कल्याण : दुचाकी घसरल्याने मागे बसलेली महिला बसच्या चाकाखाली

जवळपास महिनाभरापूर्वी कल्याणमधील शिवाजी चौक परिसरात उंचसखल रस्त्यामुळे दुचाकी घसरल्याने झालेल्या अपघातात एका आठ वर्षाच्या मुलाचा मृत्यू झाला होता. या दुर्घटनेला महिना उलटत नाही तोवर पुन्हा एकदा याच रस्त्यावर त्याच ठिकाणी दुचाकीचा तोल गेल्याने मागे बसलेल्या महिलेचा मृत्यू झाला आहे. दुचाकीवर मागे बसलेली महिला रस्त्यावर पडून बसखाली आल्याने तिचा जागीच मृत्यू झाला. ही संपूर्ण घटना सीसीटीव्हीत कैद झाली आहे. मनीषा भोईर (वय - 40) असं या मयत महिलेचं नाव असून त्या चिकन घर परिसर राहत होत्या. मनीषा भोईर कल्याणमधील एका खाजगी शाळेत शिपाई म्हणून कार्यरत होत्या. त्यांच्या पश्चात तीन मुली, एक मुलगा आणि पती असा परिवार आहे. शहरात सुरु असलेल्या रस्त्याच्या काँक्रिटीकरणादरम्यान रस्त्यांच्या बाजूला पेव्हर ब्लॉक बसवण्यात आले आहेत.