Pandharpur News: पंढरपुरात ट्रक चालकास मारहाण करणाऱ्या अन् 3 हजार घेणाऱ्या दोन वाहतूक पोलिसांचे निलंबन; व्हिडीओ झालेला व्हायरल, नेमकं काय घडलेलं?
Pandharpur News: चालू विधानसभा अधिवेशनात आमदार खरे यांनी पंढरपूरच्या वाहतूक पोलिसांचा हा प्रकार उपस्थित केल्यानंतर आता या दोन पोलीस कर्मचाऱ्यांचे पोलीस अधीक्षक अतुल कुलकर्णी यांनी तातडीने निलंबन केले आहे.
पंढरपूर: पंढरपूर शहरात (Pandharpur News) नो एंट्रीमध्ये घुसल्याचे कारण दाखवत ट्रक चालकाकडून ज्यादा पैसे घेत आणि त्याला मारहाण करतानाचे व्हिडिओ सोशल मीडियावर व्हायरल झाल्यानंतर आता या दोन वाहतूक पोलीस कर्मचाऱ्यांना निलंबित करण्यात आले आहे. तीन दिवसांपूर्वी शहरातील सांगोला चौकात एक ट्रक आल्यानंतर वाहतूक पोलिसांनी त्याच्याकडून 3000 रुपये घेत 1000 रुपयाची पावती दिल्याचा आरोप या ट्रक चालकाने केला होता. यानंतर पोलीस कर्मचाऱ्यांनी जाब विचारणाऱ्या या ट्रक चालकाला मारहाण केली होती. यावेळी वाहतूक कोंडी मध्ये अडकलेले शरद पवार गटाचे आमदार राजू खरे यांनी तातडीने पोलिसांवर कारवाई करण्याची मागणी केली होती. चालू विधानसभा अधिवेशनात आमदार खरे यांनी पंढरपूरच्या वाहतूक पोलिसांचा हा प्रकार उपस्थित केल्यानंतर आता या दोन पोलीस कर्मचाऱ्यांचे पोलीस अधीक्षक अतुल कुलकर्णी यांनी तातडीने निलंबन केले आहे. (Pandharpur News)
नेमकं प्रकरण काय?
पंढरपूर शहरातील सांगोलाकडे जाणाऱ्या चौकात अवजड वाहतूक करणाऱ्या एक ट्रक चालकाला पोलिस बेदम असल्याचे व्हिडिओ सोशल मीडियात व्हायरल झाला होता. या ट्रक चालकाने नो एन्ट्रीमध्ये वाहन आणल्याने पोलिसांनी दोन हजार रुपये घेतले तसेच घेतलेल्या रकमेची पावती दिली नाही, असा आरोप ट्रक चालकाने केला आहे. तसेच काही अंतर गेल्यावर चालकाच्या मोबाईल वर एक हजार रुपये दंड आल्याचा मेसेज आला. यानंतर चालकाने दंड कसला याबाबत पोलिसांना विचारणा करण्यासाठी परत आला असता पोलिसांनी वाहन चालकाला बेदम मारहाण केल्याचे त्याचे म्हणणे आहे.
हे व्हिडिओ आज समाज माध्यमांवर व्हायरल झाले. हा प्रकार घडत असताना मोहोळचे राष्ट्रवादी काँग्रेस शरद पवार गटाचे मोहोळ येथील आमदार राजाभाऊ खरे त्या ठिकाणांहून जात असताना त्यांनी वरिष्ठ अधिकाऱ्यांना घटनास्थळी बोलवून असा प्रकारा बाबत नाराजी व्यक्त केली आहे. यावेळी स्थानिकांचा पोलिसांच्या वाहतूक शाखे विरोधात जोरदार संताप दिसत आहे. मात्र या प्रकारात नो एन्ट्री मध्ये घुसल्याने पोलिसांनी त्याच्यावर कारवाई केली आणि दंडाची पावती दिली असल्याचा दावा शहरचे पोलीस निरीक्षक दशरथ वाघमोडे यांनी केला आहे. याबाबत बोलताना त्यांनी मात्र मारहाणीच्या घटनेबाबत बोलणे टाळले आहे. आता संबंधित पोलीस कर्मचाऱ्यावर तातडीने कारवाई करण्याची मागणी समोर येत असून हा संपूर्ण प्रकार चालू अधिवेशनात मांडणार असल्याचा दावा आमदार राजू खरे यांनी केला आहे.
महत्त्वाच्या बातम्या
