FIFA World Cup 2018 : फ्रान्सची पेरुवर मात, बाद फेरीचं तिकीट कन्फर्म

रशिया आणि उरुग्वेपाठोपाठ विश्वचषकाची बाद फेरी गाठणारा फ्रान्स हा तिसरा संघ ठरला आहे.

रशिया : फ्रान्सनं पेरूचा १-० असा पराभव करून, रशियातल्या फिफा विश्वचषकात सलग दुसरा विजय साजरा केला. या विजयानं फ्रान्सला क गटातून विश्वचषकाच्या बाद फेरीचं तिकीटही मिळवून दिलं. रशिया आणि उरुग्वेपाठोपाठ विश्वचषकाची बाद फेरी गाठणारा फ्रान्स हा तिसरा संघ ठरला आहे. फ्रान्सनं सलामीच्या सामन्यात ऑस्ट्रेलियावर २-१ अशी मात केली होती. त्यापाठोपाठ फ्रान्सनं पेरूचा १-० असा पराभव केला. एकोणीस वर्षांच्या किलियन एमबापेचा गोल फ्रान्सच्या या विजयात निर्णायक ठरला. एमबापेनं वयाच्या १९ वर्षे आणि १८३ दिवशी विश्वचषकात गोल नोंदवून, फ्रान्सच्या इतिहासात स्थान मिळवलं.