Dattatray Gade Arrested : मंगळवारी पहाटे गुन्हा घडला, बुधवारी उघडकीस आला, गुरुवारी ड्रोन अन् डॉगस्कॉडने दिवसभर तपास, शुक्रवारी अटक, 70 तासांमध्ये काय काय घडलं?

Dattatray Gade Arrested : मंगळवारी पहाटे गुन्हा करून आरोपी गाडे फरार झाली, त्यानंतर बुधवारी हा गुन्हा उघडकीस आला, गुरुवारी दिवसभर तपास केला तर शुक्रवारी स्थानिकांच्या मदतीने त्याला अटक करण्यात आली.

Dattatray Gade Arrested

स्वारगेट बस स्थानकामध्ये मंगळवारी पहाटे 26 वर्षीय तरुणी आल्यानंतर आरोपी दत्तात्रय गाडे याने तिला तिच्या गावी जाणाऱ्या बसमध्ये बसण्यास सांगून नंतर तिच्यावर बलात्कार केला.

सकाळी साडेसहाच्या सुमारास घटना घडल्यानंतर आरोपी एसटीने शिक्रापूर येथील घरी गेला. गुन्ह्याची भीती आणि पोलिसांकडून पकडले जाण्याच्या संशयातून त्याने घरातून पळ काढल्याचा अंदाज पोलिसांनी वर्तविला आहे.

बुधवारी संपूर्ण घटना उघडकीस आली, तेव्हापासून पोलिसांनी त्याची ओळख पटवून शोध सुरू केला, गुरुवारी दिवसभर तपास करण्यात आला, त्याच्या घरातील व्यक्तींची, मित्रमंडळींची चौकशी करण्यात आली.

घरातून पळून गेल्यानंतर गावातव त्याने एका वृद्ध महिलेला पाणी मागितल्याचे तपासात निष्पन्न झाले. तो शिक्रापूर परिसरात शेतात लपून बसल्याचा संशय आहे.

या घृणास्पद प्रकारानंतर त्याने आयुष्याचे काही बरे-वाईट करण्याचा विचारही केला असल्याची शक्यता वर्तवली गेल्याने पोलिसांनी शिक्रापूर परिसरातील सर्व विहिरी धुंडाळून काढल्या.

पोलीस ड्रोनच्या साह्याने, डॉग स्कॉडच्या मदतीने सर्वत्र त्याचा शोध घेतला. शुक्रवारी अखेर स्थानिकांच्या मदतीने त्याला अटक करण्यात आली आहे.

गाडे याच्याविरुद्ध ग्रामीण पोलिसांत यापूर्वी जबरी चोरीचे दोन गुन्हे दाखल झाले होते. आरोपी नराधम दत्तात्रय गाडेची पार्श्वभूमी गुन्हेगारी आहे.

गाडे पसार झाल्यानंतर त्याचा शोध घेण्यासाठी गुन्हे शाखा, तसेच स्वारगेट पोलिसांनी 13 पथके तयार केली. गाडेच्या संपर्कात असलेल्या दहा मित्रांची, मैत्रिणींची पोलिसांनी बुधवारी रात्री चौकशी केली.