नाश्त्यासाठी पोहे खाल्याने होऊ शकतं वजन कमी; पण कसं?

नाश्त्यासाठी चवीने खाल्ले जाणारे पोहे वजन कमी करण्यासाठीही ठरतात फायदेशीर, आरोग्याच्या अनेक समस्याही होतात दूर

मुंबई : सकाळचा नाश्ता आपल्या आरोग्यासाठी फायदेशीर ठरतो, असं अनेकदा आपण ऐकलं आहे. एवढच नाहीतर अनेक संशोधानांमधूनही ही बाब सिद्ध झाली आहे. सध्याच्या धावपळीच्या जगात प्रत्येकजण स्वतःला हेल्दी अन् फिट ठेवण्यासाठी धडपडत असतो. अशातच फिट राहण्यासाठी आणि वजन नियंत्रणात ठेवण्यासाठी नाश्ताही हेल्दी असावा, असं प्रत्येकाला वाटत असतं. अनेकजण वजन कमी करण्यासाठी किंवा नियंत्रणात ठेवण्यासाठी आपल्या डाएटमध्ये हेल्दी पदार्थांचा समावेश करतात. त्यामुळे वजन कमी करण्यासोबतच आरोग्यही उत्तम राखण्यास मदत होते. भारतात नाश्त्यासाठी सर्वात लोकप्रिय पदार्थ म्हणजे, पोहे. पण तुम्हाला माहीत आहे का? नाश्त्यासाठी आवडीने खाल्ला जाणारा हा पदार्थ, वजन कमी करण्यासाठीही अत्यंत फायदेशीर ठरतो. जाणून घेऊया पोह्यांच्या आरोग्यदायी फायद्यांबाबत... पोहो पचण्यास हलके असतात. तसेच, पोह्यांमुळे सतत भूक लागण्याची समस्या उद्भवत नाही आणि पोटही बराच वेळ भरल्यासारखे वाटते. त्यामुळे गरजेपेक्षा जास्त खाण्यापासून बचाव होतो. पोहे रक्तप्रवाहात ग्लूकोज संथ गतीने रिलीज करतं. ज्यामुळे बराच वेळ भूक लागत नाही. एक वाटी पोह्यांमध्ये जवळपास 206 कॅलरी असतात. जर तुम्ही वजन कमी करण्याच्या विचारात असाल तर पोहे तयार करताना त्यामध्ये शेंगदाणे आणि बटाट्याऐवजी कांदा, हिरवी मिरची, टोमॅटो आणि इतर भाज्यांचा वापर करा. पोह्यांमध्ये फायबर मुबलक प्रमाणात असतं. त्यामुळे वजन कमी करण्यासाठी किंवा नियंत्रणात ठेवण्यासाठी मदत होते. नाश्त्यासाठी पोहे खाणं हा उत्तम आणि पौष्टिक पर्याय आहे. यामध्ये 75 टक्के कार्बोहायड्रेट, 23 टक्के फॅट्स आणि जवळपास 8 टक्के प्रोटीन असतं. तसेच पोह्यांमध्ये आयर्न, व्हिटॅमिन ए, व्हिटॅमिन सी आणि व्हिटॅमिन डी सहित अनेक महत्त्वपूर्ण खनिज मुबलक प्रमाणात असतात. टिप : वरील माहिती रिसर्चच्या आधारावर देण्यात आलेली आहे. कोणताही उपाय करण्याआधी तज्ज्ञांचा सल्ला घेणं आवश्यक असंत. ABP माझा यातून कोणताही दावा करत नाही.

संबंधित बातम्या :