एक्स्प्लोर

आधी बहिण गेली आता भाऊही गेला! एकीकडं दिव्यांग मंत्रालयाची स्थापना अन् इकडं दिव्यांग निधीसाठी आंदोलनादरम्यान दहा वर्षीय बालकाचा मृत्यू

तीन महिन्यांपूर्वी दिव्यांग निधी मिळावा म्हणून बार्शीतल्या चिखर्डे ग्रामपंचायतीसमोर आई-वडिलांसोबत उपोषणाला बसलेल्या 13 वर्षीय वैष्णवी रामचंद्र कुरुळे हिचा मृत्यू झाला होता.

Written By : आफताब शेख, एबीपी माझा | Edited By: निलेश झालटे | Updated at : 05 Dec 2022 05:14 PM (IST)

solapur Barshi chikharde news

Barshi Chikharde News: बीडमध्ये आंदोलनादरम्यान एका व्यक्तिचा मृत्यू झाल्यावरुन चर्चा सुरु असताना आता बार्शीत देखील एका दिव्यांग बालकाचा आंदोलनादरम्यान मृत्यू झाल्याची घटना समोर आली आहे. तीन महिन्यांपूर्वी दिव्यांग निधी मिळावा म्हणून बार्शीतल्या चिखर्डे ग्रामपंचायतीसमोर आई-वडिलांसोबत उपोषणाला बसलेल्या 13 वर्षीय वैष्णवी रामचंद्र कुरुळे हिचा मृत्यू झाला होता. त्यानंतर धक्कादायक बाब म्हणजे रामचंद्र कुरुळे यांच्या 10 वर्षीय मुलाचा देखील या आंदोलनात मृत्यू झालाय. अवघ्या तीन महिन्यात आपल्या दोन्ही मुलं गमवाल्याने बार्शीतल्या कुरुळे कुटुंबावर दुःखाचा डोंगर कोसळला आहे.

बार्शी तालुक्यातील चिखर्डे गावावर शोककळा पसरली आहे. गावातील रामचंद्र कुरळे यांनी अवघ्या तीन महिन्यात आपली दोन्ही मुलं गमावली आहेत. दिव्यांगासाठी असलेला निधी मिळाला नाही म्हणून रामचंद्र कुरुळे आणि त्यांचे कुटुंबीय ऑगस्ट महिन्यात ग्रामपंचायत कार्यालयासमोर उपोषणाला बसले होते. या आंदोलनात अल्पवयीन मुलगी वैष्णवी हिचा मृत्यू झाला होता. वैष्णवी हिच्या दुर्दैवी निधनानंतर संबंधितांवर कारवाई करू, तसेच निधी देण्याचे आश्वासन प्रशासनाने दिले. त्यानंतर आंदोलन स्थगित करून कुरुळे कुटुंबियांनी वैष्णवीच्या पार्थिववर अंत्यसंस्कार केले होते.

मात्र तीन महिने उलटून देखील आश्वासनाची पूर्तता न झाल्याने कुरुळे कुटुंबीय पुन्हा एकदा उपोषणाला सुरुवात केली. गावातील स्मशानभूमीत कुरुळे कुटुंबीय उपोषणाला बसले होते. या उपोषणा दरम्यान रामचंद्र कुरुळे यांचा अवघ्या 10 वर्षाचा मुलगा संभव याचा देखील मृत्यू झाला आहे.

खरंतर वैष्णवीच्या मृत्यूनंतर तरी प्रशासनाला जाग येणं अपेक्षित होतं. मात्र तसं झालं नाही आणि दुर्दैवाने दहा वर्षाच्या संभवचा ही उपोषणातच मृत्यू झाला. संभवच्या मृत्यूला 18 तास उलटले तरी प्रशासनाने कोणतीही दखल घेतली नाही.

त्यामुळे आता चिखर्डेतील ग्रामस्थ देखील आक्रमक झाले. प्रहार अपंग संघटनेच्या जिल्हाध्यक्ष संजीवनी बारंगुळे यांनी अंगावर डिझेल ओतून घेत पेटवून घेण्याचा प्रयत्न केला. मात्र पोलिसांनी वेळीच हस्तक्षेप केल्याने अनर्थ टळला. दोषींवर कारवाई होतं नाही तो पर्यंत मुलावर अंत्यसंस्कार करणार नाही अशी भूमिका कुरुळे कुटुंबियांनी घेतली. त्यानंतर तहसीलदार सुनील शेरखाने, प्रांतधिकारी हेमंत निकम पोलिसांसह पोहोचले. गटविकास अधिकारी माणिकराव बिचकुले यांना सक्तीच्या रजेवर पाठवत चौकशी करण्याचे आश्वासन प्रशासनाने दिलं आहे.

संबंधित बातम्या

अपंग निधीसाठी आंदोलनाला बसलेल्या दिव्यांग मुलीचा उपोषणादरम्यान मृत्यू; ग्रामस्थांचा आरोप, प्रशासन म्हणाले...

नशीबी आलेल्या शारीरिक व्यंगत्वानं कठीण झालेल्या जगण्याला दिव्यांग निधीचा काहीसा आधार असतो. मात्र हा निधी मिळवण्यासाठी वैष्णवी आणि संभव या दोघांना आपला जीव द्यावा लागला हे दुर्दैव.

About the author आफताब शेख, एबीपी माझा

आफताब शेख हे एबीपी माझा वृत्त वाहिनीत सिनिअर करस्पॉन्डट म्हणून कार्यरत आहेत. मागील 9 वर्षांपासून एबीपी माझाच्या माध्यमातून कार्यरत असून आपल्या संवेदनशील आणि निष्पक्ष पत्रकारितेने त्यांनी स्वतंत्र ओळख निर्माण केली आहे. 3 जुलै 2017 रोजी मुंबई येथील एबीपी माझाच्या मुख्य कार्यालयातून त्यांनी पत्रकारितेच्या प्रवासाला सुरुवात केली. फेब्रुवारी 2019 पासून ते सोलापूर येथे सिनिअर करस्पॉन्डन्ट म्हणून कार्यरत आहेत. सध्या ते सोलापूर श्रमिक पत्रकार संघाचे सरचिटणीस म्हणूनही जबाबदारी सांभाळत आहेत.

सोलापूरच्या राजकीय घडामोडींपासून सामाजिक, शैक्षणिक, प्रशासकीय, औद्योगिक, मनोरंजन, क्रीडा आणि व्यावसायिक क्षेत्रांतील महत्त्वाच्या विषयांना त्यांनी एबीपी माझाच्या माध्यमातून राज्यस्तरीय व्यासपीठ मिळवून दिले आहे. ‘कामगारांचे शहर‘ म्हणून ओळखल्या जाणाऱ्या सोलापूरमधील कामगारांचे प्रश्न, सर्वसामान्य नागरिकांच्या समस्या आणि उपेक्षित घटकांचा आवाज शासनदरबारी पोहोचवण्याचा त्यांचा सातत्यपूर्ण प्रयत्न राहिला आहे. बहुभाषिक आणि समृद्ध सांस्कृतिक वारसा लाभलेल्या सोलापूरचा इतिहास, परंपरा आणि वर्तमानही त्यांनी आपल्या वार्तांकनातून प्रभावीपणे मांडले आहे. कोरोना काळात कोविड वॉर्डमध्ये प्रत्यक्ष जाऊन रुग्णांच्या व्यथा आणि आरोग्य व्यवस्थेतील वास्तव समोर आणला तर महापूर-दुष्काळातील रिपोर्ट्समधून त्यांनी आपल्या संवेदनशील पत्रकारितेचा प्रत्यय दिला. सोलापूरसह मुंबई, पुणे, धाराशिव, लातूर, बीड, नांदेड आणि छत्रपती संभाजीनगर जिल्ह्यांतही त्यांनी वार्तांकन केले आहे.

त्यांनी सोलापूरच्या दयानंद कला व शास्त्र महाविद्यालयातून कला शाखेची पदवी, तर मुंबई विद्यापीठातून मास्टर ऑफ मास कम्युनिकेशन अँड जर्नलिझम ही पदव्युत्तर पदवी प्राप्त केली आहे. पत्रकारितेसोबतच सामाजिक कार्याचीही त्यांना विशेष आवड आहे. महाविद्यालयीन जीवनातील सामाजिक योगदानासाठी 2016 मध्ये तत्कालीन राष्ट्रपती प्रणव मुखर्जी यांच्या हस्ते त्यांना इंदिरा गांधी राष्ट्रीय सेवा योजना पुरस्काराने (Indira Gandhi NSS Award-2016) सन्मानित करण्यात आले. याशिवाय, पत्रकारितेतील योगदानासाठी त्यांना विविध संस्था आणि संघटनांकडून अनेक पुरस्कारांनी गौरविण्यात आले आहे.

Published at : 05 Dec 2022 05:09 PM (IST)

Tags :

Solapur Barshi Divyang Disabled Solapur News