Pune Bypoll election : चिंचवडमधील ठाकरे गटाच्या 8 पदाधिकाऱ्यांची हकालपट्टी; राहुल कलाटेंचा प्रचार केल्याचा ठपका
एकीकडे चिंचवडमध्ये प्रचाराची रणधुमाळी सुरु आहे तर दुसरीकडे उद्धव ठाकरेंची शिवसेना आक्रमक झाल्याचं पहायला मिळत आहे. उद्धव ठाकरेंच्या शिवसेनेतून आठ शिवसैनिकांची हकालपट्टी करण्यात आली.
Pune Bypoll Election : एकीकडे चिंचवडमध्ये प्रचाराची रणधुमाळी (Pune Bypoll Election) सुरु आहे तर दुसरीकडे उद्धव ठाकरेंची शिवसेना आक्रमक झाल्याचं पाहायला मिळत आहे. उद्धव ठाकरेंच्या शिवसेनेतून आठ शिवसैनिकांची हकालपट्टी करण्यात आली. चिंचवड विधानसभेच्या पोटनिवडणुकीतील अपक्ष उमेदवाराचा प्रचार करत पक्षविरोधी काम केल्याचा त्यांच्यावर ठपका ठेवण्यात आला आहे. अपक्ष आमदार राहुल कलाटे यांनी बंंडखोरी केली आहे. त्यामुळे महाविकास आघाडीचं टेन्शन वाढलं आहे. त्यामुळेच राहुल कलाटेंचा प्रचार करणाऱ्यांवर कारवाई करण्यात आली आहे.
चिंचवड विधानसभेच्या महिला संघटिका अनिता तुतारे, शहर संघटिका रजनी वाघ, विभाग संघटिका शिल्पा आनपान, उपशहरप्रमुख नवनाथ तरस, विभागप्रमुख प्रशांत तरवटे, हनुमंत पिसाळ, पिंपरी विधानसभा समन्वयक गणेश आहेर आणि रवि घटकर हे पदाधिकारी पक्षादेशाविरोधात काम करत होते. त्यामुळे त्यांची हकालपट्टी करण्यात आली आहे.
महाविकास आघाडीकडून राष्ट्रवादी कॉंग्रेसच्या नाना काटे यांना उमेदवारी देण्यात आली आहे. त्यामुळे राष्ट्रवादी कॉंग्रेस, कॉंग्रेस आणि शिवसेनेकडून प्रचाराची जोरदार तयारी सुरु केली आहे. त्यात रोज नेते मंडळी उपस्थित राहत आहेत. त्यासोबतच राहुल कलाटे यांचादेखील प्रचार धुमधडाक्यात सुरु आहे. त्यांच्याच प्रचारात या शिवसैनिकांनी मदत केली किंवा सहभाग नोंदवल्याने ही कारवाई करण्यात आली आहे.
चिंचवडमध्ये तिरंगी लढत
चिंचवडमध्ये तिरंगी लढत आहे. त्यामुळे या मतदार संघाकडे सर्वपक्षीय नेत्यांचं लक्ष लागलं आहे. सर्वपक्षीयांकडून या मतदार संघाच्या प्रचारासाठी प्रयत्नांची पराकाष्ठा केली जात आहे. महाविकास आघाडीकडून वरिष्ठ नेत्यांपासून ते तरुण नेत्यांपर्यंत सर्वच नेते या निवडणुकीच्या मैदानात उतरणार आहेत. आमदार रोहित पवार, नाना पटोले, अजित पवार हे मैदानात उतरले आहेत. त्यासोबतच भाजपच्या उमेदवार अश्विनी जगताप यांच्यासाठी भाजपचे नेते जोमाने प्रचार यात्रेत उतरले आहेत. भाजपकडून पंकजा मुंडे, चंद्रशेखर बावनकुळे, रविंद्र चव्हाण, गिरीश महाजन प्रचारासाठी तळ ठोकून आहेत.
आदित्य ठाकरेंचा रोड शो
महाविकास आघाडीचे उमेदवार नाना काटे यांच्या प्रचारासाठी आज थेट शिवसेना नेते आदित्य ठाकरे आणि विरोधी पक्षनेते अजित पवार यांचा आज रोड शो आयोजित करण्यात आला आहे. त्यामुळे चिंचवड आणि कसब्यात प्रचाराचा धुरळा सुरु आहे. दोन्ही पक्षांकडून कस लावण्यात येत आहे. येत्या 26 फेब्रुवारीला या दोन्ही मतदारसंघासाठी मतदान पार पडणार आहे. या निवडणुकीच्या रिंगणात कोण बाजी मारणार हे पाहणं महत्वाचं ठरणार आहे.
महत्त्वाच्या बातम्या
