नवी दिल्ली : ईशान्येतील विजयानंतर पंतप्रधान मोदी आणि अमित शाह यांची सभा, UNCUT भाषण

नवी दिल्ली : ''त्रिपुरा, कर्नाटक, पश्चिम बंगाल असो किंवा केरळ, या राज्यांमध्ये गेल्या सहा महिन्यात भाजपच्या 24 पेक्षा जास्त कार्यकर्त्यांची हत्या करण्यात आली. ईशान्य भारतातील विजयासाठी भाजपच्या कार्यकर्त्यांनी बलिदान दिलं आहे,'' असं म्हणत पंतप्रधान नरेंद्र मोदी यांनी हा विजय भाजप कार्यकर्त्यांना समर्पित केला.

त्रिपुरा, मेघालय आणि नागालँड विधानसभा निवडणुकीच्या निकालानंतर पंतप्रधान मोदी, भाजपाध्यक्ष अमित शाह यांनी भाजपच्या दिल्लीतील नव्या मुख्यालयात जाहीर सभा घेतली आणि कार्यकर्त्यांना संबोधित केलं. पंतप्रधान मोदींनी या यशाचं श्रेय अमित शाह यांना दिलं.

''सूर्योदयावेळी सूर्याचा रंग केसरी, तर सूर्यास्तावेळी लाल रंग असतो. देशात आता केसरी रंग दिसेल,'' असं म्हणत पंतप्रधान मोदींनी त्रिपुरातील विजयावर आनंद व्यक्त केला. भ्रम आणि भीती पसरवणाऱ्यांना मतदारांनीच उत्तर दिलं आहे, असं ते म्हणाले.

''ईशान्येकडील लोकांना अगोदर वाटायचं की दिल्ली आपल्यापासून दूर आहे. मात्र भाजपने हे चित्र बदललं. दिल्ली ईशान्येकडील लोकांच्या दारात आणली आहे,'' असं मोदी म्हणाले. जास्तीत जास्त मंत्र्यांचं लक्ष ईशान्येकडे असतं, असंही त्यांनी सांगितलं.

दरम्यान, निवडणुका शांततेत पार पाडल्यामुळे निवडणूक आयोग आणि सुरक्षा यंत्रणांचं मोदींनी अभिनंदनही केलं.