Gujarat Election Result Nota: गुजरातमध्ये तीन जागांवर 'नोटा'ने केला भाजपचा घात, माजी मंत्र्याला गमवावी लागली आमदारकी
Gujarat Election Result: भाजपला तीन जागांवर नोटा पर्यायामुळे पराभव स्वीकारावा लागला आहे. या तीन मतदारसंघात काँग्रेसने बाजी मारली.
Gujarat Election Result: गुजरात विधानसभेच्या निवडणुकीत (Gujarat Election) ऐतिहासिक कामगिरी करत भाजपने 156 जागांवर विजय मिळवला. पण, भाजपच्या या प्रचंड विजयात आणखी तीन जागांची भर पडली असती. कोणताही उमेदवार नाही अर्थात 'नोटा' (NOTA) या पर्यायाने भाजपचा तीन जागांवर घात केला आहे. नोटाला झालेल्या मतदानामुळे भाजप उमेदवारांचा थोडक्यात पराभव झाला आहे. एका माजी मंत्र्यालादेखील याचा फटका बसला आहे. त्यांना आपली आमदारकी गमवावी लागली आहे. गुजरातमध्ये भाजपच्या विजयासोबत सोमनाथ, चान्समा आणि खैरब्रह्म या जागांची जोरदार चर्चा सुरू आहे.
सोमनाथमध्ये नोटाला 1530 मते
सोमनाथची जागा जिंकण्यासाठी भाजपने यावेळी पूर्ण ताकद झोकून दिली होती. उमेदवार निवडीपासून ते निवडणूक प्रचारापर्यंत भाजपने अनेक प्रयोग केले. काँग्रेसच्या कानाभाई चुडासामा यांच्या विरोधात भाजपने प्रखर मानसिंग परमार यांना उमेदवारी दिली होती.
गृहमंत्री अमित शाह, उत्तर प्रदेशचे मुख्यमंत्री योगी आदित्यनाथ यांची सभा, रॅली आयोजित करण्यात आली होती. मात्र, नोटाने भाजपच्या या प्रयत्नांवर पाणी फेरले. काँग्रेसचे उमेदवार कनाभाई यांना 73819 तर भाजपचे मानसिंग परमार यांना 72897 मते मिळाली. तर, 1530 मतदारांनी NOTA ला पसंती दिली.
खैरब्रह्ममध्ये नोटाला 7331 मते, भाजपचा 1664 मतांनी पराभव
साबरकाठा जिल्ह्यातील खैरब्रह्म जागेवर नोटाला 7331 मते मिळाली. या ठिकाणी काँग्रेस उमेदवार तुषार चौधरी यांनी भाजप उमेदवार अश्विन कोटवाल यांचा 1664 मतांनी पराभव केला. चौधरी यांना 67349 मते आणि कोटवाल यांना 65685 मते मिळाली. भाजपने या निवडणुकीत 60 विद्यमान आमदारांना उमेदवारी दिली होती. त्यापैकी 53 आमदार पुन्हा विजयी झाले. खैरब्रह्म जागेवरही विद्यमान आमदारांना पराभव स्वीकारावा लागला.
आधी मंत्रीपद नंतर आमदारकी गेली
2021 मध्ये गुजरातमधील मंत्रिमंडळ फेरबदलात दिलीप ठाकोर यांना मंत्रिमंडळातून पायउतार व्हावे लागले होते. मात्र, भाजप नेतृत्वाने ठाकोर यांना पुन्हा एकदा निवडणुकीच्या रिंगणात उतरवले. पाटणमधील चान्समा येथून उमेदवारी देण्यात आली. मात्र NOTA मुळे त्यांना निवडणुकीत पराभवाला सामोरे जावे लागले.
या मतदारसंघात काँग्रेसचे दिनेश भाई यांना 86404 मते मिळाली. ठाकोर यांना 85002 मते मिळाली. तर, 3293 मतदारांनी NOTA च्या बाजूने मतदान केले.
गुजरातमध्ये 'नोटा'ला पाच लाख मते
गुजरात विधानसभा निवडणुकीत 182 मतदारसंघात 'नोटा'ला 501202 मतदारांनी पसंती दिली. ही संख्या एकूण मतांच्या 1.57 टक्के इतकी आहे.
इतर महत्त्वाच्या बातम्या:
महत्त्वाच्या बातम्या
