पूजा खेडकरांना खोटं प्रमाणपत्र देणाऱ्या डॉक्टरांवर कारवाईची टांगती तलवार! जिल्हाधिकारी कार्यालयाकडून चौकशीचे आदेश
IAS Pooja Khedkar Controversy: वादग्रस्त आयएएस अधिकारी पूजा खेडकर यांच्यावर अटकेची टांगती तलवार असतानाच त्यांना अपंगत्वाचं प्रमाणपत्र देणाऱ्यांचेही आता धाबे दणाणले आहेत.
IAS Pooja Khedkar Controversy: पुणे : वादग्रस्त IAS अधिकारी पूजा खेडकर (IAS Pooja Khedkar) यांच्या अडचणींत दिवसागणित वाढ होताना दिसत आहे. दिव्यांग कल्याण आयुक्तालयाच्या पत्रानंतर जिल्हाधिकारी कार्यालयाकडून पिंपरी पालिकेला चौकशीचे आदेश देण्यात आले आहेत. पिंपरी पालिकेला दिलेल्या आदेशाची प्रत एबीपी माझाच्या हाती लागली आहे. महत्त्वाची बाब म्हणजे, खोटं अपंगत्वाचं प्रमाणपत्र देणाऱ्या डॉक्टरांसह मदत करणाऱ्यांवर गुन्हा दाखल होण्याची शक्यता आहे. तसेच, खोटं अपंगत्वाचं प्रमाणपत्र मिळवून देणारं रॅकेट उघडकीस आणण्याचे आदेशही पिंपरी पालिकेला देण्यात आले आहेत.
वादग्रस्त आयएएस अधिकारी पूजा खेडकर यांच्यावर अटकेची टांगती तलवार असतानाच त्यांना अपंगत्वाचं प्रमाणपत्र देणाऱ्यांचेही आता धाबे दणाणले आहेत. कारण पुणे जिल्हाधिकारी कार्यालयानं वायसीएम रुग्णालयाच्या डॉक्टरांसह पूजाला मदत करणाऱ्या प्रत्येकाची चौकशी करण्याचे आदेश दिले आहेत. तसेच, खोटं अपंगत्वाचं प्रमाणपत्र मिळवून देणारं रॅकेट असल्यास, ते ही उघडकीस आणावं लागणार आहे.
दिव्यांग कल्याण आयुक्तालयानं जिल्हाधिकारी कार्यालयाला तशा सूचना दिल्या आहेत. त्याआधारे पिंपरी पालिकेच्या वैद्यकीय विभागाला दिलेला तो आदेश एबीपी माझाच्या हाती लागला आहे. वायसीएम रुग्णालयानं पूजा खेडकरांना अपंगत्वाचं प्रमाणपत्र दिलं असून, त्यात पूजा डाव्या गुडघ्यात कायमस्वरूपी सात टक्के अधु असल्याचं म्हटलं आहे. याच प्रमाणपत्राच्या आधारे पूजानं केंद्रीय दिव्यांग विभागाकडून अपंगत्वाचं प्रमाणपत्र मिळवल्यानं या चौकशीला अधिक महत्व प्राप्त झालं आहे. कारण दिव्यांग कल्याण आयुक्तालयानं वायसीएमच्या खोट्या प्रमाणपत्राच्या आधारे त्या शासकीय सेवेत रुजू झाल्यात का? अशी शंका उपस्थित केली आहे. त्याअनुषंगानं याची खात्री पटवण्यासाठी सखोल चौकशी गरजेची आहे. चौकशीत दोषी आढळल्यास अपंगत्वाचं प्रमाणपत्र देणारे डॉक्टर, तसेच मदत करणाऱ्या प्रत्येक व्यक्तीवर गुन्हा दाखल करावा. तसेच, खोटं अपंगत्वाचं प्रमाणपत्र मिळवून देणारं रॅकेट आहे का? हे उघडकीस आणावं. तसेच, या संपूर्ण चौकशीचा अहवाल ही जिल्हाधिकारी कार्यालयाला सादर करावा, असं या आदेशात म्हटलेलं आहे. त्यामुळं अपंगत्वाचं प्रमाणपत्र मिळवून देणाऱ्या डॉक्टरांसह मदत करणाऱ्या प्रत्येकाचे धाबे दणाणले आहेत.
पूजा खेडकरांवर दिल्लीत गुन्हा दाखल
पूजा खेडकर यांच्यावर बनावट दिव्यांग प्रमाणपत्र काढल्याचा आरोप होत असताना त्याची चौकशी करण्यासाठी दिल्ली पोलिस सरसावले आहेत. दिल्ली क्राईम ब्रँचने पूजा खेडकर यांच्यावर गुन्हा नोंदवला असून त्याची चौकशी होणार आहे. दिल्लीमध्ये गुन्हा नोंद झाल्यानंतर पूजा खेडकर यांच्या अडचणीत आता वाढ झाली असून या प्रकरणी त्यांच्यावर अटकेची टांगती तलवार असल्याचं बोललं जातंय. तर दुसरीकडे पूजा खेडकर यांच्या आई मनोरमा खेडकर यांच्यावरही गुन्हा नोंद करण्यात आला असून त्या सध्या अटकेत आहेत.
महत्त्वाच्या बातम्या
ट्रेंडिंग न्यूज
