या चित्रपटाने केवळ 5 कोटींचा टप्पा गाठला आहे. तरीही या चित्रपटांची तुलना केल्यास कमाईच्या बाबतीत टायगरचा ‘हिरोपंती 2’, अजय देवगणच्या ‘रनवे 34’च्या पुढे आहे.  

‘रनवे 34’ हा अजय देवगण दिग्दर्शित आणि निर्मित चित्रपट आहे. या चित्रपटात अजयने स्वतःही अभिनय केला आहे. अजयसोबत या चित्रपटात अमिताभ बच्चन, रकुल प्रीत सिंह, बोमन इराणी हे नावाजलेले कलाकार झळकले आहेत. ‘रनवे 34’ हा चित्रपट सत्य घटनेवर आधारित थ्रिलर चित्रपट आहे.

हेही वाचा :