ब्रेकफास्ट न्यूज : ओमान ते भारत, फरीदा खान यांच्या थरारक परतीचा प्रवास

परदेशी गेल्यानंतर फसवणूक होणं आणि भारतापासून कोसो दूर एखाद्या घरात अडकून पडणं ही कल्पनाही केली तरी अंगावर काटा येतो. पण आज आपल्यासोबत बोलण्यासाठी ज्या आल्या आहेत त्यांचा मायदेशी परतण्याचा प्रवास काळजाचा थरकाप उडवणारा होता. ही गोष्ट आहे अंबरनाथच्या बुवापाड्यात राहाणाऱ्या फरीदा खान यांची. पैसे कमावून घरची परिस्थिती सुधारेल असं स्वप्न उराशी बाळगून ओमानला गेल्या. मात्र तिथे त्यांच्या घरमालकानं त्यांना 17 खोल्यांच्या अवाढव्य घराची साफसफाई करणं, रोज 25 माणसांचं जेवण करणं, गाड्या धुणं, साफसफाई करणं अशी कामं दिली. ही सगळी जबाबदारी पेलणं त्यांना कठीण झाल्यानंतर त्यांनी भारतात परतण्याचा निर्णय घेतला.

पण त्यांचा खरा प्रवास या निर्णयानंतरच सुरू झाला. देशांच्या सीमा भेदत मायदेशात परतणं इतकं अवघड होईल अशी कल्पनाही त्यांनी केली नव्हती. किंबहुना मायदेशी परतू की नाही अशी शंका यावी अशीच परिस्थिती होती. शेवटी चिंतेत सापडलेल्या त्यांच्या घरच्य़ांनी राज्य महिला आयोगाकडे आणि परराष्ट्र खात्याकडे मदत मागितल्यानंतर त्यांची सुखरूप सुटका करण्यात आली. त्यांचा ही चित्तथरारक प्रवास सांगण्यासाठी फरीदा खान आपल्यासोबत आहेत.