BJP Pune Meeting : मेधा कुलकर्णी बैठकीतून उठून गेल्या; चंद्रकांतदादा-मोहोळांकडून महिला आघाडीच्या त्या आंदोलनाचं समर्थन; बैठकीवेळी नेमकं काय घडलं?
BJP Pune Meeting : महिला आघाडीच्या आंदोलनानंतर मेधा कुलकर्णी यांनी शहराध्यक्षांचे कान टोचले, मात्र दुसरीकडे फक्त चंद्रकांत पाटीलच नव्हे तर केंद्रीय राज्यमंत्री मुरलीधर मोहोळ यांनी सुद्धा महिला आघाडीच्या आंदोलनाची पाठराखण केली.
पुणे : पुण्यातील नामांकित दीनानाथ मंगेशकर हॉस्पिटलने केलेल्या पैशांच्या मागणीमुळे गर्भवती महिला तनिषा भिसे यांचा मृत्यू झाला. त्यानंतर विरोधात अनेक संघटनांनी आंदोलन केलं होतं. त्यामध्ये भारतीय जनता पक्षाची महिला आघाडी देखील होती. भाजपा महिला आघाडीने फक्त दीनानाथ मंगेशकर रुग्णालयासमोर आंदोलनच केलं नाही, तर तनिषा भिसे प्रकरणात ज्या डॉक्टर सुश्रुत घैसास यांच्यावर ठपका ठेवण्यात आला होता, त्यांच्या कुटुंबीयांचं क्लिनिक देखील फोडलं होतं. या आंदोलनावर आणि तोडफोडीवरती खासदार मेधा कुलकर्णी यांनी तीव्र नाराजी व्यक्त करत शहराध्यक्ष धीरज घाटे यांना पत्र लिहिलं आणि सोम्या-गोम्या, अर्ध्या हळकुंडाने पिवळ्या झालेल्या आंदोलकांना समज द्यावी असंही पुढे मेधा कुलकर्णी यांनी म्हटलं होतं. या पत्रानंतर भाजपमध्ये उघड दोन गट पडल्याचे पाहायला मिळालं. त्याचबरोबर भाजपमधील कोल्ड वॉर देखील समोर आलं होतं, त्याचेच पडसाद काल (मंगळवारी, ता,9) रात्री झालेल्या भाजपच्या अंतर्गत बैठकीत देखील उमटल्याचे दिसून आले.
काल मेधा कुलकर्णी या बैठकीतून बैठक संपण्याआधीच निघाल्या. त्यांचा नियोजित कार्यक्रम होता. कालची बैठक वेळेवर आयोजित करण्यात आली होती. मात्र, मेधा कुलकर्णी यांना पूर्व नियोजित वंदे मातरम संस्थेचा कार्यक्रम होता. त्यामुळे दोन्ही कार्यक्रमाला उपस्थिती लागावी म्हणून निघून आल्याचं त्यांनी सांगितलं आहे. काल पुण्यात भाजप संघटन पर्व याची बैठक पार पाडली. या बैठकीतून त्या निघून गेल्या म्हणून चर्चेला उधाण आलं होते. काल रात्री भारतीय जनता पक्षाची अंतर्गत बैठक पार पडली. या बैठकीला केंद्रीय राज्यमंत्री मुरलीधर मोहोळ, उच्च आणि तंत्रशिक्षण मंत्री चंद्रकांत पाटील, खासदार मेधा कुलकर्णी यांची उपस्थिती होती. या बैठकीमध्ये भाजपा महिला आघाडीच्या आंदोलनाचे पडसाद उमटणार याची चर्चा सुरू होती. चंद्रकांत पाटील यांनी महिला आघाडीच्या आंदोलनाची उघड पाठराखण करत, 'महिला आघाडीने केलेले आंदोलन त्यांच्या घरासाठी नव्हे तर संघटनेसाठी होते. आंदोलन करताना ते चुकीच्या पद्धतीने झाले देखील असेल, पण यामुळे कार्यकर्त्यांचे खच्चीकरण होता कामा नये' असं म्हटलं आहे.
पाटीलच नव्हे तर केंद्रीय राज्यमंत्री मोहोळांचीही पाठराखण
महिला आघाडीच्या आंदोलनानंतर मेधा कुलकर्णी यांनी शहराध्यक्षांचे कान टोचले, मात्र दुसरीकडे फक्त चंद्रकांत पाटीलच नव्हे तर केंद्रीय राज्यमंत्री मुरलीधर मोहोळ यांनी सुद्धा महिला आघाडीच्या आंदोलनाची पाठराखण केली. '19 वर्षांपूर्वी आंदोलन करताना माझ्याकडून तोडफोड झाली होती. ती चुकीचीच होती, पण कार्यकर्ता म्हणून पक्ष माझ्या पाठीशी उभा राहिला. तुम्ही जशास तसे उत्तर द्यायला शिका. एखादा पक्षाचा नेता चुकीचं सांगत असेल तर तुम्ही चुकीचं बोलताय असं म्हणायला शिका'. असं म्हणत मुरलीधर मोहोळ यांनी महिला आघाडीच्या आंदोलनाचं समर्थन केलं आहे. त्यामुळे आता भाजपमध्ये कोल्ड वॉर चालू असल्याच्या चर्चांना उधाण आलं आहे.
मेधा कुलकर्णी मोहोळ-पाटील यांच्या भाषणापूर्वीच बैठकीतून बाहेर
भारतीय जनता पक्षाची ही बैठक सायंकाळी साडेचार वाजता सुरू होणार होती. या बैठकीसाठी खासदार मेधा कुलकर्णी या चार वाजताच बैठक स्थळी उपस्थित राहिल्या. मात्र, बैठक सुरू होण्यासाठी तब्बल साडेपाच ते पावणे सहा वाजले. या बैठकीनंतर मेधा कुलकर्णी यांचे काही नियोजित कार्यक्रम होते. या कार्यक्रमाचे कारण देत त्या बैठक सुरू झाल्यानंतर काही वेळातच मेधा कुलकर्णी बैठकीच्या बाहेर पडल्या. मात्र, कुलकर्णी बैठकीतून बाहेर पडत असताना मुरलीधर मोहोळ आणि चंद्रकांत पाटील यांचे भाषण बाकी होते. त्यामुळे चर्चांना उधाण आलं आहे. त्याचबरोबर पक्षात कोल्ड वॉर सुरू असल्याच्या चर्चा सुरू झाल्या आहेत.
महत्त्वाच्या बातम्या
